وڭتۇستىك قازاقستان وبلىسىنىڭ اكىمى جانسەيىت تۇيمەباەۆ 110 مىڭنان استام حالقى بار تۇلكىباس اۋدانىنا جۇمىس ساپارىمەن باردى. اكىم باستاعان جۇمىسشىتوپ الدىمەن ارىس اۋىلدىق وكرۋگىندەگى بەكىرە تۇقىمداس بالىق ءوسىرۋ شارۋاشىلىعى مەن ات سپورتى مەكتەبىنىڭ جۇمىسىمەن تانىستى

رەسپۋبليكامىزدا سيرەك كەزدەسەتىن بەكىرە تۇقىمداس بالىق ءوسىرۋ فەرماسى 2012 جىلى وڭىرلىك يندۋستريالدى كارتا شەڭبەرىندە  ىسكە قوسىلعان.جوبانى ىسكە اسىرۋشى – «اقسانات ينجينيرينگ» جشس.  

كاسىپورىن جۇمىسىمەن تانىستىرعان ەرىك وسپانوۆ جوبانىڭ قۇنى 452  ملن. تەڭگەنى قۇراعانىن ايتىپ،  بۇگىندە جىلىنا 40 توننا بالىق ەتى مەن 30 كەلى قارا  ۋىلدىرىق ءونىمىن ءوندىرىپ جاتقانىن مالىمدەدى.

بالىق شاراۋشىلىعىن كاسىپكەرلەرگە كەڭىنەن ناسيحاتتاۋ قاجەتتىگىن ايتقان وبلىس اكىمى وسىنداي بالىق فەرمالارىن كورشىلەس تولەبي، سارىاعاش سىندى اۋداندارىندا دا دامىتۋدى تاپسىردى.

جۇمىس ساپارى بارىسىندا ايماق باسشىسى «اقسانات ينجينيرينگ» جشس قاراستى  ات سپورتى مەكتەبىن ارالادى. ەكى جىل بۇرىن اشىلعان ات سپورتى مەكتەبىندە 24 اسىل تۇقىمدى جىلقى بار.  جوبانىڭ جالپى قۇنى 10 ملن. 500 مىڭ تەڭگە.  ارىس اۋىلدىق وكرۋگىندە ۇيىمداستىرىلعان اۋىلشارۋاشىلىق ونىمدەرىنىڭ كورمەسىنە قاتىسقان اكىم جەرگىلىكتى ەڭبەكشىلەرمەن كەزدەسىپ، وي ءبولىستى. اۋىل شارۋاشىلىعى سالاسىنا سۋبسيديا بولىنەتىنىن دە اتاپ ءوتتى.

وسى كۇنى ج.تۇيمەباەۆ ت.رىسقۇلوۆ اۋىلى، «جانكەنت» مولتەك اۋدانىنداعى 600 ورىندىق جاڭا مەكتەپتىڭ قۇرىلىسىمەن تانىسىپ، ءبىلىم ۇياسىنىڭ ماڭىنا العاشقى كوشەتتى وتىرعىزدى.  وبلىستىق بيۋدجەت ەسەبىنەن سالىنعان 3 قاباتتى مەكتەپتە وقۋشىلارعا بارلىق جاعداي جاسالعان. ودان كەيىن ءوڭىر باسشىسى  اتالعان شاعىن اۋدانىنداعى جاڭادان سالىنعان  64 جانە 32 پاتەرلى تۇرعىن ءۇيدى ارالاپ كوردى. 

بىرنەشە الەۋمەتتىك نىساندى ارالاپ، اتقارىلعان جۇمىستاردى كورگەن وبلىس اكىمى اۋدان اكتيۆىمەن كەزدەستى. جيىندا تۇلكىباس اۋدانىنىڭ اكىمى اۋەلحان تۇرعىمبەكوۆ الەۋمەتتىك-ەكونوميكالىق دامۋ كورسەتكىشتەرى بويىنشا اتقارىلعان جۇمىستار جايىن باياندادى. بۇگىندە اۋداننىڭ جالپى وڭىرلىك كولەمى 40,8 ملرد. تەڭگەنى قۇراپ وتىر. ونەركاسىپ، اۋىل شارۋاشىلىعى سالالارىندا دا جۇمىس بار. دەگەنمەن، وبلىس اكىمى تۇلكىباس اۋدانىنىڭ الەۋمەتتىك-ەكونوميكالىق الەۋەتى زور ەكەنىنە توقتالىپ،  ءوز پوتەنتسيالىن تولىق پايدالانباي وتىرعانىن ايتتى.

«2016 جىلعى 1 قاراشاعا تۇلكىباس اۋدانى بويىنشا 155,4 ملن. تەڭگە قارجى يگەرىلمەگەن. ال ونەركاسىبى ءونىمىنىڭ جالپى كولەمىندە تۇلكىباس اۋدانىنىڭ ۇلەسى 2,1% قۇرادى، بۇل كورسەتكىش وتكەن جىلدىڭ سايكەس مەرزىمىنە قاراعاندا 0,9 پايىزعا تومەندەگەن.  اۋدانداعى شاعىن جانە ورتا كاسىپكەرلىكتىڭ سانى  6 186 بىرلىك  بولسا، وتكەن جىلدىڭ ءتيىستى كەزەڭىمەن سالىستىرعاندا 7,8% تومەندەگەن. ينۆەستيتسيا تارتۋ بويىنشا دا 14 ورىندا تۇرسىزدار.  ال توقتاپ تۇرعان «ەكوپرودۋكتگرۋپپ» كاسىپورىنىن ىسكە قوسۋ جانە بوس تۇرعان «Sana» جشس كاسىپورىندارى سىندى عيماراتتاردى ءتيىمدى پايدالانبايسىزدار. تۇلكىباستا 21 مىڭ گەكتار جەرگە كۇزدىك ەگۋ جۇمىستارىن جۇرگىزۋ كوزدەلسە، ونىڭ جارتىسى عانا ورىندالعان. دەنساۋلىق ساقتاۋ جانە ءبىلىم سالاسىندا دا كەمشىلىكتەر بار. جاسوسپىرىمدەر قىلمىسى، سۋيتسيد ماسەلەلەرى دە كۇن تارتىبىندە تۇر. ءبىزدىڭ باستى ماقسات – اۋدان تۇرعىندارىنا قولايلى جاعدايلار جاساۋ. سوندىقتان جۇمىستى شيراتۋ كەرەك»،-دەدى وبلىس اكىمى.

تۋريزم سالاسىنىڭ  دامۋىنا كوڭىلى تولماعان اكىم تولە بي اۋدانىندا 40-تان استام دەمالىس جانە قوناق ءۇي كەشەندەرى ورنالاسقانىن ايتىپ، تابيعاتى كەرەمەت تاۋلى ايماقتا بۇدان الدەقايدا  از ەكەنىنە توقتالدى.

جيىندى قورىتىندىلاعان جانسەيىت قانسەيىتۇلى تۋريزم باعىتىن، پوتەنتسيالدى پايدالانا وتىرىپ شاعىن جانە ورتا كاسىپكەرلىكتى دامىتۋدى ايتتى. سونىمەن قوسا، اۋىل شارۋاشىلىعى سالاسىنا تۇبەگەيلى تالداۋ جاساپ، باۋ-باقشا ءوسىرۋ، اۋىل شارۋاشىلىعىن دامىتۋ باعىتىندا ناقتى ءىس-جوسپاردى بەكىتۋدى، جۇمىسسىزدىقتى ازايتۋ بويىنشا ءتيىستى جۇمىستاردى اتقارۋدى تاپسىردى.  ەل تاۋەلسىزدىگىنىڭ 25 جىلدىعىن جوعارى دەڭگەيدە اتاپ ءوتۋ جونىندە دە جەرگىلىكتى بيلىككە بىرقاتار مىندەتتەمەلەر جۇكتەدى.

Abai.kz