ورتالىق بيلىكتىڭ بار كۇش-قۋاتى ايماقتاردا. ال، ايماقتاردى باسقارىپ وتىرعان اكىمدەردىڭ ساۋاتتى ءارى وڭ جۇمىستارى ەلدىڭ جالپى دامۋىنا ۇلەس. قاي وبلىس اكىمىنىڭ قانداي جۇمىس اتقارىپ، ول قالاي قابىلدانىپ، باعالانىپ، نەندەي ناتيجە بەرىپ جاتقانىن «ساياسات-Monitoring» ايماق باسشىلارى اراسىندا  جاساعان رەيتينگىندە كورسەتىپتى. رەيتينگتى sayasat.kz جاريالاپتى. كوش باسىندا قىزىلوردا وبلىسىنىڭ اكىمى قىرىمبەك كوشەرباەۆ تۇر.

شىلدە ايىنداعى وبلىس اكىمدەرى رەيتينگىن تۇزۋگە قاتىسقان ساياساتتانۋشىلار، جۋرناليستتەر، بلوگەرلەر، پوليتتەحنولوگتار كوشەرباەۆتىڭ كوش باستاۋى ايماقتاعى جەر ماسەلەسىنە قاتىستى بولدى دەپتى. ول نە دەسەڭىز، قىرىمبەك ەلەۋۇلى جەر ماسەلەسى ساياسي رەڭك الىپ، قوعام مەن بيلىكتى الاڭداتىپ وتىرعان شاقتا، شىلدە ايىندا ينجەنەرلىك ينفراقۇرىلىمى تولىق جۇرگىزىلگەن، اۋماعى 980 گەكتاردى قۇرايتىن جاڭا «بايتەرەك» اۋدانىن اشىپ، جەكە تۇرعىن ءۇي سالۋ ءۇشىن 6600 ازاماتقا جەر تەلىمىن بەردى. رەيتينگكە قاتىسقاندار كوشەرباەۆتىڭ وسى ارەكەتى بيلىكتىڭ جەر ماسەلەسىنە قاتىستى قوعاممەن اراداعى جاعدايىنا وڭ ناتيجە بەردى دەپ باعالاپتى. قىزىلوردا اكىمى الەۋمەتتىك-ەكونوميكالىق ماسەلەدە جاڭا اۋدان اشىپ، جەر تەلىمدەرىن عانا بەرۋمەن شەكتەلمەي، قىزىلوردا قالاسى تيتوۆ ىقشام اۋدانىندا 60 جاس وتباسىنا جاڭا پاتەردىڭ كىلتىن تاپسىرىپ، جاعدايى تومەن 200 وتباسىعا كاسىپكەرلەردىڭ دەمەۋشىلىگىمەن ازىق-تۇلىك تاراتىپ، 60 پاتەرلىك جاڭا ءۇيدىڭ ىرگەتاسىن قالادى. مىنە، نە دەسەڭىزدە قاراپايىم حالىققا ەڭ كەرەكتى دۇنيەلەردى ىسكە اسىرعان كوشەرباەۆتىڭ رەيتينگتەگى ءبىرىنشى ورىنى  دۇرىس باعالانعانىنا يلاناسىز.

رەيتينگتە ەكىنشى ورىندى الماتى قالاسى اكىمى باۋىرجان بايبەك يلەنەنىپتى. ساراپشىلار بايبەكتىڭ ەكىنشى ورىن الۋىن ونىڭ پرەزيدەنتكە جاقىندىعىمەن ءتۇسىندىرىپتى. الماتىعا اكىم بولىپ تاعايىندالعاننان بەرى بايبەكتىڭ ءار جۇمىسى پرەزيدەنتتىڭ نازارىندا ەكەنىن ايتقان ساراپشىلار الماتىداعى تەراكت كەزىندە دە اقتوبە بارماعان ىشكى ىستەر ءمينيسترى ق.قاسىموۆتىڭ الماتىعا كەلۋىن دە بايبەكتىڭ ورتالىق بيلىكتىڭ الدىنداعى سالماعى دەپ باعالايدى ەكەن. ءوزىن پرەزيدەنت الدىندا جاقسى شاكىرت رەتىندە كورسەتىپ جۇرگەن بايبەكتى رەيتينگ تۇزۋشىلەر ەكىنشى ورىنعا لايىق دەپ تاۋىپتى.

ءۇشىنشى ورىندا استانا اكىمى اسەت يسەكەشەۆ. يسەكەشەۆتىڭ استانا قالاسى اكىمى بولىپ تاعايىندالعانىنا كوپ ۋاقىت  وتكەن جوق. الايدا، بازارعا بارىپ، ازى-تۇلىك باعاسىن كورىپ، اۋەجايدا بوي كورسەتكەن استانا اكىمى وسى بەلسەندىلىگىمەن كوزگە ءتۇسىپ، ۇزدىك ۇشتىككە كىرىپتى. ساراپشىلار «بولاشاعىنان ءۇمىت كۇتتىرەتىن اكىم» دەپ باعالاپ، الداعى ۋاقىتتا دا يسەكەشەۆ ۇزدىكتەر قاتارىنان كورىنەدى دەپ بولجاپتى.

مىنە، شىلدە ايىنداعى اكىمدەر رەيتينگى وسىنداي.

نۇرا ماتاي

Abai.kz