وڭتۇستىك قازاقستان وبلىسىنىڭ اكىمى جانسەيىت تۇيمەباەۆ قازىعۇرت اۋدانىنداعى «جاسىل جەلەك» مەملەكەتتىك مەكەمەسىنىڭ جۇمىسىمەن تانىسىپ، تۇقىمباقتاعى كوشەتتەردى ارالاپ كوردى.

ءۇش ۋچاسكەلىك بولىكتەن تۇراتىن 60 گەكتار تالىمباقتا بۇگىندە 3,5 ملن. تۇپتەن استام اعاش كوشەتتەرى باپتالۋدا. وسىنداعى جۇمىستاردىڭ جايىن بايانداعان وبلىستىق تابيعي رەسۋرستار جانە تابيعات پايدالانۋدى رەتتەۋ باسقارماسىنىڭ باسشىسى م.وتارشيەۆ تۇقىمباقتا قىلقان جاپىراقتى، دەكوراتيۆتى، جەمىس اعاشتارى مەن بۇتالاردىڭ 40-تان استام ءتۇرى ەگىلگەنىن جەتكىزدى. سونداي-اق، ول تۇقىمباقتاعى ءوسىرىلىپ جاتقان سەپپە جانە تىكپە كوشەتتەرگە تۇراقتى تۇردە كۇتىپ، باپتاۋ جۇمىستارى جۇرگىزىلەتىنىن جانە سۇرانىسقا يە كوشەتتەردىڭ تۇرلەرىمەن تولىقتىرىلىپ وتىراتىنىن ايتتى. ماسەلەن، بيىل مەكەمە تۇقىمباعىندا 912 مىڭ ءتۇپ وسكىن جاڭادان وتىرعىزىلعان.

باسقارما باسشىسىن مۇقيات تىڭداعان وبلىس اكىمى وسىنداعى قىلقان جاپىراقتى جانە دەكوراتيۆتى اعاشتاردىڭ بيىكتىگى 2,5 مەتردەن اساتىن سۇرىپتارىن شىمكەنت قالاسىنىڭ ورتالىعىنداعى 26 كوشەگە وتىرعىزۋدى تاپسىردى.

«وزدەرىڭىز بىلەسىزدەر، حالقى كوپ شىمكەنت قالاسىندا تيىسىنشە، اۆتوكولىكتەردىڭ سانى دا تىعىز. سوندىقتان ەكولوگيانى ساقتاپ، تابيعي بالانستى رەتتەۋ ءۇشىن شىمكەنتتى جاسىل قالاعا اينالدىرىپ، اتىنا لايىقتى ەتۋىمىز كەرەك. شاھاردىڭ كوركىنە ءسان بەرەتىن ءتۇرلى دەكوراتيۆتى اعاشتاردىڭ سانىن كوبەيتۋ ءۇشىن وسى تۇقىمباققا جاڭا كوشەتتەردى ەگۋ كەرەك. شىمكەنتتىڭ كوگالداندىرۋ جۇمىستارىنا ءتيىستى سالا ماماندارى ءبىراۋىزدان جۇمىلدىرۋدى جۇكتەيمىن»،-دەدى اكىم.

شىمكەنتتىڭ كوگالداندىرۋ جۇمىستارىنا ەرەكشە ءمان بەرگەن ايماق باسشىسى بۇل ماسەلەنى جەكە باقىلاۋىنا الاتىنىن ەسكەرتىپ، الداعى ۋاقىتتا قالادا بىرنەشە شاعىن باقتار (سكۆەرلەر) سالىناتىنىن جەتكىزدى.

باسقارما باسشىسىنىڭ ايتۋىنشا، «جاسىل جەلەك» تۇقىمباعىنان قالادا وتىرعىزۋعا ساي كەلەتىن شامامەن 100 مىڭ اعاش كوشەتىن الۋعا بولادى.

مەكەمە قۇرىلعان 11 جىلدا تۇقىمباقتىڭ ەگىندىك بولىمشەلەرىندە 3-4 ملن. دانا ارالىعىندا قىلقان جاپىراقتى، دەكوراتيۆتى، جەمىس اعاشتارى مەن بۇتالاردىڭ 40-تان اسا ءتۇرى ءوسىرىلىپ، وبلىستاعى مەملەكەتتىك مەكەمەلەر مەن حالىقتىڭ سۇرانىسىن قاناعاتتاندىرعان.

وسى كۇنى وبلىس اكىمى شاراپحانا اۋىلدىق وكرۋگىندەگى «نۇرلى جول» باعدارلاماسى بويىنشا سالىنىپ جاتقان م.وتەمىسۇلى اتىنداعى 300 ورىندىق مەكتەپتىڭ قۇرىلىسىمەن تانىستى. كەلەر جىلعا وتپەلى نىساننىڭ ساپاسىن قاداعالاعان ايماق باسشىسى قۇرىلىس جۇمىستارىن مەرزىمىندە اياقتاپ، وندا قولدانىلاتىن قۇرىلىس زاتتارى وتاندىق بولۋىن ايتتى.

اباي اقپارات