كەشە ءوڭىر باسشىسى ب.اتامقۇلوۆتىڭ توراعالىعىمەن سەلەكتورلىق ءماجىلىس ءوتتى. بۇل تۋرالى  وقو اكىمىنىڭ ءباسپاسوز قىزمەتى حابارلايدى.

ءماجىلىستىڭ كۇن تارتىبىندە بۇگىنگى تاڭداعى وزەكتى 3 ماسەلە قارالدى. ولار جاڭا وقۋ جىلىنا دايىندىق بارىسى، «نۇرلى جول» ينفراقۇرىلىمدى دامىتۋدىڭ مەملەكەتتىك باعدارلاماسىنىڭ ىسكە اسىرىلۋى مەن بۇقارالىق سپورتتىڭ دامۋى تۋرالى.

جوعارىدا اتالعان ماسەلەر بويىنشا وبلىس اكىمى ءتيىستى سالا باسشىلارىنىڭ بايانداماسىن تىڭداپ، بىرقاتار تاپسىرمالاردى جۇكتەدى. ياعني اۋدان، قالا اكىمدەرىنە جاڭا 2016-2017 وقۋ جىلىنا دايىندىق بارىسىن پىسىقتاۋدى، «نۇرلى جول» باعدارلاماسى اياسىندا سالىنىپ جاتقان قۇرىلىس نىساندارىنىڭ ساپاسى مەن تاپسىرۋ مەرزىمىنە ءجىتى نازار اۋدارۋدى جۇكتەدى.

سونىمەن قاتار، ايماق باسشىسى بۇقارالىق سپورتتى دامىتۋ ماقساتىندا بيزنەستىڭ الەۋمەتتىك جاۋاپكەرشىلىگى اياسىندا وبلىس اۋماعىندا جىل باسىنان بەرى 28 سپورت الاڭشالارى سالىنىپ، پايدالانۋعا بەرىلگەنىن اتاپ ءوتىپ، بۇل باعىتتاعى جۇمىستاردى جانداندىرۋدى جانە قاراپايىم تۇرعىندارعا مەيلىنشە قولدان كەلەتىن مۇمكىندىكتەردى جاساۋ ءۇشىن ءاربىر كوپقاباتتى ۇيلەردىڭ اۋلاسىنا قاراپايىم سپورت قۇرىلعىلارى ورناتۋدى اۋدان، قالا اكىمدەرى مەن سالا باسشىلارىنا تاپسىردى.

جيىندى قورىتىندىلاعان وبلىس اكىمى كۇن تارتىبىندە قارالعان ءاربىر ماسەلەنى ءجىتى نازاردا ۇستايتىنىن ايتتى.

Abai.kz