اتىراۋدا ماكس بوقاەۆ پەن تالعات ايانوۆتىڭ ءىسى بويىنشا باستى سوت وتىرىسى جالعاسۋدا. بۇگىن №2 قالالىق سوتتا كينولوگ-ماماننان جاۋاپ الىنىپ، زاتتاي ايعاقتار ودان ءارى قارالدى.

بۇگىنگى سوت وتىرىسىندا زايتتاي ايعاقتار رەتىندە ماكس بوقاەۆ پەن تالعات ايانوۆتىڭ تەلەفونمەن سويلەسۋلەرى تىڭدالدى. تەلەفون جازبالارىندا سوتتالۋشىلار تانىستارىن 24 ساۋىردەگى ميتينگكە قاتىسۋعا شاقىرعان. ت.ايانوۆپەن تىلدەسكەن ازاماتتاردىڭ كوبى ميتينگكە ءتۇرلى اۋدانداردان جىگىتتەردىڭ كەلەتىنىن ايتقان. زاتتاي ايعاقتاردى زەرتتەۋ بارىسىندا تالعات ايانوۆ بۇل ارەكەتىن جوققا شىعارماي، حالىقتى ميتينگكە قاتىسۋعا شاقىرعانىن تاعى ءبىر مارتە مويىندادى.

بۇگىن سونداي-اق، قورعاۋشى تاراپتىڭ وتىنىشىمەن سوت وتىرىسىنا كينولوگ-مامان قاتىستى.

اتاپ وتسەك، الدىڭعى وتىرىستا زايتتاي ايعاق رەتىندە ايانوۆتىڭ 50 مىڭ دوللار اقشاسى، فۋتبولكاسى مەن سومكەسى قارالعان بولاتىن. سول كەزدە تالعات «فۋتبولكا مەنىكى ەمەس، ول رينات كيبراەۆتىكى. كيبراەۆ ءوزىن قورعاپ، مەنىڭ اياعىمنان شالعىسى كەلدى. سوندىقتان، فۋتبولكاعا كينولوگ-ماماننىڭ قوسىمشا ساراپتاما جاساۋىن سۇرايمىن» ، - دەگەن ەدى. سۋديا گ.داۋلەشوۆا سوتتالۋشىنىڭ ءوتىنىشىن قاناعاتتاندىرىپ، ساراپتاما جاسايتىن ماماننىڭ كەڭەسىنە جۇگىنۋگە رۇقسات بەردى.

سونىمەن، بۇگىنگى سوت وتىرىسىنا قاتىسقان كينولوگ-مامان بيىلعى جىلدىڭ شىلدە ايىندا تابىلعان فۋتبولكا مەن سومكەگە ءيتتىڭ كومەگىمەن ساراپتاما جاساۋ مۇمكىن ەمەستىگىن ايتتى. ماماننىڭ مالىمەتىنشە، ول ءۇشىن زات ارنايى شاباداندا دۇرىس ساقتالىپ، دۇرىس جەتكىزىلۋى كەرەك ەدى.

«جارتى جىلعا جۋىق ۋاقىت ءوتىپ كەتكەندىكتەن يتتەر انىقتاي المايدى. 15-20 كۇن بولسا، وندا يت زات پەن ونىڭ يەسىن مۇمكىن سەزۋشى ەدى. ءيىس ۇشىپ كەتكەندىكتەن ەشبىر يت ءيىستى الا المايدى»، - دەدى كينولوگ-مامان.

ەسكە سالا كەتسەك، رينات كيبراەۆ اتالعان قىلمىستىق پروتسەسكە كۋاگەر رەتىندە قاتىسقان بولاتىن. كيبراەۆ ءوز سوزىندە 3 مامىر كۇنى الماتىدا ايانوۆپەن جانە تاعى ءبىر قوعام بەلسەندىسى مارلان ەسىلباەۆپەن كەزدەسكەنىن ايتقان ەدى. اڭگىمە بارىسىندا وعان ت.ايانوۆ ميتينگتەر وتكىزۋگە قوماقتى قارجىنىڭ بار ەكەنىن جانە ونى وڭتۇستىكقازاقستاندىق ازاماتتاردىڭ بەرگەنىن جايىپ سالعان. سونداي-اق، ايانوۆ قۇقىق قورعاۋشىلار ونى ۇستاپ الۋى مۇمكىن بولعاندىقتان قارجىنىڭ ءبىر بولىگىن م.ەسىلباەۆقا بەرىپ قويعانىن جەتكىزگەن. ال ەسىلباەۆ «ت.ايانوۆ مەننەن قارجىنى ۋاقىتشا ساقتاي تۇرۋدى ءوتىندى. بۇل اقشانى مەن ايانوۆ ۇمىتىپ كەتكەن فۋتبولكاعا وراپ، نوۋتبۋككە ارنالعان سومكەگە سالىپ قويدىم»، - دەگەن بولاتىن.

اتاپ وتسەك، م.بوقاەۆ پەن ت.ايانوۆقا قر قىلمىستىق كودەكسىنىڭ ءۇش بابى بويىنشا ايىپتار تاعىلۋدا. اتاپ ايتساق، ولار: 174 باپتىڭ 2 تارماعى، ياعني، الەۋمەتتىك جانە ۇلتتىق الاۋىزدىق تۋعىزۋعا باعىتتالعان قاساقانا ءىس-ارەكەتتەر جاساۋ، ازاماتتاردىڭ ۇلتتىق نامىسى مەن قادىر قاسيەتىنە ءتىل تيگىزۋ; 274 باپتىڭ 4 تارماعى، ياعني، قوعامدىق ءتارتىپتى بۇزۋعا قاۋىپ توندىرەتىن كوپە-كورىنەۋ جالعان اقپارات تاراتۋ; 400 باپ، ياعني، زاڭسىز شەرۋلەردى ۇيىمداستىرۋ، وتكىزۋ جانە وعان قاتىسۋ.

Abai.kz