شارۋالار اۋىلشارۋاشىلىق كووپەراتيۆتەرىنە بىرىكسە نەمەسە وزدەرىنىڭ جەكە قوسىمشا شارۋاشىلىقتارى بازاسىندا شاعىن تاۋارلى ءوندىرىس اشاتىن بولسا، 7 جىلدىق مەرزىممەن 16 ملن. تەڭگە الۋ مۇمكىندىگى قاراستىرىلۋدا.

اۋىلشارۋاشىلىق تاۋارلارىن وندىرۋشىلەرگە ارنالعان شاعىن نەسيە كولەمى ءۇش ەسە ءوسۋى مۇمكىن. بۇل تۋرالى ماجىلىستە وتكەن ۇكىمەت ساعاتىندا دەنساۋلىق ساقتاۋ جانە الەۋمەتتىك دامۋ ءمينيسترى تامارا دۇيسەنوۆا ءمالىم ەتتى. Palata.kz تىلشىسىنە سۇحبات بەرگەن مينيستر ميكرونەسيەلەندىرۋگە ەگجەي-تەگجەيلى توقتالىپ، «جۇمىسپەن قامتۋدىڭ جول كارتاسى» باعدارلاماسى اياسىندا 2016 جىلى شاعىن نەسيەنىڭ ەڭ جوعارعى كولەمى 6 ملن تەڭگەگە تەڭ بولعانىن ەسكە سالىپ ءوتتى. مۇنداي نەسيەلەر قازىر پيلوتتى رەجيمدە بەس وبلىستا: الماتى، جامبىل، وڭتۇستىك قازاقستان، قىزىلوردا، اقتوبە وبلىستارىندا ۇسىنىلۋدا.

«قازىر قر اۋىل شارۋاشىلىعى مينيسترلىگىمەن بىرلەسە وتىرىپ، اگروونەركاسىپ كەشەنىن دامىتۋ باعدارلاماسى اياسىندا شارۋالار اۋىلشارۋاشىلىق كووپەراتيۆتەرىنە بىرىكسە نەمەسە وزدەرىنىڭ جەكە قوسىمشا شارۋاشىلىقتارى بازاسىندا شاعىن تاۋارلى ءوندىرىس اشاتىن بولسا، 7 جىلدىق مەرزىممەن 16 ملن تەڭگە الۋ مۇمكىندىگىن قاراستىرىپ جاتىرمىز»، – دەدى مينيستر.

جالپى العاندا، دەنساۋلىق ساقتاۋ جانە الەۋمەتتىك دامۋ ءمينيسترى كەلتىرگەن مالىمەت بويىنشا، بيىلعى جىلى ميكرونەسيەلەندىرۋگە «30,8 ملرد تەڭگە بولىنگەن».

«وتكەن جىلدارداعى تاجىريبە كورسەتىپ وتىرعانداي، باعدارلاماعا قاتىسۋشىلاردىڭ 79%-ى ميكرونەسيەنى اۋىل شارۋاشىلىعىنا، ونىڭ ىشىندە مال شارۋاشىلىعىنا پايدالانادى ەكەن، ويتكەنى ول اۋىلدىقتار ءۇشىن تۇسىنىكتى جانە قولجەتىمدى بيزنەس. سوندىقتان وسى جىلى اۋىلشارۋاشىلىق كووپەراتيۆتەرىنە بىرىگۋدى جانە جەكە قوسالقى شارۋاشىلىق بازاسىندا شاعىن تاۋارلى ءوندىرىس قۇرۋدى ىنتالاندىرۋ ءۇشىن، شاعىن نەسيەلەردىڭ كولەمىن 6 ملن تەڭگەگە دەيىن ارتتىردىق»، – دەدى تامارا دۇيسەنوۆا.

ۇكىمەتتەگىلەر كووپەراتسيا «جەم-ءشوپ دايىنداۋ جانە ونىمدەردى وتكىزۋ ماسەلەلەرىن بىرلەسىپ شەشۋگە، ەڭبەك ونىمدىلىگىن قامتاماسىز ەتۋگە، سوعان سايكەس، اۋىلداستارى ءۇشىن قوسىمشا جۇمىس ورىندارىن اشۋعا» كومەكتەسەدى دەگەن ۇمىتتە. «بۇل ماقساتقا بولىنگەن جالپى سومانىڭ 10 ملرد تەڭگەسى باعىتتالدى»، – دەدى مينيستر.

وسى جىلى ميكرونەسيەلەردى 9 مىڭ قازاقستاندىق الادى دەپ جوسپارلانىپ وتىر، سونىڭ ەسەبىنەن كاسىپكەرلەر قوسىمشا 12 مىڭ جۇمىس ورنىن اشپاق. دەنساۋلىق ساقتاۋ جانە الەۋمەتتىك قورعاۋ مينيسترلىگى تاراتقان مالىمەتتەر بويىنشا، 6 834 ميكرونەسيە بەرىلىپ ۇلگەرىپتى، سونىڭ 89%-ى اۋىل شاۋاشىلىعىندا پايدالانىلعان.

بۇدان بولەك، جۇمىسسىز تۇرعىنداردىڭ اراسىنان جەكە كاسىپكەرلەر دايىنداپ شىعارۋ جۇمىستارى جالعاسىپ جاتىر، ولار دا جەڭىلدىگى بار ميكرونەسيە يەلەنە الادى.

جانار سەردالينا

Abai.kz