Oبلىس اكىمدىگىندە وڭتۇستىك قازاقستان وبلىسىنىڭ اكىمى جانسەيىت تۇيمەباەۆتىڭ توراعالىعىمەن كۇزگى ماۋسىمدا شىمكەنت قالاسىندا وتىرعىزىلاتىن اعاش كوشەتتەرى بويىنشا جيىن ءوتتى. وتىرىسقا شىمكەنت قالاسىنىڭ اكىمى عابيدۋللا ءابدىراحىموۆ پەن سالاعا قاتىستى جاۋاپتى جەتەكشىلەر قاتىستى. 

جيىندا قالاداعى 4 اۋدان اكىمدىگىنە قاراستى ساياباقتار مەن گۇلزارلارعا، سونىمەن بىرگە، ەلدى مەكەندەردى قوساتىن جول بويلارى، مەكتەپتەر مەن بالاباقشالارعا، اۋرۋحانالارعا جانە ءى ساناتتى ورتالىق كوشەلەرگە ەگىلەتىن جاسىل جەلەكتەردىڭ جوسپارىن بايانداعان شاھار باسشىسى ع.ءابدىراحىموۆ اتالعان اۋماقتارعا 77 مىڭ تۇپتەن استام جاسىل جەلەكتى وتىرعىزۋ جۇمىستارى ەكى كەزەڭمەن جۇرەتىنىن جەتكىزدى.

قالا اكىمىنىڭ ايتۋىنشا، كولەمى 22,5 گا بولاتىن ساياباقتار مەن گۇلزارلارعا 8 مىڭ تۇپتەن استام قىرىم قاراعايى مەن شىنار، ليپا وتىرعىزىلسا، اباي، ءال-فارابي، ەڭبەكشى جانە قاراتاۋ اۋداندارىنا قاراستى اۋماقتارعا 22 مىڭ تۇپتەن استام قاراعاش وتىرعىزىلماق. جۇمىستاردى «شىمكەنت جاسىل قالا» مەملەكەتتىك مەكەمەسى جۇرگىزەتىن بولادى.

كۇزدىك كوشەتتەردى وتىرعىزۋ جۇمىستارى، سونداي-اق، شىمكەنتتەگى ورتالىق داڭعىلدار مەن كوشەلەرگە دە جۇرگىزىلمەك. اتاپ ايتقاندا، قالاداعى تەمىرلان تاس جولى، ارعىنبەكوۆ كوشەسى، قوناەۆ داڭعىلى، بايدىبەك بي داڭعىلى سىندى 21 ورتالىق كوشەگە 47 مىڭ تۇپكە جۋىق جاسىل جەلەك ەگىلەدى. شاھاردىڭ سانىنە كورىك بەرەتىن مۇنداعى اعاشتاردىڭ دەنى تۋيا (بوز ارشا), لەگۋسترۋم، قاراعاش، قىرىم قاراعايى، كاشتان، تەرەك، فورزيتسيا، كلەن سىندى اعاشتاردىڭ كوشەتتەرىنەن تۇرادى.

وبلىس ورتالىعى – شىمكەنتتى كوگالداندىرۋ جۇمىستارى اياسىنداعى مالىمەتتەرگە قانىققان جانسەيىت قانسەيىتۇلى جاسىل جەلەكتەردىڭ ءوڭىر كليماتىنا ساي بولۋى كەرەكتىگىنە نازار اۋدارىپ، اپتاپ ىستىقتا سايا بولاتىن قىلقانجاپىراقتى اعاشتاردى كوپتەپ ەگۋدى تاپسىردى.

كوشەتتەردىڭ باسىم بولىگىن قازىعۇرت اۋدانىنداعى «جاسىل جەلەك» تۇقىمباعىنان الۋعا نۇسقاۋ بەرگەن ايماق باسشىسى ءار اپتاداعى سەنبىلىك كەزىندە جوسپارداعى كۇزدىك كوشەتتەردى وتىرعىزىپ ۇلگەرۋدى تاپسىردى. 

Abai.kz