ۋكراينالىق بارلاۋ مالىمەتى بويىنشا، رەسەي سۇڭگۋىر قايىقتاردى، جەلكەندى اسكەري كەمەلەردى، زىمىراندىق كاتەرلەردى كوپتەپ اكەلە باستادى. بۇل تەحنيكالار سوڭعى ۇلگىدەگى زىمىران كەشەندەرىن قولدانا الادى جانە اسكەري اۆياتسيانى كۇشەيتەدى. ولار قىرىمدا ورنالاسقاندىقتان، ۋكراينانىڭ بۇكىل اۋماعىنا سوققى جاساي الادى.

ۋكراينا قورعانىس مينيسترلىگىنىڭ باس بارلاۋ قىزمەتىندەگىلەر رەسەيدىڭ اشىق شابۋىل جاساۋ مۇمكىندىگىن جوققا شىعارمايدى جانە اسكەري تەحنيكالار مەن قارۋ-جاراقتاردىڭ كوشىرىلۋىن ءجىتى باقىلاپ وتىر، دەپ مالىمدەدى سكيبيتسكي.

سەيسەنبى كۇنى ۋكراينالىق بارلاۋ رەسەيدىڭ دونباسقا تاعى دا قارۋ جەتكىزگەنى تۋرالى حابارلادى، ولاردىڭ اراسىندا ت-64 تانكتەرى مەن بتر-لەر بار. بۇعان قوسا، گورلوۆكا اۋدانىندا ەكى رەسەيلىك راديولوكاتسيالىق بارلاۋ كەشەنى ورنالاستىرىلدى، دەلىنگەن حابارلامادا.

10 تامىزدا رەسەيدىڭ فەدەرالدىق قاۋىپسىزدىك قىزمەتى قىرىمدا تەراكتىنىڭ الدىن العانىن مالىمدەدى. ونى ۋكراينالىق بارلاۋ ۇيىمداستىرعان دەپ حابارلاندى. كيەۆ بۇل ايىپتاردىڭ بارلىعىن جوققا شىعارىپ، ونى رەسەيلىك ارنايى قىزمەتتىڭ ارانداتۋشىلىق ارەكەتى دەپ اتادى. ۋكراينا پرەزيدەنتى پەتر پوروشەنكو رەسەيمەن اننەكسيالانعان قىرىممەن شەكارادا اسكەري دايىندىقتى كۇشەيتۋدى تاپسىردى.