ەلباسىمىز نۇرسۇلتان ءابىشۇلى نازارباەۆ ءوزىنىڭ ء«بىر ماقسات، ءبىر مۇددە، ءبىر بولاشاق» اتتى جولداۋىندا: «مۇمكىندىگى شەكتەۋلى ازاماتتارىمىزعا كوبىرەك كوڭىل ءبولۋ كەرەك. ولار ءۇشىن قازاقستان كەدەرگىسىز ايماققا اينالۋعا ءتيىس. بىزدە ونداي ادامدارعا قامقورلىق كورسەتىلۋگە ءتيىس – بۇل ءوزىمىزدىڭ جانە قوعام الدىنداعى ءبىزدىڭ پارىزىمىز. بۇكىل الەم وسىمەن اينالىسادى. ءبىز ولاردى بەلسەندى ومىرگە تارتامىز، ولار تەك جاردەماقى الىپ قانا قويمايدى، سونىمەن بىرگە، وزدەرىن قوعامنىڭ مۇشەسى، پايدالى ەڭبەككەر رەتىندە سەزىنەتىن بولادى. ءبىزدىڭ بارلىق الەۋمەتتىك ينستيتۋتتار، ۇكىمەتتىك ەمەس ۇيىمدار، «نۇر وتان» پارتياسى وسى جۇمىستى قولعا العاندارى ءجون. ەگەر قاجەت بولعان جاعدايدا ۇكىمەت بۇل ماسەلەنى بارلىق كومپانيالارمەن بىرلەسە پىسىقتاپ، ءتيىستى شەشىم قابىلداۋى كەرەك»، – دەپ اتاپ كورسەتكەن ەدى.

وسى ماقساتتا، «اسار» وڭتۇستىك قازاقستان مۇگەدەكتەر قوعامى» قوعامدىق بىرلەستىگى سوزاق اۋداندىق فيليالىنىڭ ۇيىمداستىرۋىمەن اۋدانىمىزدا مۇگەدەكتەردى تاسىمالداۋ (ينۆاتاكسي) قىزمەتى تامىز ايىنان باستاپ ءوز جۇمىسىنا كىرىستى. ينۆاتاكسي قىزمەتى ءى توپتاعى، بالا جاستان مۇمكىندىگى شەكتەۋلى، ءجۇرىپ-تۇرۋى قيىن، اربادا وتىراتىن جاندارعا جۇمىس ورنى، وقيتىن ورنى، ۋاكىلەتتى جانە ورىنداۋشى ورگاندار، سوت، پروكۋراتۋرا جانە دە الەۋمەتتىك سالالار وبەكتىلەرى، ادىلەت باسقارماسى، نوتاريۋس، مەديتسينالىق مەكەمەلەر، اۆتوۆوكزال، سونداي- اق، ارنايى مەملەكەتتىك قىزمەت كورسەتەتىن مەكەمەلەر باعىتتارى بويىنشا قىزمەتىن ۇسىنۋدا.

قازىرگى تاڭدا اۋدان اكىمىنىڭ باستاماسىمەن مۇگەدەكتەر قوعامىنا بەرىلگەن عيماراتتان 2 بولمە بەرىلىپ، جۇمىس جولعا قويىلدى. اتاپ ايتساق، بىزگە ءوتىنىش جازىپ، قۇجات وتكىزگەن مۇمكىندىگى شەكتەۋلى ءى توپتاعى ازاماتتار سانى 15-كە جۋىقتادى. ولار اتالمىش قىزمەتتى ءبىر كۇن بۇرىن تاپسىرىس بەرىپ، جوعارىدا اتالعان باعىتتار بويىنشا كۇنىنە بىرنەشە رەت پايدالانا الادى. تىركەلگەن ازاماتتاردىڭ اتاعان باعىتتارى بويىنشا ارنايى جول پاراعى تولتىرىلىپ، ينۆاتاكسي قىزمەتىن پايدالانعانى جايىندا دالەلدەمە رەتىندە قول قويادى. وسى قىزمەت ارقىلى جۇمىسسىز مۇمكىندىگى شەكتەۋلى 5 ازامات جۇمىسپەن قامتاماسىز ەتىلدى. اتاپ ايتساق، ينۆاتاكسي قىزمەتىنىڭ جاۋاپتى جەتەكشىسى، 2 ديسپەتچەر، اۆتوكولىك جۇرگىزۋشىسى جانە ەدەن جۋشى قىزمەت ەتەدى. اۋدان باسشىلىعى تاراپىنان مۇمكىندىگى شەكتەۋلى جاندارعا دەگەن قامقورلىعىنىڭ ءبىر پاراسى وسىنداي. ولار قاي كەزدە، قاي جاققا بارامىن دەسە دە كولىگى دايىن.

Abai.kz