وڭتۇستىك قازاقستان وبلىسىنىڭ اكىمى جانسەيىت تۇيمەباەۆ سۋرەتشىلەردى قولداۋ، ونەرىن ناسيحاتتاۋ، پىكىر الماسۋ، سونداي-اق، وسى باعىتتى دامىتۋ ماقساتىنداعى ۇسىنىستاردى تالقىلاۋ ماقساتىندا وبلىستىق بەينەلەۋ ونەرى مۋزەيىندە بولدى. وندا ايماق باسشىسى سۋرەتشىلەر وداعىنىڭ مۇشەلەرىمەن كەزدەسىپ، سالاداعى وزەكتى ماسەلەلەردى تالقىلادى. سونىمەن قاتار، جيىنعا قر ەڭبەك سىڭىرگەن ونەر قايراتكەرى، رەسەي، قىرعىزستان كوركەمونەر اكادەمياسىنىڭ اكادەميگى، مەملەكەتتىك سىيلىقتىڭ يەگەرى ەربولات تولەپباي قاتىستى.

وتىرىس بارىسىندا قازاقستان سۋرەتشىلەر وداعى وبلىستىق فيليالىنىڭ ديرەكتورى نۇرلان شيلىباەۆ ونەر ادامدارىنىڭ الەۋمەتتىك جاعدايىن جاساۋ ماسەلەسىن كوتەرىپ، شىعارماشىلىقپەن اينالىساتىن جۇمىس ورنىنىڭ جوقتىعىنا الاڭداۋشىلىق ءبىلدىردى. سونداي-اق، جەرگىلىكتى سۋرەتشىلەردىڭ تۋىندىلارىن اتالعان بەينەلەۋ ونەرى مۋزەيىنىڭ قورىنا ساتىپ الۋ جايىن قوزعاپ، ءتۇرلى تاقىرىپتا جوسپاردان تىس جىلىنا ەكى رەت كورمە ۇيىمداستىرۋدى سۇرادى. فيليال ديرەكتورى ءوز بايانداماسىندا وبلىس سۋرەتشىلەرىنىڭ شىعارمالارىن حالىقارالىق دەڭگەيگە كوتەرۋدى ۇسىنىپ، سۋرەتشىلەر شەبەرحاناسىن قۇرۋ قاجەتتىگىنە توقتالدى.

مۇنان سوڭ،  قر ەڭبەك سىڭىرگەن ونەر قايراتكەرى ەربولات تولەپباي ءسوز سويلەپ، سالاداعى وزگە دە وزەكتى جايتتار بويىنشا ويىن بىلدىرسە، سۋرەتشى، قولونەر شەبەرى كەندەباي قارابدالوۆ ءوزى تاپ بولعان كەدەرگىلەر رەتىن ايماق باسشىسىنىڭ الدىنا كولدەنەڭ قويدى.

وسىناۋ پروبلەمالارعا قانىق بولعان ايماق باسشىسى نارىقتىق ەكونوميكا زامانىندا ءاربىر ازامات كۇنى-ءتۇنى جۇمىس ىستەپ، ەلىمىزدىڭ كوركەيۋىنە اتسالىسۋ قاجەتتىگىنە نازار اۋداردى. شىعارماشىلىق وكىلدەرىنىڭ جۇمىسىن تەك جەرگىلىكتى دەڭگەيدە عانا ەمەس، حالىقارالىق دارەجەدە كورمە ۇيىمداستىرۋ ارقىلى وتكىزۋ كەرەكتىگىن ايتقان اكىم وبلىستا زاماناۋي تالاپتارعا ساي جاڭادان وڭتۇستىك قازاقستان وبلىسىنىڭ كوركەمسۋرەت گالەرەياسىنىڭ سالىناتىنىن جەتكىزدى.

«وڭتۇستىك قازاقستان وبلىسىنىڭ كوركەمسۋرەت گالەرەياسىن سالۋ تۋرالى تاپسىرما بەردىم. ويتكەنى، سۋرەت كۇتىمدى تالاپ ەتەدى. ماماندانعان جاڭا عيمارات سالىنعان سوڭ، كۇن تارتىبىندەگى ماسەلەلەر ءوز رەتىمەن شەشىمىن تابادى دەپ ويلايمىن. سونداي-اق، مۇندا شەبەرلىك ساباقتارىن ۇيىمداستىرىپ، سيمپوزيۋم وتكىزۋ جايىن قاراستىراتىن بولامىز»، - دەدى ج.تۇيمەباەۆ.  

ايتا كەتۋ كەرەك، 2009 جىلى سۋرەتشىلەرگە قولداۋ كورسەتۋ، ولاردىڭ شىعارماشىلىعىن ناسيحاتتاۋ ماقساتىندا اشىلعان كوركەمسۋرەت گالەرەياسىنىڭ جانىنان 2015 جىلى جاڭا زاماناۋي تۇرعىدا قوسىمشا عيمارات سالىنىپ، نىسان ءوز الدىنا «بەينەلەۋ ونەرى مۋزەيى» مەملەكەتتىك كوممۋنالدىق قازىنالىق كاسىپورنى رەتىندە قايتا قۇرىلعان بولاتىن. بۇگىنگى تاڭدا، مۇنداعى شىعارماشىلىق تۋىندىلارىنىڭ جالپى قورى 1015 دانانى قۇرايدى.

وڭىرىمىزدە قازاقستان سۋرەتشىلەر وداعىنىڭ 88 مۇشەسى بار بولسا، ونىڭ 2-ءۋى قر ەڭبەك سىڭىرگەن قايراتكەرى، 1-ءۋى قر مەملەكەتتىك سىيلىعىنىڭ لاۋرەاتى، 15-ءى «مادەنيەت قايراتكەرى» توسبەلگىسىنىڭ يەگەرى.

Abai.kz