اتىراۋدا ماكس بوقاەۆ پەن تالعات ايانوۆتىڭ ءىسى بويىنشا باستى سوت وتىرىسى جالعاسىپ جاتىر. بۇگىن بارلىق ساراپشىلاردان جاۋاپ الىنىپ ءبىتتى. سونداي-اق، بۇگىنگى وتىرىستا زاتتاي ايعاقتار قارالا باستادى.

بۇگىن ۇلتتىق قاۋىپسىزدىك كوميتەتى قىزمەتكەرلەرى مەن بىرقاتار كۋاگەردەن دە جاۋاپ الىندى. اتالعان كۋاگەرلەر پروتسەسسكە ەكىنشى رەت قاتىستى، سەبەبى ولاردىڭ العاشقى جاۋاپتارىندا قاراما-قايشىلىق تۋىنداعان بولاتىن. وسى سەبەپتەن قورعاۋشى تاراپتىڭ وتىنىشىمەن بۇل كۋاگەرلەر مەن ۇقك قىزمەتكەرلەرىنەن جاۋاپ الىندى. ولاردىڭ بارلىعىنا ەكى جاقتان، ياعني قورعاۋشى جانە ايىپتاۋشى جاقتان سۇراق قويىلىپ، قاراما-قايشىلىقتار جويىلدى.

جانە دە بۇگىنگى وتىرىستا قىلمىستىق ءىس بويىنشا زاتتاي ايعاقتار قارالا باستادى. ءبىرىنشى ديسك كورسەتىلدى. ىشىندە ىسكە قاتىسى بار ماتەريالدارى بار ديسكىدەن ماكس بوقاەۆتىڭ مەملەكەتتىك جەر كوميسسياسىنا قاتىسپاۋ سەبەبىن تۇسىندىرگەن ۆيدەوسى كورسەتىلدى. سونداي-اق، الەۋمەتتىك جەلىگە تالعات ايانوۆ سالعان 24 ساۋىردە اتىراۋدىڭ يساتاي-ماحامبەت الاڭىندا وتكەن ميتينگىنىڭ ۆيدەوسى نازارعا ۇسىنىلدى. سوت وتىرىسىندا، سونىمەن قاتار ىسكە قاتىسى بار ماتەريالدار، جاريالانىمدار، سكرينشوتتار، ۆيدەو، فوتوسۋرەتتەر مەن سىلتەمەلەر نازارعا ۇسىنىلدى.

ايتا كەتەتىنى، زاتتاي ايعاقتار قارالعان سوت وتىرىسىنا ەشكىم قىزىعۋشىلىق تانىتپادى، سوت زالى بوس بولدى.

ەسكە سالا كەتسەك، م.بوقاەۆ پەن ت.ايانوۆقا قر قىلمىستىق كودەكسىنىڭ ءۇش بابى بويىنشا ايىپتار تاعىلۋدا. اتاپ ايتساق، ولار: 174 باپتىڭ 2 تارماعى، ياعني، الەۋمەتتىك جانە ۇلتتىق الاۋىزدىق تۋعىزۋعا باعىتتالعان قاساقانا ءىس-ارەكەتتەر جاساۋ، ازاماتتاردىڭ ۇلتتىق نامىسى مەن قادىر قاسيەتىنە ءتىل تيگىزۋ; 274 باپتىڭ 4 تارماعى، ياعني، قوعامدىق ءتارتىپتى بۇزۋعا قاۋىپ توندىرەتىن كوپە-كورىنەۋ جالعان اقپارات تاراتۋ; 400 باپ، ياعني، زاڭسىز شەرۋلەردى ۇيىمداستىرۋ، وتكىزۋ جانە وعان قاتىسۋ.

Abai.kz