كەشەلى بەرى جەڭىپ العان مەدال سانى بويىنشا قازاقستاننىڭ الدىنا ءتۇسىپ كەتكەن وزبەكستان جايلى جازباعان جان قالمادى. سونداعى سەبەپ نە دەسەي، سول باياعى سارسىعان ستەرەوتيپ.

ءسىز سپورتتاعى رەيتينگى نە قىلاسىز، الەمدىك رەيتينگى قاراساڭىزشى. ءبىز وزبەكتەن باياعىدا جەڭىلگەنبىز، تەك ءالى مويىنداماي كەلە جاتىر دەمەسەڭىز... جىل سايىن كولۋمبيا ۋنيۆەرسيتەتىنىڭ الەۋمەتتانۋشىلارى ءتىزىپ بەرەتىن ەڭ باقىتتى ەلدەردىڭ World Happiness Report دەگەن رەيتينگى بار. ءار مەملەكەتتەگى ءال-اۋقات دەڭگەيى مەن ازاماتتارىنىڭ سول ومىرگە قاناعاتتانۋ دەڭگەيىن ەسەپتەيدى. سوندا بۇل تىزىمگە كىرگەن 156 مەملەكەتتىڭ اراسىندا 49-شى ورنىمەن بيىل وزبەكستان تمد مەملەكەتتەرىنىڭ اراسىندا ءبىرىنشى ورىنعا شىعىپ كەتكەن ەدى. قازاقستان ودان بەس ورىن كەيىن تۇر... بىلتىر وزاعام 44-ءشى ورىندا بولعان، ءبىز 57-مە، 56-ما، سونداي بىردەڭە...

الگى رەيتينگى ازاماتتاردىڭ تاۋاردى ساتىپ الۋ قابىلەتىن، الەۋمەتتىك قولداۋ دەڭگەيىن (قايعىعا ءتۇسىپ قالسا، قارايلاساتىن كىمى بار، نەسى بار), بولجانىپ وتىرعان ءومىرىنىڭ ۇزاقتىعى، جومارتتىق جانە قايىرىمدىلىق دەڭگەيى، جەمقورلىققا قارسىلىق يممۋنيتەتى، قوبالجۋعا نەگىز بەرەتىن ماسەلەلەرىنىڭ قاتارىن دا ساراپقا سالادى.

باسقاسىن بىلمەدىم، ءوزىم كورگەن وزبەك اكانىڭ كارىموۆ قانشا كارىنە الىپ وتىرسا دا، اۋزىنان بوقتىعى شىققانىن كورمەپپىم. سامارقانعا بارعاندا ادەيى تاكسيستىنىڭ اۋزىنا جاۋابىنا شەيىن دايىنداپ اپاردىم - "جوعا، ولاي دەي المايمىن، ءبارى دە جاقسى بولادى" دەپ قۇتىلادى. ماحاللا-ماحاللاسىندا جاس-كارى دەمەي اقساقالىن تىڭدايدى، سول كوشەدە اراق ساتقىزبايدى، تەنتەگى بولسا تارتىپكە سالىپ، ءتالپىش قىزىنا تەڭىن تاۋىپ، ايتەۋىر تۇرمىسقا جىبەرەدى. شىرشىقتا ءالى كۇنگە دەيىن بايلارىنىڭ ءوزى تاڭ نامازىنان سوڭ دوربا ارقالاپ، كەدەيلەردىڭ ەسىگىنىڭ الدىنا ازىق-تۇلىك تاستاپ كەتەدى دەگەندى ەستىگەنمىن. كەدەي كىمنىڭ ازىق-تۇلىك اكەپ بەرگەنىن سول كۇيى بىلمەي كەتەدى دەيدى. ريا بولماسىن دەپ رەتىن كەلتىرگەن ءتۇرى. ەڭبەكقورلىعى ءبىر بولەك جىر. بايى مەن كەدەيىنىڭ اراسى قاتتى اشىلماعان بىزدەگىدەي. بالاسىن كوپ تۋادى، سامساسىن شايىنا ەزىپ جەپ، سونى تاماق قىلىپ جۇرە بەرەدى، قوعامدىق سەنىمى قالىپتى. ءىجو-ءنىڭ 18 پايىزىن اۋىل شارۋاشىلىعىنداعى ديقاندارى مەن قويشىلارى بەرەدى، بىزدە ول 4 پايىز عانا. سونىڭ ەسەبىنەن بيدايدان باسقا ازىق-تۇلىگى، شىرىن-سۋى ءبىر باسىنا بىلاي جەتەدى. بىزدە اركىم بالاسىن بانكير يا اكىم قىلعىسى كەلسە، وندا شاعىن بيزنەسىن اشىپ، كاسىپكەر بولۋىن كوزدەتكىزەدى. سودان دا شاعىن جانە ورتا بيزنەسىنىڭ (گاستاربايتەرلەردىڭ اۋدارىمىن قوسا ەسەپتەگەندە) ەكونوميكاداعى ۇلەسى 50 پايىزداي، ال بىزدە 25 پايىزدىڭ توڭىرەگىندە. وسى قاسيەتتەر بىزدە قالدى ما؟

دەمەك، وزبەكتىڭ بىزدەن وزىپ بارا جاتقانىن تەك ءوزىمىز عانا كورمەي وتىرمىز. ودان Erlan Karin ايتپاقشى، باسەكەلەس كورۋدىڭ قاجەتى شامالى. قايتا ۇيرەنەيىك، ودان اسىپ ءتۇسۋدىڭ فەيسبۋكتە وتىرىپ "وسى سارت پا، سارت" دەپ مىسقىلداۋدان باسقا ءتۇرىن تابايىق! پەيىلىمىزدى تۇزەپ، كەڭ بولۋعا، ءبىر-بىرىمىزگە ودان ءارى جاقىنداپ، تانىستان دوس، دوستان باۋىر بولۋعا ۇمتىلۋعا نە كەدەرگى؟ ءوز ءۇيىمىزدى ءوزىمىز سالىپ، ءوز باقشامىزدى ءوزىمىز سۋارساق، ودان سورلى بولىپ قالمايتىنىمىز وزبەكشەلەگەندە "aniq".

P.S. قاراپايىم ادام نەگىزى 160 ءتۇس پەن رەڭكتى اجىراتا الادى. ال سۋرەتشى بولسا، 100 مىڭداي ءتۇس پەن ونىڭ رەڭكتەرىن اجىراتا الادى. ايىرماسىن كوردىڭىز بە، جەر مەن كوك! قىسقاسى، سۋرەتشى بولايىق، تەك قارا مەن قوڭىردى كورە بەرمەي. 

وركەن كەنجەبەك

Facebook-تەگى پاراقشاسىنان