15 قاراشا - ءار جاستىڭ قيالى شىندىققا، ارمانى جۇزەگە، ماقساتى ىسكە اساتىن كۇن. ويتكەنى ءدال وسى كۇنى، الماتى قالاسىندا «مۇمكىندىكتەر جارمەڭكەسى» اتتى ەڭبەك جارمەڭكەسى وتپەك، - دەپ حابارلايدى اباي-اقپارات.

«بولاشاق» رەسپۋبليكالىق قوزعالىسى مەن «جاستار ءۇنى» جقب الماتى قالاسى جاستار ساياساتى ماسەلەلەرى جونىندەگى باسقارماسىنىڭ قولداۋىمەن جۇزەگە اسىرىپ وتىرعان بۇل جوبا تالاي جاسقا جاڭا ءومىر جولىن اشاتىنى ءسوزسىز!

الماتى 2 ميلليون حالىققا پانا بولعان الىپ شاھار. قالاعا اي سايىن ۋربانيزاتسيا اسەرىنەن 20 مىڭ ادام قونىس اۋدارادى. سونىڭ 80% ەكى قولعا ءبىر كۇرەك ىزدەپ كەلگەن اۋىل جاستارى. ولاردىڭ باسىم كوپشىلىگى ءوز جوسپارىنداعى قىزمەتكە ورنالاسا المايتىندىعى دا جاسىرىن ەمەس. جۇمىسسىز جاستىڭ، قىزمەتسىز ازاماتتىڭ كوبەيۋى – نارازى كوڭىل-كۇيدىڭ ارتۋى دەگەن ءسوز. بۇل مەملەكەتتى عانا ەمەس، ءسىز بەن ءبىزدى دە الاڭداتاتىن جاعىمسىز فاكتور. سوندىقتان قوعامداعى الەۋمەتتىك جاۋاپكەرشىلىكتى بارلىعىمىز بولىسە اتقارۋعا ءتيىسپىز.

جۇمىسسىز جۇرگەن جاستىڭ بارلىعىن جۇمىسپەن جارىلقاماساق تا، جول سىلتەپ، باعىت-باعدار كورسەتۋدى پارىز ساناعاندىقتان، 15 قاراشادا «مۇمكىندىكتەر جارمەڭكەسى» اتتى ەڭبەك جارمەڭكەسىن وتكىزۋدى قۇپ كوردىك. ەڭبەك جارمەڭكەسى «بولاشاق» رەسپۋبليكالىق قوزعالىسى مەن «جاستار ءۇنى» جاستار قوعامدىق بىرلەستىگىنىڭ ۇيىمداستىرۋىمەن، الماتى قالاسى جاستار ساياساتى ماسەلەلەرى جونىندەگى باسقارماسىنىڭ قولداۋىمەن وتەدى. جارمەڭكەگە قالامىزداعى ەڭ ءىرى ءارى ەڭ ۇزدىك 100-گە تارتا كومپانيا قاتىسپاق.

جۇمىس ىزدەگەن جاس، "مۇمكىندىكتەر جارمەڭكەسىنە" كەلىپ باعىڭدى سىنا!

بالكىم ىزدەگەن جۇمىسىڭدى تابارسىڭ!

ءشارىپحان قايسار

Abai.kz