16 تامىز سوزاق اۋدانى جاستارى كۇنى. بۇل كۇن 2001 جىلدان بەرى ءداستۇرلى تۇردە اتالىپ وتەدى.  بيىلعى جىلى اتاۋلى كۇن، شولاققورعاننىڭ ورتالىق الاڭىندا كەڭ كولەمدى تويلاندى. مەرەكەلىك كەشتە اۋدان اكىمى ماقسات يساەۆ جاستاردى قۇتتىقتادى. بۇل تۋرالى وڭتۇستىك قازاقستان وبلىسى، سوزاق اۋدانى اكىمىنىڭ ءباسپاسوز قىزمەتى حابارلايدى.

 «جاستار ءبىزدىڭ قوزعاۋشى كۇشىمىز. قاشاندا يگى ىستەردىڭ قاتارىندا جۇرەتىن جاندار. ءبىزدىڭ اۋداننىڭ جاستارى دا قاي سالادا بولماسىن وزدەرىن جاقسى قىرىنان تانىتىپ كەلەدى. ەل، اۋدان نامىسىن سىرت ەلدە تانىتىپ جۇرگەن جاستارمەن ماقتانامىز»- دەگەن سوزاق اۋدانى اكىمى ماقسات يساەۆ، ءوز سالاسىندا ۇزدىك ناتيجە كورسەتىپ جۇرگەن بىرنەشە جاستاردى العىس حاتتارمەن ماراپاتتادى.

سونداي-اق، اۋداندىق ارداگەرلەر كەڭەسىنىڭ توراعاسى ق. ەسپەنبەتوۆ پەن وبلىستان ارنايى كەلگەن   "جاستار ساياساتى ماسەلەلەرى" باسقارماسىنىڭ باس مامانى  ابدىكەرىم الماس اۋدان جاستارىنا قۇتتىقتاۋ لەبىزىن ءبىلدىردى.

اۋدان جاستارىنىڭ مەرەكەلىك كەشىندە مادەنيەت ءۇيىنىڭ قىزمەتكەرلەرىمەن  كوڭىلدى تاپقىرلار كلۋبىنىڭ «سوزاق سەرىلەرى» كومانداسى ونەرلەرىن كورسەتتى.

مەرەكەلىك كەش سوڭى وتشاشۋعا ۇلاسىپ، جاستاردىڭ بي كەشىنە جالعاستى.

ايتا كەتەيىك 12-تامىز حالىقارالىق جاستار كۇنى رەتىندە تويلانادى. بۇل كۇندى تويلاۋدى وڭتۇستىك حالقى داستۇرگە اينالدىرعان.

Abai.kz