اۋىل شارۋاشىلىق سالاسىنا دەگەن مەملەكەتتىك قولداۋدىڭ ارقاسىندا بۇگىندە شارۋاسىن دوڭگەلەتىپ، ناپاقاسىن وسى سالادان ايىرىپ وتىرعان اعايىندار از ەمەس اۋىلدا. مىنە، بوداندىقتان بوساعانىمىزعا 25 جىل تولۋىنا وراي تىنىمسىز تىرلىگىنىڭ ارقاسىندا جەتىستىكتەرگە جەتكەن شارۋالاردى قۇتتىقتاۋ ءار اۋداندا كورىنىس بەرۋدە. سونداي قۋانىشتى ساتتەردىڭ ءبىرى وڭتۇستىك قازاقستان وبلىسىنىڭ تولەبي اۋدانىندا دا كورىنىس بەردى.

وسى اۋداننىڭ قوعالى اۋىلدىق وكرۋگى ۇزىنارىق اۋىلىندا تۇراتىن مىقتىبەك وسپانوۆ 2015 جىلى «ىرىس» قارجى ۇيىمىنان 3 ميلليون تەڭگە نەسيە الىپ، مال بورداقىلاۋ ءىسىن باستاعان بولاتىن. اۋىلدا وسكەن ۇل ەمەس پە، مالدىڭ جايىن، مال بورداقىلاۋدىڭ بابىن بىلەتىن مىقتىبەك ءۇشىن بۇل شارۋا تاڭسىق ەمەس ەدى. دەگەنمەن، جالقاۋلىقتى جەڭبەيىنشە جەتىستىككە جەتۋ قيىن. وسىنى مىقتاپ ساناسىنا قۇيعان مىقتىبەك باستاعان شارۋاسىنا بىلەك سىبانا كىرىستى. ناتيجە دە جوق ەمەس. قازىر ونىڭ قوراسىندا 50-گە جۋىق ءىرى قارانىڭ باسى قۇرالىپ قالدى. ال، كورشى اۋىل – قورعاندىق تۋرسۋمباي زايتەنوۆ تاۋەكەلگە بارىپ العان 5 ميلليون تەڭگە نەسيەگە ساتىپ العان مالىن بورداقىلاۋدىڭ ارقاسىندا ءار مالى كۇنىنە 700-800 گراممعا دەيىن سالماق قوسادى ەكەن. بۇل ەكەۋى دە تىندىرىمدى تىرلىكتەرىنىڭ ارقاسىندا جەرگىلىكتى اتقارۋشى بيلىك تاراپىنان لايىقتى ماراپاتقا يە بولىپ وتىر.

تىندىرىمدىلىقتارىنىڭ ارقاسىندا تۇرمىسىن تۇزەپ جاتقان وسى سەكىلدى اۋىل تۇرعىندارىنىڭ قاتارى قۋانىشقا قاراي ارتىپ كەلەدى. ماسەلەن، جوعارىدا ايتىلعان «ىرىس» مقۇ» جشس ارقىلى وسى تولەبي اۋدانىنىڭ وزىندە جالپى قۇنى 143 ميلليون تەڭگەنى قۇرايتىن 45 جوبا ماقۇلدانعان. ونىڭ 38 جوباسى قارجىلاندىرىلىپ ۇلگەرگەن. دەمەك، وسىنشا وتباسى تۇراقتى جۇمىس كوزىن تاۋىپ، كاسىبىن دامىتادى دەگەن ءسوز. ال ەت ءونىمى ۇدايى قولدانىلاتىن تاعام ەسەپتەلەدى. سول سەبەپتى، ونى وتكىزۋ جاعىنا قاتتى ۋايىمداماي-اق قويسا دا بولادى.       

شاديار مولدابەك

Abai.kz