وڭتۇستىك قازاقستان وبلىسىنىڭ اكىمدىگىندە اۋدان، قالا اكىمدەرىمەن سەلەكتورلىق جيىن ءوتتى. ءوڭىر باسشىسى جانسەيىت تۇيمەباەۆتىڭ توراعالىعىمەن وتكەن ماجىلىستە وبلىس اكىمىنىڭ ورىنباسارلارى، اكىم اپپاراتى جانە وبلىستىق باسقارما باسشىلارى قاتىستى.

كۇن تارتىبىندە، 2016 جىلدىڭ  10 ايىنىڭ قورىتىندىسى مەن بيۋدجەتتىڭ ورىندالۋى جانە «نۇرلى جول» باعدارلاماسىنىڭ ىسكە اسۋى تۋرالى ماسەلەلەر قارالدى.

ءبىرىنشى ماسەلە بويىنشا ءسوز العان وبلىستىق قارجى باسقارماسىنىڭ  باسشىسى ك.مەندەباەۆ وسى جىلدىڭ 10 ايىندا جەرگىلىكتى بيۋدجەتكە تۇسەتىن سالىقتار مەن باسقا دا تۇسىمدەردىڭ جوسپارى 108,2%-عا ورىندالعانىن نەمەسە 6,6 ملرد.تەڭگە ارتىق تۇسكەنىن مالىمدەدى.

ونىڭ ايتۋىنشا، ەسەپتى كەزەڭدە بارلىق اۋدان، قالالاردا كىرىستەر بويىنشا جوسپار اسىرا ورىندالعان. دەسە دە، بىرقاتار اۋدان، قالالار بويىنشا كەيبىر جوبالار اياسىندا يگەرىلمەگەن قارجىلار بار. بۇل ءوز كەزەگىندە، بيۋدجەتتىك باعدارلامالاردا قارالعان شىعىنداردى ۋاقتىلى قارجىلاندىرۋعا كەرى اسەرىن تيگىزەدى دەدى ول.

باسقارما باسشىسى وبلىس بويىنشا بيۋدجەت قارجىسى 97 پايىزعا يگەرىلگەنىن ايتىپ، «نۇرلى جول»، «جۇمىسپەن قامتۋ 2020»، «بيزنەستىڭ جول كارتاسى 2020» باعدارلامالارىنا بولىنگەن قارجىلاردىڭ يگەرىلۋىنە كۇندەلىكتى باقىلاۋدى كۇشەيتۋ قاجەتتىگىنە توقتالدى.

جيىندا «نۇرلى جول» باعدارلاماسىنىڭ ورىندالۋى بويىنشا مالىمدەمە جاساعان وبلىستىق قۇرىلىس باسقارماسىنىڭ باسشىسى س.پولاتوۆ ۇلتتىق قور ەسەبىنەن وبلىستا جۇرگىزىلەتىن 50 نىسان قۇرىلىسىنا 20 194,7 ملن. تەڭگە قارجى بولىنگەنىن جەتكىزدى. اتاپ ايتقاندا، ولار - 26 مەكتەپ، 1 بالاباقشا، 11 ينفراقۇرىلىم، 11 تۇرعىن-ءۇي، 1 جاتاقحانا نىساندارىنىڭ قۇرىلىسى.

سونىمەن بىرگە، س.پولاتوۆ ءبىلىم بەرۋ سالاسى بويىنشا وسى جىلى قۇرىلىسى جاڭادان جوسپارلانعان 17 نىسان قۇرىلىسىنىڭ 5-ءۋى جوسپارلانعان وندىرىستىك كەستەدەن كەشىگىپ جاتقانىن جەتكىزدى. ولار - سايرام، سارىاعاش، شاردارا اۋداندارى مەن شىمكەنت قالاسىنداعى مەكتەپتەر.

سونىمەن قاتار، بايانداماشى شىمكەنتتەگى «تۇرعىنۇيقۇرىلىسجيناقبانكى» اق-ى ارقىلى سالىنىپ جاتقان كرەديتتىك 11 ءۇيدىڭ قۇرىلىسى مەن «جۇمىسپەن قامتۋ-2020» باعدارلاماسى بويىنشا اكىمشىلىك-ىسكەرلىك ورتالىعىنداعى 9 قاباتتى 1 جاتاقحانانىڭ قۇرىلىسى تۋرالى ايتىپ، قۇرىلىس جوسپارلى كەستەگە ساي جۇرگىزىلىپ جاتقانىن جەتكىزدى.

ءوز كەزەگىندە، سالاعا قاتىستى ءسوز العان وبلىستىق ەنەرگەتيكا جانە تۇرعىن ءۇي – كوممۋنالدىق شارۋاشىلىق باسقارماسىنىڭ باسشىسى م.مارايىم بولىنگەن 4 048297,0 مىڭ تەڭگەنىڭ 97 پايىزى يگەرىلگەنىن حابارلادى. ال اقشانى ۋاقىتىلى ۇقساتپاعان نىساندار – «بيزنەستىڭ جول كارتاسى 2020» باعدارلاماسى بويىنشا جۇمىستار جۇرگىزىلىپ جاتقان شىمكەنتتەگى تاسساي يندۋستريالدىق ايماعىنىڭ قۇرىلىسى مەن ماقتارالداعى لوگيستيكالىق ورتالىعىنىڭ ينجەنەرلىك كوممۋنيكاتسيا قۇرىلىسى، تۇلكىباستاعى دەمالىس ايماعىن گازبەن قامتاماسىز ەتۋ جايى جانە تۇركىستانداعى لوگيستيكالىق ورتالىقتىڭ قۇرىلىسى ەكەن.

جيىندى قورىتىندىلاعان ايماق باسشىسى ج.تۇيمەباەۆ قارجىنى كەستەگە سايكەس يگەرە الماي وتىرعان اۋدان، قالا اكىمدەرى جۇمىستى بارىنشا جەدەلدەتۋى قاجەتتىگىن ايتىپ، ونىڭ سەبەبىن ناقتىلاپ، تۇسىنىكتەمە بەرۋى كەرەكتىگىن تاپسىردى. ءسوز سوڭىندا جانسەيىت قانسەيىتۇلى مىندەتتى تاپسىرمالاردى ورىنداماعان شەندىلەردىڭ تارتىپتىك جاۋاپكەرشىلىككە تارتىلاتىنىن دا ەسكەرتتى.

Abai.kz