بۇگىن وبلىستىق بەينەلەۋ ونەرى مۋزەيىندە قر ۇلتتىق مۋزەيىنىڭ باستاۋىمەن قر تاۋەلسىزدىكتىڭ 25 جىلدىعىنا وراي «ۇلتتىق مۋزەي سەنىڭ قالاڭدا» اتتى مادەني تۋر وتۋدە. كورمە اشىلعاننان باستاپ قازىرگى ۋاقىتقا دەيىن 1000-نان استام كەلۋشىنىڭ كوز قۋانىشىنا اينالعان «التىن ادام» جادىگەرىن تاماشالاۋشىلار سانى ساعات سايىن كوبەيىپ جاتىر.

مادەني ساياحات وسى ۋاقىتقا دەيىن ورال، اقتوبە، اتىراۋ، اقتاۋ قالالارىندا جالعاسىن تاپقان بولاتىن. تىڭ جوباعا قىزىعۋشىلىق تانىتقاندار قاتارى كوپ بولدى. قازىرگى كەزدە وزگە دە قالالارداعى ونەرسۇيەر كورەرمەن مادەني تۋردىڭ باسقا وڭىرلەردە جالعاسۋىنا ءوتىنىش بىلدىرۋدە. 

مادەني ساياحاتتىڭ ءبىر ماڭىزدى تۇسى –قازاقستان رەسپۋبليكاسىنىڭ برەندىنە اينالعان «التىن ادام» جادىگەرى بارلىق وبلىستار مەن قالالاردى ارالايدى. اۋقىمدى تۋردىڭ باستى ەرەكشەلىگى - تەك مۋزەي تورىندە عانا تۇراتىن باعالى مۇرامەن وزگە ءوڭىر تۇرعىندارىنىڭ دا جاقىنىراق تانىسىپ، ءتۇسىنىپ، زەردەلەۋىنە جول اشۋ. 

«الەمگە تانىمال «التىن ادام» ارتەفاكتىسى مۋزەيدىڭ بەتكە ۇستار جادىگەرى بولاتىنىنا كۇماندانبايمىن»،- دەگەن بولاتىن ەلباسى ن.نازارباەۆ. التىن ادام – قازاقستاننىڭ ەڭ قۇندى جادىگەرى، ەلدىگىمىزدىڭ باستى سيمۆولى. 

ءىس-شارا بارىسىندا كورەرمەن قاۋىم نازارىنا «ۇلتتىق مۋزەيگە ساياحات» اتتى بەينەروليك ۇسىنىلدى. شاراعا زيالى قاۋىم وكىلدەرى، مۋزەي ءىسىنىڭ ماماندارى، بەلگىلى قالا مەن وبلىسقا قاتىستى تۇلعالار قاتىسىپ، ءوز ويلارىمەن ءبولىستى. وتانى¬مىزدىڭ باي تاريحىن تۇگەندەۋ، باياندى ءداستۇرىن تانىستىرۋ، كونەنى كوزدىڭ قاراشىعىنداي ساقتاۋ بارشا حالىقتىڭ مىندەتى. اتالمىش ىرگەلى جوبا ەلىمىزدىڭ بارلىق ايماعىن قامتىماق. 

ايتا كەتەيىك، ساعات 10:00-دە سالتاناتتى تۇردە اشىلعان كورمە تۇنگى ساعات 24:00-گە دەيىن حالىق نازارىنا ۇسىنىلماق.

قازاق ەلىن الەمگە ايگىلى ەتكەن ەسىك قورىمىنان تابىلعان 4000-نان استام التىن اشەكەيلەردەن قۇرالعان «التىن ادام» تاريحىمىزدىڭ ماقتانىشى، باعا جەتپەس مۇرامىز. 

التىن ادام ءۇش بولىكتەن تۇرادى: باس كيىمى، كەۋدە كيىمى، تومەنگى بولىگى. اشەكەيلەر بارىس، بۇلان، تاۋتەكە، ارقار، ات، ءتۇرلى قۇس بەينەلەرىن بەرەتىن «اڭ ستيلىندە» جاسالعان. باس كيىمى كەيىنگى قازاق كيىمى ۇلگىلەرىنە ۇقساس، بيىك، شوشاق توبەلى، ۇزىندىعى 70 سم شاماسىندا. موينىندا دوڭگەلەك جۇزىك سياقتى التىن القا، ءىش كويلەگى، كوكىرەگىنىڭ تۇسى، جەڭى التىن توعالارمەن ورنەكتەلگەن، كامزولى قۇراستىرمالى اۋىر بەلبەۋمەن بۋىلعان. بەلبەۋگە اڭعا ۇقساس بەينەلەر 16 توعا جاپسىرىلعان، وڭ جاعىندا قىزىل قىناپتى ۇزىن سەمسەر، سول جاعىندا التىن پلاستينالار جاپسىرىلعان قىنعا سالىنعان تەمىر قانجار-اقيناق بار. شالبار بالاعىدا التىن توعالارمەن اشەكەيلەنگەن.

Abai.kz