قازاقستان رەسپۋبليكاسى پرەزيدەنتى اكىمشىلىگىنىڭ كەلىسىمى جانە سارىاعاش اۋداندىق ءماسليحاتىنىڭ كەلىسىمى بويىنشا وڭتۇستىك قازاقستان وبلىسى اكىمىنىڭ وكىمىمەن سارىاعاش اۋدانىنىڭ اكىمى بولىپ قايرات امانكەلدىۇلى ابدۋاليەۆ تاعايىندالدى. بۇل تۋرالى وقو اكىمىنىڭ ءباسپاسوز قىزمەتى حابارلايدى.

ق.ا.ابدۋاليەۆ 1968 جىلى تۋىلعان، ءبىلىمى جوعارى، عالىم اگرونوم، زاڭگەر.

ەڭبەك جولىن 1986 جىلى تۇلكىباس اۋدانى كيروۆ اتىنداعى كولحوزىنىڭ «التىن اراي» جاستار كومسومول بريگاداسىنىڭ شوپانى رەتىندە باستاعان.

مەملەكەتتىك قىزمەتتى وتكەرۋدى 1999 جىلى تۇلكىباس اۋدانى اكىمى اپپاراتى ايماقتىق دامۋ جانە كادرلارمەن جۇمىس ءبولىمىنىڭ باس مامانى لاۋازىمىندا باستاعان. 2001-2004 جىلدارى وڭتۇستىك قازاقستان وبلىسى جەر رەسۋرستارىن باسقارۋ جونىندەگى كوميتەتى تۇلكىباس اۋدانىنىڭ وكىلى-باس مامانى جانە توراعاسى لاۋازىمىن اتقاردى. 2004-2010 جىلدارى ارالىعى قر اشم تۇلكىباس اۋداندىق اۋماقتىق باسقارماسىنىڭ باستىعى، وسىمدىكتەر كارانتينى جونىندەگى مەملەكەتتىك ينسپەكتسيا ءبولىمىنىڭ باستىعى، ينسپەكتسيا باستىعىنىڭ ورىنباسارى جانە باستىعى قىزمەتتەرىن اتقارعان.

2010 جىلدىڭ ناۋرىز ايىنان باستاپ وڭتۇستىك قازاقستان وبلىسى تۇلكىباس اۋدانىنىڭ اكىمى لاۋازىمىن اتقارىپ كەلەدى.

سارىاعاش اۋدانىن وسى ۋاقىتقا دەيىن باسقارىپ كەلگەن ب.پارمانوۆ باسقا قىزمەتكە اۋىسۋىنا بايلانىستى قىزمەتىنەن بوساتىلدى. 

Abai.kz