شىمكەنت قالاسىنداعى 17 شاعىن اۋدانىندا ورنالاسقان گۇلزاردىڭ قايتا قۇرۋ جۇمىستارى اياقتالىپ، پايدالانۋعا بەرىلدى.
ەگەمەندىگىمىزدىڭ شيرەك عاسىرلىق مەرەيتويىنا وراي، ەل يگىلىگىنە بەرىلگەن دەمالىس ورنىنىڭ اشىلۋ سالتاناتىنا وبلىس əكىمى جانسەيىت تۇيمەباەۆ پەن قالا əكىمى عابيدوللا ءابدىراحىموۆ قاتىستى. 
تۇرعىنداردىڭ قۋانىشىمەن بولىسە كەلگەن ءوڭىر باسشىسى بارشا شىمكەنتتىكتەردى ەل تاۋەلسىزدىگىنىڭ 25 جىلدىعىمەن قۇتتىقتاپ، قالامىزدى جاسىل جەلەككە اينالدىرۋ ءۇشىن شىمكەنتتىك ءاربىر تۇرعىندى ءبىر تال اعاش ەگۋگە شاقىردى.
«بۇل جەر سىزدەردىڭ سۇيىكتى دەمالىس ورىندارىڭىزعا اينالاتىنىنا سەنىمىم مول. حالىقتىڭ تىنىعۋىنا جاعداي جاساۋ ماقساتىندا قالادا كوگالداندىرۋ جۇمىستارى قارقىن الىپ، كوپتەگەن دەمالىس ورىندارى قايتا جوندەۋدەن ءوتىپ جاتىر. وسى سۇلۋلىقتى ساقتاپ قالۋ ءۇشىن تۇرعىنداردىڭ دا كومەگى قاجەت. مەنىڭ اكەم زەينەتكەرلىككە شىققاننان كەيىنگى عۇمىرىندا 3 مىڭ تەرەك ەككەن. سوندىقتان، ءار قايسىڭىزدىڭ قالانىڭ جاسىل جەلەككە اينالۋىنا ۇلەس قوسۋلارىڭىزدى سۇرايمىن جانە بىرلەسە جۇمىس جاساۋعا شاقىرامىن»،- دەدى ج.تۇيمەباەۆ ءوز قۇتتىقتاۋ سوزىندە.
جانداربەكوۆ كوشەسى بويىنان اشىلعان اشىق الاڭدى جوندەۋگە 58,4 ملن. تەڭگە جۇمسالعان. جالپى اۋماعى 1 گەكتاردان اساتىن دەمالىس ورنىن ىسكە اسىرۋدا جولاياقتار جوندەلىپ، قالىتقىلى ورىندىقتار، قوقىس جəشىكتەرى مەن جارىقتاندىرۋ باعانالارى ورناتىلدى. سونىمەن قوسا، كوگالداندىرۋ جانە سۋارۋ جۇيەسى جۇرگىزىلىپ، ۇزاق ۋاقىت بويى جۇمىس ىستەمەي تۇرعان سۋبۇرقاقتار قايتا جوندەۋدەن وتكىزىلدى. وسىلايشا، شىمكەنتكە كورىك بەرەتىن دەمالىس ايماقتارىنىڭ سانى ارتتى.
ايتا كەتۋ كەرەك، شىمكەنت قالاسىندا بۇگىندە كولەمى 160 گا قۇرايتىن 8 ساياباق پەن 30 سكۆەر بار. ولاردىڭ بىرقاتارى - «مارتوبە»، «ناۋرىز» ساياباقتارى جوندەۋدى قاجەت ەتسە، شاھارداعى ەسكى قوقىس ورنىن ساياباققا اينالدىرۋ جۇمىستارى دا جوسپاردا بار. الداعى ۋاقىتتا «قاراسۋ» جانە «شىمتوبە» سكۆەرلەرىنە دە قايتا قۇرۋ جۇمىستارى جۇرگىزىلەتىن بولادى.
وسى كۇنى ايماق باسشىسى ج.تۇيمەباەۆ شىمكەنتتەگى ەسكى شاھار اۋماعىن قايتا قالپىنا كەلتىرۋ بويىنشا جاسالىنعان «شىمكەنت قالاشىعى» ءاتنو-مادەني كەشەنىنىڭ جوبالارىمەن تانىستى.
كونە قالانىڭ تەرريتورياسىنداعى قازبا جۇمىستارىن جالعاستىرىپ، ءارى ونى ءتيىمدى پايدالانۋ بويىنشا ازىرلەنگەن تۇجىرىمدامامەن تانىسقان ايماق باسشىسى اتالعان جوبا اياسىندا جۇمىستاردى تولىقتىرىپ، جوبالىق سمەتالىق قۇجاتتارىن دايىنداپ، كەلىسىمدەر جۇرگىزۋدى تاپسىردى. سونىمەن بىرگە، سۋرەتشىلەر ءۇشىن شەبەرحانا سالۋ دا وسى ماڭنان ۇيىمداستىرۋعا بولاتىنىن ەسكەرتىپ، كيەلى تاريحي ورىندار مەن كەسەنەلەردىڭ ماكەتتەرىن ورنالاستىرۋ قاجەتتىگىن ايتتى. 
كونە شىمكەنت شاھارىنىڭ ناق وسى ماڭنان باستالاتىنىن ايتقان ءوڭىر باسشىسى بۇل مەكەن تۋريستەردىڭ كوپتەپ كەلەتىن ورتالىعىنا اينالۋى تيىستىگىن، قالا سول تالاپتارعا ساي سۇلۋ دا، تازا بولۋى كەرەكتىگىن جەتكىزدى. 
ايتا كەتەيىك، اتالعان جوبا ىسكە اسقاندا توبەشىكتىڭ اينالاسىندا ساۋدا، ويىن-ساۋىق ورتالىعى مەن مۋزەي، مۇز ايدىنى، لەكتسيا زالدارى مەن شەبەرحانا جانە امبەباپ كورمە زالدارى سالىنادى دەپ كۇتىلۋدە.

Abai.kz