حابارلارعا قاراعاندا، ۋنيۆەرسيتەت ستۋدەنتتەرى ەلدەگى باسقا دا جوعارعى وقۋ ورىندارىنا اۋىستىرىلعان. وقۋ مەكەمەسىنىڭ جابىلۋ سەبەبى تۋرالى ەشتەمە ايتىلمادى. جىل سايىن تۇركىمەن-تۇرىك ۋنيۆەرسيتەتى 200-دەن استام ستۋدەنت قابىلداپ كەلگەن.

ۋنيۆەرسيتەت 1993 جىلى قۇرىلىپ، ءبىر جىلدان سوڭ جۇمىس ىستەي باستادى. 2013 جىلى مامىردا تۇركىمەنستان جانە تۇركيا پرەزيدەنتتەرى ۋنيۆەرسيتەتتىڭ 3 مىڭ ادامعا ارنالعان جاڭا عيماراتىنىڭ ىرگەتاسىن قالادى.

16 شىلدەدە تۇركيادا ءساتسىز اسكەري توڭكەرىستەن سوڭ ەل پرەزيدەنتى رەجەپ تايىپ ەردوعان بۇلىكتى ءدىن ۋاعىزداۋشى فەتحۋللاح گۇلەن ۇيىمداستىردى دەپ مالىمدەدى. 1999 جىلدان بەرى قۇراما شتاتتاردى پانالاپ جۇرگەن گۇلەننىڭ "قىزمەت" قوزعالىسى 2016 جىلى مامىردا تۇركيادا تەررورلىق ۇيىم دەپ جاريالاندى.

تۇركيا بيلىگى "قىزمەت" قوزعالىسىنىڭ ميلليونداعان جاقتاستارى بار جانە الەمنىڭ 150 ەلىندە مىڭداعان ءبىلىم مەكەمەلەرىن قارجىلاندىرادى دەپ ەسەپتەيدى. رەسمي انكارا باسقا دا ەلدەردى گۇلەنمەن بايلانىسى بار ءبىلىم مەكەمەلەرىن جابۋعا شاقىردى.

Abai.kz