36 جاستاعى ينجەنەر-تەحنولوگ مەيرامبەك تۇرعانباەۆ التى جارىم جىلعا سوتتالىپ، مۇلكى تاركىلەنەتىن بولدى. تەمىرجولدىڭ بۇرىنعى جۇمىسشىسى 38 جاستاعى تولەباي ءماجيتوۆ جانە جۇمىسسىز 36 جاستاعى ەرعوجا امانعوجين الەۋمەتتىك جانە ءدىني ارازدىق تۋعىزدى دەپ ايتىپتالدى. سوت ولاردىڭ ارقايسىسىن سەگىز جىلعا سوتتاپ، مۇلكىن تاركىلەۋ تۋرالى ۇكىم شىعاردى.

سوت ماتەريالى بويىنشا، سوتتالعان ۇشەۋ WhatsApp مەسسەندجەرىندە كونفەرەنتسيا-چات اشىپ، قازاقستاندا تىيىم سالىنعان سايتتاردىڭ ماتەريالدارىن سىلتەمەلەرىمەن بولىسكەن كورىنەدى. تەرگەۋ مالىمەتىنە قاراعاندا، چاتتا 12 ادام تىركەلگەن بولسا، سولاردىڭ ۇشەۋى ەرەكشە بەلسەندىلىگىمەن نازارعا ىلىككەن. ءماجيتوۆ «ۆكونتاكتە» الەۋمەتتىك جەلىسىندە ارنايى پاراقشا اشقان.

سوتتالۋشىلاردىڭ ادۆوكاتتارى راۋشان ىزتىلەۋوۆا مەن باۋىرجان ەرمانوۆ سوت ۇكىمىمەن كەلىسپەيتىندەرىن، ۇكىمگە قارسى شاعىم جاسايتىندارىن  ايتتى. قورعاۋشىلاردىڭ پىكىرىنە سۇيەنسەك، سۋديا سوتتالۋشىلارعا تىم ۇزاق جازا شىعارىپ وتىر. اقتوبەدە 5 ماۋسىمدا بولعان شابۋىلدى قازاق بيلىگى "تەراكت" دەپ اتاعان ەدى.

Abai.kz