شىمكەنتتە جول سالىنباعان تۇرعىن ءۇي الاپتارى ءالى بارشىلىق. جاۋىن-شاشىن جاۋا قالسا، ۇلكەندەردىڭ جۇمىسقا، بالالاردىڭ مەكتەپكە بارۋى مۇڭ. ال اۋىرساق، ۇيىمىزگە جەدەل جاردەم دە كەلمەيدى دەپ ناليدى جەرلەستەرىمىز.

ال قالا اكىمدىگىنىڭ ماماندارى قۇرىلىستىڭ ءالى باستالمايتىنىن ايتادى. قاراباستاۋ ەلدىمەكەنىنە قاراستى زامانا كوشەسىنىڭ تۇرعىندارىنىڭ جۇيكەسىن جۇقارتقان — وسى جولدىڭ ءجايى. جازدىگۇنى شاڭ جۇتىپ، كوكتەم مەن كۇزدەگى جاۋىن-شاشىندا باتپاققا باتامىز. ال لايعا باتقان مەكتەپ وقۋشىلارىن قوعامدىق كولىكتەر مىنگىزبەي تاستاپ كەتەدى دەپ، تۇرعىندار زار يلەپ وتىر.
ساعىنبەك نوعاەۆ، قاراباستاۋ تۇرعىن الابى، زامانا كوشەسىنىڭ تۇرعىنى: «جىل سايىن اكىم كەلىپ، قاتىرامىز دەيدى. مىنە، ءتورت جىل بولدى — «كوكتەم شىقسا جوندەيمىز» دەپ ۋادە بەرگەنىنە. جىلدا ءوزىمىزدىڭ كۇشىمىزبەن جوندەيمىز، امالداپ قىستان شىعامىز. بىرنەشە رەت جەر لاي-باتپاق بولىپ جاتقاندا شاقىرعانبىز اكىمدى، جاعدايىمىزدى كورىپ تۇرىپ ءبىر ناتيجە شىعارار ەمەس.»

وسى ءۋاجىن تۇرعىندار جەرگىلىكتى اكىمدىكتىڭ جاۋاپتى ماماندارىنا ايتىپ كەلە جاتقانىنا 4 جىل بولىپتى. 2007 جىلى قالا اۋماعىنا ەنگەن تۇرعىن ءۇي الابىنا ءجول توسەگەندەر ءدال وسى كوشەنى اينالىپ ءوتىپتى. سول ۋاقىتتا شەنەۋنىكتەر جولدى سالىپ بەرۋگە ۋادە ەتكەن. الايدا، ناتيجە جوق دەيدى.

باعيلا تاڭىربەرگەنوۆا، قاراباستاۋ تۇرعىن الابى، زامانا كوشەسىنىڭ تۇرعىنى: «بيىلعى اقپان ايىندا ەڭبەكشى اۋدان اكىمىنىڭ ورىنباسارى كەلىپ، «قىركۇيەككە دەيىن جول سالدىرىپ بەرەمىن» دەپ، ۋادە بەرىپ كەتكەن ەدى. مىنە، سودان كەيىن اكىمنىڭ ءوزىن دە، ونىڭ ورىنباسارىن دا كورگەن جوقپىز. ال اقشانىڭ ءبارى «نۇرساتكە كەتتى» دەپ كەلەدى.

قالا اكىمدىگىنىڭ جاۋاپتى ءبولىم باسشىلارى ماسەلەنىڭ جاقىن ارادا شەشىلمەيتىنىن بىردەن ايتتى. بۇل كوشەنىڭ، ءتىپتى، جوبالىق-سمەتالىق قۇجاتى دا ازىرلەنبەگەن. 2020 جىلعا دەيىن اياقتالۋى ءتيىس تىرلىك كەزەگىمەن ىسكە اسادى دەپ وتىر.

اباي تۇرحانوۆ، جولاۋشىلار كولىگى جانە اۆتوموبيل جولدار ءبولىمىنىڭ سەكتور مەڭگەرۋشىسى: «قازىر زامانا كوشەسىنە جوبالىق -سمەتالىق قۇجاتتار ازىرلەنىپ جاتىر. بيىل ول دايىن بولسا، مەملەكەتتىك ساراپتامادان وتكىزىلەدى. ەگەر وڭ قورىتىندى بەرسە، 2017-2018 جىلدىڭ بيۋدجەتتەرىنە ۇسىنىس ەنگىزەمىز.

ءسويتىپ، قاراباستاۋلىقتار لاي مەن شاڭنان ازىرگە كوز اشا المايتىن ءتۇرى بار. ال وزدەرى جولدى سالعىزباي قويمايمىز دەپ بەلسەنىپ وتىر.

Abai.kz