برازيليانىڭ ريو-دە-جانەيرو قالاسىندا وتكەن وليمپيادا ويىندارى مارەگە جەتتى. 206 مەملەكەتتەن ۇزىن ىرعاسى 10 مىڭنان استام سپورتشى قاتىسقان باسەكەدە قازاقستان جالپى كوماندالىق ەسەپتە 22-ءشى ورىندى يەلەندى. لوندونداعىداي اسپاننان التىن جاۋدىرماساق تا، جالپى جۇلدە جونىنەن ەل رەكوردتىن جاڭالادىق. بۇعان دەيىن اتلانتادا 11, سيدنەيدە 7, افينىدا 8, پەكيندە 13, لوندوندا 13 مەدال ەنشىلەگەن بولاتىنبىز. بۇل جولى قورجىنعا 17 جۇلدە ءتۇستى: ءۇش التىن، بەس كۇمىس، توعىز قولا مەدال.

جەتىستىكتەرىمىز جەتەدى... اتتەگەن-ايىمىز دا از بولمادى

سوڭعى ايلاردا حالىقارالىق اۋىراتلەتيكا فەدەراتسياسى مەن حالىقارالىق وليمپيادا كوميتەتى قازاقستاندىق اۋىراتلەتتەردى دوپينگ قابىلدادى دەپ ايىپتاپ، ءبىزدىڭ زىلتەمىرشىلەردى جارىستان شەتتەتكەنى بەلگىلى. يليا يلين، جاسۇلان قىدىرباەۆ، الماس وتەشەۆ، ۆلاديمير سەدوۆ، مايا مانەزا، ءزۇلپيا شينشانلو، سۆەتلانا پودوبەدوۆا سەكىلدى اتلەتتەر اۋىر جازاعا كەسىلگەن سوڭ، باس باپكەر الەكسەي ءنيدىڭ باسى ۇلكەن داۋعا قالعان ەدى. دەسە دە، ريو تورىندە  قازاقتىڭ نار قىزى جازيرا جاپپارقۇل تۇڭعىش بولىپ كۇمىستەن القا تاقتى. ءسويتىپ ول قازاق قىزدارىنىڭ ىشىنەن شىققان تۇڭعىش وليمپيادا جۇلدەگەرى اتاندى. ارتىنشا لەگيونەر نيدجات راحيموۆ ءنيدىڭ باسىن داۋدان اراشالاپ ەل قورجىنىنا ريو التىنىن سالدى. نيدجاتتىڭ جەڭىسىن بالىق بالا بالاندين قايتالادى. بوكستان قازاقستان دانيار ەلەۋسىنوۆ ءۇشىنشى التىنمەن كۇللى قازاق جۇرتىن قۋانتتى. وسىلايشا قازاقستان ءانۇرانى ريو تورىندە ءۇش رەت شىرقالدى. دزيۋدوشى ەلدوس سمەتوۆ باستاعان «كۇمىسبەكتەر» دە نامىستى قولدان بەرمەدى. ادىلبەك پەن ءۆاسيليدى تورەشىلەر جىعىپ بەرمەگەندە بۇل ەكى وعلانىمىز دا التىندى الىپ تۇر ەدى-اۋ، امال كەم... حوش، كۇمىس تە جامان ناتيجە ەمەس. وتكەن وليمپيادانىڭ قولا جۇلدەگەرى گيۋزەل مانيۋروۆا بۇل جولى كۇمىستەن القا تاقتى. قولا جۇلدە العانداردىڭ قاتارىندا گالبادراح وتگونتسەتسەگ، فارحاد حاركي، كارينا گوريچەۆا، الەكساندر زايچيكوۆ، ولگا رىپاكوۆا، ەلميرا سىزدىقوۆا، ەكاتەرينا لاريونوۆا، يۆان دىچكو، داريعا شاكىموۆا بار.

وسىلايشا وليمپيادانى اياقتاعان قازاقستان قۇراماسىنداعى 104 سپورتشىنىڭ 17-ءى ەلىمىزگە ولجالى ورالدى.

ريوداعى رياسىز اقتالۋلار

برازيلياداعى باسەكەدە قيلى-قىزىق جايتتار از بولمادى. سونىمەن ريو-2016: نە كوردىك، نە بولدى، نە ەستە قالدى؟ ەندى وسى سۇراقتاردىڭ جاۋابىن تىزبەلەپ كورەيىك.

(قىتايلىق سپورتشى فۋ يۋانحۋاي)

«ەتەككىرىم كەلىپ قالدى...»

قىتايلىق ءجۇزۋشى قىز فۋ يۋانحۋاي 4ح100 مەترگە (ەستافەتا) جۇزۋدەن ءتورتىنشى ورىن الدى. «The Guardian» باسىلىمىنىڭ جازۋىنشا، جارىستى ءساتسىز اياقتاعان فۋ ءوزىنىڭ جەڭىلىپ قالۋى سەبەبىن مەنسترۋالدى  تسيكلدىڭ (ەتەككىر تسيكلى) كەلۋىمەن ءتۇسىندىرىپتى.

«مەن جارىستى ءساتتى اياقتادىم دەپ ايتا المايمىن. سەبەبى مەنىڭ ەتەككىرىم كەلىپ قالدى. بۇل جايتتىڭ اقتالۋىما سەبەپ بولا المايتىنىن بىلەمىن. ءوزىمدى ءوزىم ءبىرتۇرلى جاعىمسىز سەزىنىپ تۇرمىن»،-دەپتى يۋانحۋاي.

ستاتيستيكاعا سۇيەنسەك، قىتايدا  نازىك جاندىلاردىڭ 2 پايىز عانا «تامپون» قولدانادى ەكەن. ال پاكتىك تۋرالى اقپاراتتى اشىق جاريالاۋعا بولمايتىن كورىنەدى.

وليۆەيرا وت باستى

برازيليا ۇلتتىق قۇراماسىنداعى سينحروندى سۋعا سەكىرۋشى اتلەت قىزدار اراسىندا ورىن العان «سەكس-ساكندال» الەم حالقىنىڭ قىزۋ تالقىسىنا ءتۇستى.

سينحروندى تۇردە سۋعا سەكىرۋشى قوس قىزدىڭ ءبىرى – ينگريد وليۆەيرا ەسكەك ەسۋشى دجوۆانني پەدروس ەسىمدى اتلەتپەن جىنىستىق قاتىناسقا تۇسكەنى ءۇشىن ونىڭ ارىپتەسى برازيليا ۇلتتىق وليمپيادا كوميتەتىنە شاعىم ءتۇسىرىپتى.

ال اتالعان سايىستان بۇل جۇپ ەڭ سوڭعى ورىنعا تۇراقتاعان.

ايتا كەتەيىك، جىنىستىق قاتىناسقا تۇسەمىن دەپ باسى داۋعا قالعان ينگريد 2015 جىلى پانامەريكا ويىندارى كەزىندە جالاڭاش سۋرەتكە تۇسكەنى ءۇشىن سوگىس تە العان ەكەن.

(حيروكي وگيتا)

28 جاستاعى جاپون اتلەتى حيروكي وگيتا ريو وليمپياداسىندا ءوزىنىڭ اتالىق مۇشەسى ارقىلى كوزگە ءتۇستى. ول 5,3 مەتر بيىكتىكتى باعىندىرماق بولعان. الايدا جارىستى ءساتتى باستاعان حيروكيدى وليمپيادا مەدالىنەن ايىرعان ءوزىنىڭ قاساسى بولدى. ول 5,3 مەتر بيىكتىككە سەكىرگەن تۇستا جىنىس مۇشەسىمەن تاياقشانى قاعىپ تۇسىرگەن.

ەڭ سۇلۋ

ريو وليمپياداسىنداعى ەڭ سۇلۋ سپورتشى قىز – ماري-لوۋرەنس يۋنگفليايش دەن تانىلدى.

گەرمانيالىق سۋعا سەكىرۋشى اتلەت ماري-لوۋرەنس 1990 جىلى 7 قازاندا دۇنيەگە كەلگەن.

شۇرىق-تەسىك جولدار جانە جاراقاتتار

نيدەرلاندىق ۆەلوشاباندوز اننەميەك ۆان فلەۋتەن جارىس جولىنىڭ 9-شاقىرىمىندا ويىلىپ قالعان جولعا ءتۇسىپ، اۋىر دەنە جاراقاتىن الدى. اۋرۋحاناعا جەتكىزىلگەن ۆان فلەۋتەننىڭ باس سۇيەگى مەن بەل ومىرتقاسى سىنىپ كەتىپتى. 

33 جاستاعى ۆان فلەۋتەننىڭ تۇسكەن ويىعىنا اقش ۆەلوشاباندوزى مارپوي ەببوت تا ءۇرىندى.

ءدال وسىنداي شۇرىق-تەسىك جولدىڭ تاعى ءبىر قۇربانى – يتالياندىق شاباندوز ۆينچەنتسو نيبالي. ول شوسسەلىك جارىس كەزىندە اۋدارىلىپ كەتكەن.

فرانتسۋز جەڭىلاتلەتى سامير ايت سايد جارىس كەزىندە سول اياعىن سىندىرىپ الدى.

ال ارمانيالىق اۋىراتلەت اندريك كاراپەتيان 77 كەلى سالماق دارەجەسىندە 200 كەلىلىك زىلتەمىردى كوتەرۋ كەزىندە قالىن سىندىرىپ الدى.

نۇرگەلدى ابدىعانيۇلى

Abai.kz