سوڭعى ايلاردا ەل ىشىندە ورىن العان شەتىن وقيعالارعا قاتىستى الەۋمەتتىك جەلىلەر مەن باق-تى قىزۋ تالقى ءجۇرىپ جاتقانى بەلگىلى. ءداستۇرلى ەمەس ءدىني-راديكالدى ۇيىمدار سويقان سالىپ، ايدىڭ كۇنى امانىندا اقتوبە مەن الماتى قالالارىندا اتىس جاسادى.  اقتوبەدەگى قارۋلى قاقتىعىس كەزىندە 7 ادام قازا تاپتى. ال الماتىدا اينالاسى 25 مينۋتتىڭ ىشىندە جالعىزىلىك سودىر سەگىز ادامنىڭ ءومىرىن قيدى.

قۇزىرلى ورگاندار قىلمىسكەرلەردى قۇرىقتاعانىمەن، راديكالداردىڭ تارالۋ وشاقتارىن، تەراكتىلەردىڭ الدىن الۋ جۇمىستارىنا كەلگەندە قاۋقارسىزدىق تانىتىپ جاتقانى دا جاسىرىن ەمەس.

وسىعان قاتىستى ءدىني سەكتالاردىڭ ەركىن ۋاعىز ناسيحات جۇرگىزىپ جاتقانىن سىناپ، قازاقستاننىڭ مۇسىلماندار ءدىني باسقارماسىن ايىپتاعاندار دا بولدى.

جاقىندا بەلگىلى ءدىن ۋاعىزداۋشىسى، قمدب وكىلى ەرسىن امىرە «فەيسبۋك» جەلىسىندەگى پاراقشاسىندا پىكىر ءبىلدىرىپ، اتالمىش پروبلەمالاردى شەشۋدە جالعىز قمدب-نىڭ قاۋقارسىز ەكەنىن ايتىپتى.

«كىم كورىنگەندى ەلگە كىرگىزە بەرىڭدەر. ولار ويلارىنا كەلگەن ۋاعىز-ناسيحاتىن ەمىن-ەركىن جۇرگىزە بەرسىن. ينتەرنەتتە سايتتارى سايراي بەرسىن. ول جەتپەگەندەي سەكتانتتاردى وڭالتۋ جۇمىستارىنا ارالاستىرايىق. جىلىنا 40-50 ستۋدەنت جات اعىمنىڭ تاعىلىمىن ۇيرەنىپ كەلىپ ەلدە تاراتۋ ءۇشىن مəدينا قالاسىنداعى يسلام ۋنيۆەرسيتەتىنە ەمىن-ەركىن تۇسە بەرسىن. ەلدە جۇرگەن ۋاعىزشىلارى كافەلەردە، پəتەرلەردە ساباقتارىن جۇرگىزە بەرسىن. وسى ايتىلعانداردىڭ الدىن الۋدا، تىيىم سالۋدا قمدب-دا قانداي əلەۋەت بار؟ سوندا دا اتالمىش پروبلەمالاردى شەشۋ جولدارىنىڭ تەتىكتەرى قولدارىندا بولعاندار كىنəلى بولمايدى دا، ورنىنا قمدب كىنəلى بولا ما؟»،-دەيدى ەرسىن امىرە.

الماتىداعى شەتىن وقيعادان كەيىن الەۋمەتتىك جەلىلەر مەن بىرقاتار باق-تا قازاقستاننىڭ باس ءمۇفتيىن  رەسەيدىڭ جوعارعى پاتريارحى كيريللمەن سالىستىرعان بولاتىن.

«باس ءمۇفتيدى كيريللمەن سالىستارىپتى. كيريلل رەسەي پرەزيدەنتى قاتىساتىن جيىنداردا ءبىرىنشى قاتاردىڭ قاق ورتاسىندا جارقىراپ وتىرادى. گاينۋدديندەرمەن 20-30- قاتارلاردا وتىرمايدى. ءبىزدىڭ ەلدە قازاقستان حالقىنىڭ 70-75 پايىزى ۇستاناتىن اتا ءدىنىمىزدىڭ وكىلى، باس ءمۇفتي ەلىمىزدە ەرۋشىلەرىنىڭ سانى ەكى مىڭعا جەتپەيتىن ءدىن وكىلدەرىمەن ءبىر قاتاردا ارتتا وتىرادى. قمدب-عا ورىس پراۆوسلاۆ شىركەۋىنە بەرىلگەن ايرىقشا قۇقىقتاردىڭ وننان ءبىرى دە بەرىلمەگەن. قۇقىق بەرۋ بىلاي تۇرسىن مەشىت ەلەكتر قۋاتىنا تولەماقىنى ءتورت-بەس كۇنگە كەشىكتىرىپ السا كەلىپ كەلىپ قيىپ كەتەدى. سودان كەيىن كەلىپ كيريللمەن سالىستىرادى. بىردەن ريم پاپاسىمەن سالىستىرا سالمادىڭدار ما؟! قمدب يمامدارى ۇسىناتىن ەلدەگى ءدىني پروبلەمالاردى شەشۋ جولدارىن اناعان قايشى كەلەدى، مىناعان قايشى كەلەدى دەپ قابىلداماساڭىزدار ەكەن. ولارعا نە كەرەك ەكەنىن تۇسىنە الماي قويدىم. Əلدە مəسەلە ەل باسىنا كۇن تۋعاندا «كراينىي» ادامدى ىزدەۋ عانا ما؟»،-دەپ جازادى قمدب وكىلى ەرسىن امىرە.

نۇرزات توعجان

Abai.kz