قىتايداعى قازاق بالاسىنىڭ جازعان "جاپىراق - ءومىر" اتتى شىعارماسى "اسپان استى" ەلىنىڭ الەۋمەتتىك جەلىلەرىندە قىزۋ تالقىلانىپ جاتىر. وقۋشىلارعا ءبىر اقىننىڭ جاپىراققا قاتىستى ولەڭىنە شىعارما جازۋ تاپسىرىلسا كەرەك. سول تاپسىرمانى قازاق ءبۇلدىرشىنى كوڭىلگە مۇڭ ۇيالاتقانداي ەتىپ جازىپتى. 

"جىلدام عۇمىر ۋاقىت ءوتتى زىمىراپ،  

ءاپ-ساتتە التىن تۇسكە ەندى كۇزگى باق.  

جاپىراقتار جىر پاراعىم سەكىلدى،  

جەر بەتىنە قۇلاپ جاتىر سۋدىراپ".

شىعارماعا وسى ولەڭ ارقاۋ بولعان. بىراق، كىشكەنە عانا ءبۇلدىرشىننىڭ كۇزدەگى جاۋعان جاپىراققا دەگەن ماحابباتىنان گورى وكپەسى باسىم ەكەن. ول جۇدىرىقتاي جۇرەگىمەن سىرىن شەرتىپ، وزگە مەملەكەتتە كوشە سىپىرىپ، جان باعىپ جۇرگەن اناسىنىڭ اۋىر ءحالىن سۋرەتتەگەن. 

بۇل ءبىر عانا انا مەن بالانىڭ جۇرەگىن تىلگىلەگەن اششى شىندىق ەمەس. بۇل - بوتەن ەلدە كوزىنىڭ جاسىن كولدەتىپ كىرىپتار بولىپ جۇرگەن، بۇگىن كىرىپتار بولماعانىمەن بولاشاقتا جات جۇرتقا جالتاقتاپ قالاتىن قانداستارىمىزدىڭ كۇيىن ءدال كورسەتىپ وتىرعان شىعارما.  

"جاپىراق - ءومىر. مەن جاپىراقتى جەك كورەمىن. اناشىم كوشە تازالىقشىسى، ول وسى ايدا قاتتى جۇدەپ كەتتى. كوشەنى بۇگىن سىپىرىپ قويسا، ەرتەسى تاعى جاپىراق جاۋىپ قالادى. ابدەن تيتىقتادى... جاپىراقتى جەك كورەمىن! جاپىراق انامنىڭ ماڭدايىنان اققان تەرى سەكىلدى. ءار رەت اعاشتان تۇسكەن جاپىراقتى كورسەم انامنىڭ ماڭدايىنان اققان تەر كوز الدىما كەلەدى. جاپىراق اقىندارعا ۇنايتىن شىعار، بىراق ماعان ول جاۋىپ جاتقان سور سياقتى. شىركىن، جاپىراق تۇسپەيتىن بولساشى!.."

ءتۇيىن

كورشى ەلدىڭ WeChat الەۋمەتتىك جەلىسىن ءدۇر سىلكىندىرگەن ءبۇلدىرشىننىڭ اتى ءجونى ازىرگە بەلگىسىز. 

ءشارىپحان قايسار

Abai.kz