وڭتۇستىك قازاقستاندا ۇكىمەتتىك ەمەس ۇيىمدارىنىڭ وبلىستىق VII ازاماتتىق فورۋمى ءوتتى. شاراعا قاتىسقان وبلىس اكىمى جانسەيىت تۇيمەباەۆ جيىن باستالاردان بۇرىن ۇيىمداستىرىلعان ۇكىمەتتىك ەمەس ۇيىمداردىڭ الەۋمەتتىك يدەيالار مەن جوبالار جارمەڭكەسىن كوردى.

ازاماتتىق فورۋمدا ءسوز العان ايماق باسشىسى بۇگىندە قوعامدىق ۇيىمدار، ۇكىمەتتىك ەمەس سەكتور، بەلسەندى جانە باستاماشىل ازاماتتارسىز ءبىزدىڭ مەملەكەتتىلىگىمىزدىڭ ساياسي جانە الەۋمەتتىك-ەكونوميكالىق تۇرعىدان دامۋىن كوزگە ەلەستەتۋ مۇمكىن ەمەستىگىن ايتتى.

«ەلباسىمىزدىڭ «100 ناقتى قادام» ۇلت جوسپارىنداعى حالىق الدىندا ەسەپ بەرەتىن مەملەكەتتى قالىپتاستىرۋ ماقساتىندا «قوعامدىق كەڭەستەر تۋرالى» زاڭ قابىلدانىپ، رەسپۋبليكالىق، وبلىستىق، اۋداندىق، قالالىق دەڭگەيلەردە قوعامدىق كەڭەستەر قۇرىلعان. وسىنداي ۇيىمداردىڭ قۇرامىنا قوعامنىڭ ءتۇرلى سالاسىنىڭ مۇددەسىن بىلدىرەتىن بىرلەستىكتەردىڭ 80-گە جۋىق جەتەكشىلەرى ەنگىزىلگەن. بۇل اتا زاڭىمىزدا كورسەتىلگەن ازاماتتىق قوعامدى دامىتۋعا دەگەن مەملەكەتتىڭ كەزەكتى ءبىر قادامى دەۋگە بولادى»، - دەدى ج.تۇيمەباەۆ.

سونىمەن بىرگە، ءوز سوزىندە ءوڭىر باسشىسى ازاماتتىق قوعامدى دامىتۋ ءۇشىن بىرقاتار ۇسىنىستارىن جەتكىزدى. اتاپ ايتقاندا، اكىم ايماقتاعى قوعامدىق-ساياسي تۇراقتىلىق پەن تولەرانتتىلىقتى تەرەڭدەتىپ، حالىقتى الەۋمەتتىك قورعاۋ، ونىڭ ىشىندە، اسىرەسە، قوعامنىڭ ءالسىز توپتارىنا كومەك بەرۋدى ايتتى. سونىمەن قاتار، جانسەيىت قانسەيىتۇلى جاستاردى وتانسۇيگىشتىككە تاربيەلەپ، ۇلت ارالىق قاتىناستا ادەپتىلىكتى ساقتاۋ قاجەتتىگىنە توقتالىپ، ءدىني ەكسترەميزم مەن تەرروريزمگە بىرلەسە قارسىلىق تانىتۋ كەرەكتىگىن جەتكىزدى.

مۇنان سوڭ، القالى جيىندا وبلىستاعى بەلسەندى ۇكىمەتتىك ەمەس ۇيىم وكىلدەرى ماراپاتتالىپ، الەۋمەتتىك يدەيالار مەن جوبالار جارمەڭكەسىنىڭ جەڭىمپازدارى قۇتتىقتالدى. سونداي-اق، VII ازاماتتىق فورۋمعا كەلگەن دەلەگاتتاردىڭ ءتىزىمىن بەكىتىلدى.

ايتا كەتەيىك، وبلىستاعى قوعامدىق ۇيىمداردىڭ سانى 2000 جىلدارى 400-گە جۋىق بولسا، 2016 جىلى ولاردىڭ سانى 1200-ءدى قۇراپ، ياعني 67 پايىزعا ءوسىپ وتىر.

بۇل باعىتتاعى جۇمىستىڭ اۋقىمىن كورسەتۋ ءۇشىن تومەندەگى كورسەتكىشتى ايتساق. ەگەر 2006 جىلى وبلىستىق بيۋدجەتتەن مەملەكەتتىك الەۋمەتتىك تاپسىرىستى ورىنداۋعا 6 ميلليون تەڭگە بولىنگەن بولسا، ال بۇگىندە 540 ميلليوننان استام تەڭگە قارجى قارالعان. وسىعان بايلانىستى وبلىستا مەملەكەتتىك الەۋمەتتىك تاپسىرىس بويىنشا باستاپقىدا 1 عانا وبلىستىق باسقارما (وبلىستىق ىشكى ساياسات باسقارماسى) جۇمىس ىستەسە، بۇگىنگى كۇنگە ۇكىمەتتىك ەمەس ۇيىمدارمەن اۋدان، قالا اكىمدىكتەرىمەن قاتار 5 وبلىستىق باسقارما جۇمىس ىستەيدى.

قوعامدىق بىرلەستىكتەر بويىنشا ەڭ ليبەرالدى زاڭ ءبىزدىڭ مەملەكەتىمىزدىڭ ەنشىسىندە. كورشىلەس مەملەكەتتەردە ءتيىستى ورگاندارعا ءبىر رەت ەسەبىن بەرمەگەن قوعامدىق ۇيىمدارعا ولاردى جابۋ پروتسەدۋراسىن قولدانادى.

الەۋمەتتىك مىندەتتەمەلەردىڭ ءبىر بولىگىن ازاماتتىق قوعامنىڭ ءوز مىندەتىنە الۋى وركەنيەتتى الەمدە قالىپتى قۇبىلىس بولىپ سانالادى.

Abai.kz