كەلەر جىلى استانادا ەكسپو-2017 حالىقارالىق كورمەسى وتەتىندىگى ءمالىم. حالىقارالىق كورمەگە كەلگەن قوناقتاردى وتىرار، تۇركىستان سەكىلدى كونە تاريحي قالالار قىزىقتىرماي قويماسى انىق. وسى ماقساتتا بۇگىن اۋدانىمىزعا دۇنيەجۇزىلىك بانكتىڭ كونسۋلتانتتارى شاوليان ۆانگ پەن ماتس اندەرسوندار ارنايى كەلدى. مارتەبەلى مەيمانداردى كۇتىپ العان اۋدان اكىمى ەرلان ايتاحانوۆ وتىرار مەملەكەتتىك ارحەولوگيالىق قورىق-مۇراجايى اۋماعىندا بوي كوتەرىپ جاتقان ءحى-ءحىى عاسىرلاردان سىر شەرتەتىن ەتنواۋىل كەشەنىمەن تانىستىردى.

قوناقتار كونە زامانداعى بابالارىمىزدىڭ تۇرمىسى مەن تىرشىلىگىنەن مول ماعۇلمات بەرەتىن جادىگەرلەردى ۇلكەن قىزىعۋشىلىقپەن تاماشالادى. مۇنان سوڭ ارىستانباب كەسەنەسىنە ات باسىن بۇرعان دۇنيەجۇزىلىك بانك وكىلدەرى بابا كەسەنەسىن ارالاپ، بابا كەسەنىسى توڭىرەگىن اباتتاندىرۋ، جاڭا قوناق ءۇي مەن مۇراجايدىڭ ەسكيزدىك جوبالارىمەن تانىستى. 

كونە ۇلى «جىبەك جولى» بويىندا ورنالاسقان ەجەلگى وتىرار قالاسىنىڭ توڭىرەگىندەگى «قۇيرىقتوبە»، «التىنتوبە»، «بەسىكتوبە»، «پىشاقشىتوبە»، «مىڭشۇقىر كەراميكالىق شەبەرحاناسى»، «ماردانتوبە»، «كۇيىكتوبە» سىندى جانە كونە قالاشىقتىڭ جانىنان تۋريستەرگە سەرۆيستىك قىزمەت كورسەتۋ كەشەنى جوباسى دا قوناقتاردى بەي-جاي قالدىرمادى. مەيمانداردى اسىرەسە وتىرارتوبەدەگى قالا قاقپاسى مەن كونە وتىرار قالاجۇرتىن تاماشالاۋ قاتتى قىزىقتىردى.

تۋريستەرگە قولايلى جاعدايلاردى قاراستىرۋ ماقساتىندا الداعى ۋاقىتتا اتقارىلار اۋقىمدى جۇمىستاردى ءسوز ەتكەن ەرلان قۋانىشۇلى ۇلكەن جوبالاردىڭ قوماقتى قارجى تالاپ ەتەتىندىگىن ەرەكشە اتاپ ءوتتى. تۇركىستانعا بەت العان مارتەبەلى مەيماندارعا ساتتىلىك تىلەي وتىرىپ، اۋدان باسشىسى يگىلىكتى رۋحاني ماڭىزى زور جوبالار دۇنيەجۇزىلىك بانك تاراپىنان قارجىلاي قولداۋ تاۋىپ جاتسا، تۋريزم وركەندەپ حالىقتىڭ رۋحاني بايلىعى دا ارتا تۇسەر ەدى، دەگەن ىزگى نيەتىن ءبىلدىردى.

Abai.kz