وسى جىلدىڭ 1 قاراشاسىنان باستاپ وقو ءىىد جەرگىلىكتى پوليتسيا قىزمەتىنىڭ وكىلدەرى  وڭتۇستىك قازاقستان وبلىسىنىڭ اۋماعىندا «براكونەر» جەدەل الدىن الۋ ءىس-شاراسىن جۇرگىزۋدە. شارانىڭ باستى ماقساتى – تابيعاتتى قورعاۋ زاڭناماسىن بۇزۋشىلاردىڭ جولىن كەسۋ بولىپ تابىلادى. رەيد جۇمىستارىنا پوليتسيا قىزمەتكەرلەرى مەن تابيعاتتى قورعاۋ وكىلدەرىنەن قۇرالعان 50-دەن استام جەدەل توپ جۇمىلدىرىلدى.

وتكەن ءۇش تاۋلىك ىشىندە ءتارتىپ ساقشىلارى تابيعاتتى قورعاۋ زاڭناماسىن بۇزعان 54 قۇقىقبۇزۋشىلىقتى جانە 9 ەكولوگيالىق قىلمىستى انىقتادى. اتاپ ايتقاندا، اعاشتاردى كەسۋ، جانۋارلار دۇنيەسىن پايدالانۋ جانە اڭ اۋلاۋ تالاپتارىن بۇزۋ، بالىق اۋلاۋ، كۇتىپ ۇستاۋ قاعيدالارىن جانە جاسىل جەلەكتەردى بۇزۋ ەڭ كوپ تاراعان قۇقىقبۇزۋشىلىقتار بولىپ تابىلۋدا.

ماسەلەن، 1 قاراشا كۇنى پوليتسەيلەر سارىاعاش اۋدانى اۋماعىنداعى كەلەس وزەنىنىڭ بويىندا اعاشتاردى زاڭسىز كەسكەن 1988 جىلى تۋىلعان جەرگىلىكتى تۇرعىندى ۇستاپ، ايعاق زات رەتىندە بالتا جانە 0,5 كۋب كەسىلگەن اعاش تاركىلەدى. سونىمەن بىرگە، وسى كۇنگى ءىس-شارالار كەزىندە تۇركىستان قالاسىندا پوليتسەيلەر سەكسەۋىل ارتقان جۇك كولىگىن انىقتادى. 1982 جىلى تۋىلعان تۇركىستان قالاسىنىڭ تۇرعىنىندا ەشبىر قۇجات بولماعان. جۇرگىزۋشى مەن ونىڭ جانىنداعى 1991  جىلى تۋىلعان وتىرار اۋدانىنىڭ تۇرعىنى اۆتوكولىكپەن بىرگە وقيعانىڭ ءمان-جايىن انىقتاۋ ماقساتىندا تۇركىستان قىىب-گە جەتكىزىلدى.

اتالعان جايتتار بويىنشا قر قك-ءنىڭ 340-بابىمەن «اعاشتار مەن بۇتالاردى زاڭسىز كەسۋ، جويۋ نەمەسە زاقىمداۋ» قىلمىستىق ءىس قوزعالدى. سوتقا دەيىنگى تەرگەۋ جۇرگىزىلۋدە.

سونىمەن قاتار، تابيعاتتى قورعاۋ زاڭناماسىن بۇزعان 45 قۇقىقبۇزۋشىعا اكىمشىلىك تارتىپپەن 130 مىڭ تەڭگەدەن استام ايىپپۇل سالىندى.   

تابيعاتتى قورعاۋعا باعىتتالعان اتالعان ءىس-شارا 10 قاراشاعا دەيىن جالعاساتىن بولادى.

Abai.kz