وڭتۇستىك قازاقستان وبلىسىنىڭ اكىمى جانسەيىت تۇيمەباەۆ، «تۇركسوي» حالىقارالىق ۇيىمىنىڭ باس حاتشىسى دۇيسەن قاسەيىنوۆپەن  شىمكەنت قالاسىندا ورنالاسقان مادەنيەت نىسانداردىڭ تىنىس-تىرشىلىگىمەن تانىسىپ، ونەر قىزمەتكەرلەرىمەن جۇزدەستى.

ەڭ الدىمەن ايماق باسشىسى 2014 جىلى ەلباسىنىڭ قاتىسۋىمەن اشىلعان «تۇركىستان سارايى» عيماراتىندا بولدى. تانىسۋ بارىسىندا وبلىستىق مادەنيەت باسقارماسىنىڭ باسشىسى ن.احمەتجانوۆ مادەنيەت سارايىنىڭ جۇمىسى تۋرالى اقپارات بەردى.

ياعني، ول، 1304 كورەرمەن زالى بار عيماراتتىڭ ساحنادا ورناتىلعان دىبىس كۇشەيتكىشى، جارىق بەرۋ قۇرال-جابدىقتارىنىڭ ساپاسىنىڭ تومەن ەكەندىگىنە توقتالىپ، جوعارى دەڭگەيدەگى كونتسەرت وتكىزۋ ءۇشىن تاعى دا بىرقاتار تەحنيكالاردىڭ جەتىسپەيتىنىن اتاپ ءوتتى.

مادەنيەت ءۇيىنىڭ جاي-كۇيىمەن تانىسقان اكىم وبلىستىڭ مادەنيەتىن رەسپۋبليكالىق جانە حالىقارالىق دەڭگەيگە كوتەرۋ ءۇشىن ەڭ الدىمەن ونەر ۇيلەرىنىڭ جۇمىسىن جانداندىرۋدى ايتىپ، اتالعان مەكەمەگە قاجەتتى قۇرال-جابدىقتاردى الۋ ماسەلەسىن قاراستىرۋدى وبلىس اكىمىنىڭ ورىنباسارى ۇ.سادىبەكوۆكە تاپسىردى.          

سونىمەن قاتار، ءوڭىر باسشىسى جۇمات شانين اتىنداعى وبلىستىق  اكادەميالىق قازاق  دراما تەاترىندا بولىپ، ۇجىممەن كەزدەستى.

مەكەمە 1934 جىلى قۇرىلعان. 2014 جىلدىڭ قاراشا ايىندا جاڭا عيماراتقا كوشىپ، قازاقستان رەسپۋبليكاسى ۇكىمەتىنىڭ 2015 جىلعى 24 اقپانداعى №77 قاۋلىسىمەن «اكادەميالىق» مارتەبە بەرىلگەن.

تەاتر  عيماراتىندا 500 ادامعا ارنالعان  كورەرمەن زالى، مۇراجاي، 2 فويە بار.

ءۇش قاباتتان تۇراتىن تەاتر زاماناۋي قۇرال-جابدىقتارمەن تولىق  جابدىقتالعانىمەن، ساحنالىق جارىق بەرەتىن قۇرال-جابدىقتار مەن جىلۋ جۇيەسى  تالاپقا ساي ەمەس. وسىنى ەسكەرگەن وبلىس اكىمى سالا باسشىلارىنا اتالعان كەمشىلىكتەردى جويۋ ماقساتىندا ءتيىستى شارا قابىلداپ، جۇمىستى جۇيەلەۋدى مىندەتتەدى.

ايماق باسشىسى تەاتر ۇجىمىمەن كەزدەسىپ، بىرقاتار الەۋمەتتىك ماسەلەلەردى تالقىلادى. وندا ونەر ازاماتتارى قىزمەتتىك پاتەرلەردىڭ بولماۋى مەن جاتاقحانانىڭ جەتىسپەۋشىلىگىنەن كاسىبي جاس مامانداردىڭ تۇراقتالمايتىندىعىن جەتكىزىپ، باسقا دا اكتەرلەردىڭ الەۋمەتتىك جاعدايىن ءسوز ەتتى.

ءوز كەزەگىندە مادەنيەت قىزمەتكەرلەرىنىڭ ۇسىنىس-تىلەگىن تىڭداعان وبلىس اكىمى ج.تۇيمەباەۆ وبلىس اكىمىنىڭ ورىنباسارى ۇ.سادىبەكوۆكە، وبلىستىق مادەنيەت باسقارماسىنىڭ باسشىسى ن.احمەتجانوۆقا تەاترعا قاجەتتى قۇرال-جابدىقتاردى الۋ، اكتەرلەردىڭ الەۋمەتتىك ماسەلەسىن شەشۋدى قاراستىرۋدى تاپسىردى.         

سونىمەن قاتار، شىعارماشىلىق ۇجىمنىڭ تالماي ەڭبەك ەتۋىنە، ىزدەنىستەرىنىڭ بۇدان دا  جوعارى دەڭگەيدە بولۋىنا تىلەكتەستىگىن ءبىلدىرىپ، الداعى جىلدارى حالىقارالىق شارالارمەن بىرگە تۇركىتىلدەس ەلدەر اراسىندا وتەتىن  بايقاۋلارعا قاتىسۋعا ارقاشان قولداۋ كورسەتەتىندىگىن جەتكىزدى.

Abai.kz