ماسكەۋلىك ءمۇفتي البير قىرعانوۆ بىرنەشە جاعدايدا ايەلدەردىڭ دە سۇندەتتەلەتىنىن مالىمدەدى. ونىڭ سوزىنە سۇيەنسەك، بۇل ماسەلەدە ءار ادام ءوزى شەشىم قابىلدايدى. بۇل تۋرالى «stan.kz» پورتالى جازادى.

 «يسلام ءدىنى ايەلدەردىڭ سۇندەتتەلۋىنە تولىقتاي تىيىم سالماعان، كەي جاعدايلاردا وعان رۇقسات ەتىلەدى. بۇل قادامعا بارماس بۇرىن ايەل بالاسى سانالى تۇردە ءوزى شەشىم قابىلدايدى»، – دەدى ماسكەۋ جانە ورتالىق ايماقتىڭ ءمۇفتيى، رەسەي فەدەراتسياسىنىڭ ءدىني ەسترەميزمگە قارسى قوعامدىق پالاتاسى جۇمىس توبىنىڭ باسشىسى البير قىرعانوۆ.

بۇدان بۇرىن «زاڭدى باستاما» («پراۆوۆايا ينيتسياتيۆا») داعىستاننىڭ شالعاي ايماقتارىنداعى كەيبىر ەلدى-مەكەندەردە ءجاسوسپىرىم قىزداردىڭ جىنىس مۇشەسىنە حيرۋرگيالىق وتا جاسالعاندىعى جونىندە ەسەپ قۇجاتىن جاريالاعان بولاتىن.

سارسەنبى كۇنى رف قوعامدىق پالاتاسى وتباسىنى، بالا مەن انانى قولداۋ بويىنشا كوميسسيا توراعاسى ديانا گۋرتسكايا رف باس پروكۋررى يري چايكاعا بۇل اقپاراتتى تەكسەرۋ جونىندە ءوتىنىش جولدادى.

ال ءمۇفتيدىڭ ايتۋىنشا، قىز بالاسىن سۇندەتكە وتىرعىزۋدىڭ بىرنەشە ءتۇرى بار ەكەن. ول: «يسلام دىنىنە دەيىنگى ۋاقىتتا دا قولدانىلعان ادامشوشىرلىق تۇرلەرى دە بار، ول كەزدە سۇندەتتەۋدىڭ بۇل ءتۇرىن جازا رەتىندە قولداناتىن»، – دەيدى. وسى ورايدا ول، «فاراوندىق سۇندەتتەۋدى» مىسالعا كەلتىردى. ول كەزدە ادامنىڭ سىرتقى الەمگە كورىنىپ تۇراتىن جىنىستىق بەلگىلەرى الىنىپ تاستالادى ەكەن.

«جالپى مۇنداي ارەكەتتەرگە يسلام قاتاڭ تۇردە تىيىم سالادى. اللا جاراتقان دەنەڭدى وزگەرتۋگە مۇقتاجدىق بولماسا، وعان تيىسۋگە بولمايدى. مەنىڭشە، مۇنداي قادامعا بارۋعا ايەلدىڭ ءوزى، ال ەگەر قىز بالا بولسا، ونىڭ اتا-اناسى شەشىم قابىلداۋى ءتيىس»، –دەدى ءمۇفتي.

Abai.kz