قازاقستاندىق اۋىر اتلەت نيجات راقىموۆ ريودا ءوتىپ جاتقان وليمپيادا ويىندارىنىڭ چەمپيونى اتانىپ، ەل قورجىنىنا العاشقى التىن مەدالدى سالدى.  

ال اۋىر اتلەتيكادان قازاقستان قۇراماسىنىڭ باس باپكەرى الەكسەي ني راقىموۆتىڭ جەڭىسىنەن كەيىن باق-قا سۇحبات بەرىپ، ءوزىنىڭ بۇل جولعى تاكتيكالىق ويىنىنىڭ سىرىن ءبولىستى.

ء«بىرىنشى سايىستان كەيىن ءبىز قىتايلىق اتلەتتەن 12 كەلى، ارميان سپورتشىسىنان 9 كەلى ارتتا قالىپ قويدىق. ءبارى ءبىزدى توپەلەپ، تىرىدەي جەرلەي باستادى. ال ءبىز سەرپە كوتەرۋدە بار بولعانى 202 كەلى كوتەرگەن بولىپ قويدىق. قارسىلاستارىمىز دا ءبىزدىڭ شامامىز وسىعان عانا جەتەدى دەپ ويلادى. ءسويتىپ، قىتايلىق ەركىنسىپ، ءوزىن چەمپيون سەزىنە باستادى. ال ءبىز سول كەزدە بىردەن 12 كەلى قوسىپ، 214 كەلىنى اسپانعا ءبىر-اق اتتىق. ەشكىم بىزدەن مۇندايدى كۇتكەن جوق»،-دەيدى ني.

ونىڭ ايتۋىنشا، راقىموۆپەن مۇنداي تاۋەكەلگە قورىقپاستان بارۋعا بولادى. ء«دال وسىنداي ەكى سپورتشىمىز بولعان. ونىڭ ءبىرى 205 كەلىنى كوتەرىپ قويىپ، بىردەن 225 كەلىنى كوتەرىپ سەنساتسيا جاساعان اناتولي حراپاتىي بولسا، ەكىنشىسى يليا يلين. مۇنداي جىگىتتەرمەن جۇمىس ىستەگەن دە جاقسى عوي. نە ىستەسەڭ دە ءوزىڭ بىلەسىڭ جانە قارسىلاستارىڭ دىرىلدەپ وتىرادى. ەشكىم بىردەن 12 كەلى قوسىپ، الەم رەكوردىن 4 كەلىگە جاڭارتىپ كورگەن جوق. بۇل ءبىرىنشى مارتە بولىپ وتىر. ال ءۇشىنشى مۇمكىندىككە شىققانىمىز جوق. ونىڭ كەرەگى دە جوق ەدى. بىزدە باسقا جول دا بولمادى. قايتەمىن ەندى. مەن ءبىر التىن، ءبىر كۇمىس  ۋادە ەتتىم عوي»،-دەدى الەكسەي ني.

سونىمەن قاتار، باس باپكەر ني اتالعان وليمپيادادا تاعى ەكى التىن الۋعا ۋادە بەردى.

ال اۋىر اتلەتيكادان ايەلدەر اراسىنداعى سىندا قازاقستاندىق اۋىر اتلەت جازيرا جاپارقۇل 69 كەلى سالماق دارەجەسىندە وليمپيادانىڭ كۇمىس جۇلدەگەرى اتاندى. 

ول قوس سايىس ەسەبى بويىنشا 259 كەلىنى كوتەرىپ، قازاقستان قورجىنىنا ەكىنشى كۇمىس مەدەلدى سالدى.

بۇل سالماق دارەجەسىندە وليمپيادا التىنى قىتايلىق اتلەتكە بۇيىردى. ياڭمەي قوس سايىس بويىنشا 261 كەلىنى كوتەرگەن. ال وليمپيادانىڭ قولا مەدەلىن 18 جاستاعى مىسىر سپورتشىسى ساراح احماد ەنشىلەدى. ساراح بارلىعى 255 كەلىنى كوتەرگەن.

ءسويتىپ، جازيرا جاپارقۇل سپورتتىڭ وسى تۇرىندە وليمپيادا تۇعىرىنا كوتەرىلگەن تۇڭعىش قازاق قىزى اتاندى.

نۇرزات توعجان

Abai.kz