پولشا پارلامەنتى قازاقستاننىڭ ەۋرو وداق ەلدەرىمەن سەرىكتەستىكتى نىعايتۋ تۋرالى كەلىسىمدى راتيفيكاتسيالادى. بۇل تۋرالى قر سىرتقى ىستەر مينيسترلىگى مالىمدەپ وتىر.

4-قاراشا كۇنى وتكەن پولشا پارلامەنتى سەناتىنىڭ پلەنارلى وتىرىسىندا ەۋرو وداق ەلدەرى مەن قازاقستان اراسىنداعى ىنتىماقتاستىقتى نىعايتۋ تۋرالى كەلىسىمدى تالقىلاعان جيىنعا پولشا سەناتىنىڭ 70 دەپۋتاتى قاتىسقان. قازاقستاننىڭ ەۋرو وداقپەن ينتەگراتسياسىن قولداپ 69 دەپۋتات داۋىس بەرىپتى.

ۇسىنىس جاساعان سەناتور گجەگوج ناپەرالسكي جيىن بارىسىندا ورتالىق ازياداعى قازاقستاننىڭ بەدەلى، 25 جىلداعى قازاقستاننىڭ ساياسي-ەكونوميكالىق، يندۋستريالدى-يننوۆاتسيالىق جەتىستىكتەرى مەن قازاقستان-ەۋروپا قارىم-قاتىناستارىنىڭ ستراتەگيالىق ماڭىزدىلىعىن اتاپ وتكەن.

ءسويتىپ، داۋىس قورتىندىسى مەن قۇجات ءماتىنىن پولشا سەناتىنىڭ مارشالى (سپيكەرى) ستانيسلاۆ كارچەۆسكي قازاقستاننىڭ وكىلەتتى ەلشىسى التاي ابيبۋللاەۆقا سەنات قابىرعاسىندا تابىس ەتتى.

پولياك دەپۋتاتتارىنىڭ ءبىر اۋىزدان  داۋىس بەرۋىنە سەبەپ – قازاقستان پرەزيدەنتى نۇرسۇلتان نازارباەۆتىڭ 22-23 تامىز كۇندەرى پولشاعا جاساعان ساپارى بولسا كەرەك.

ول جولى 2017 جىلدىڭ 1-قاڭتارىنان باستاپ پولشا مەن قازاقستان اراسىندا ۆيزاسىز رەجيم ورناتۋ جانە استانا-ۆارشاۆا اراسىندا توتە اۋە رەيسىن اشۋ تۋرالى كەلىسىمدەرگە قول قويىلعان ەدى.

ء«بىز قازاقستان مەن ەو اراسىنداعى بايلانىستىڭ نىعايعانىن قالايمىز. اسىرەسە، نۇرسۇلتان ءابىشۇلىنىڭ پولشاعا ارنايى كەلۋى ەكى جاقتى قارىم-قاتىناستىڭ جوعارى ماڭىزعا يە ەكەندىگىن كورسەتەدى جانە پولشا - قازاقستاننىڭ ەۋروپاداعى تەرەزەسى بولۋعا دايىن»,-دەيدى  سەنات مارشالى (سپيكەرى) س. كارچەۆسكي.

ايتا كەتەيىك، وسىعان دەيىن سلوۆاكيا، رۋمىنيا، ۆەنگريا، اۋستريا، شۆەيتساريا مەن  نيدەرلاندى دا قازاقستان - ەۋرو وداق ينتەگراتسياسىن،  ۆيزاسىز رەجيم ورناتۋ ماسەلەلەرىن قولدايتىنىن بىلدىرگەن-ءدى.

ەۋرو وداق - قازقاستاننىڭ ەگەمەندىك العان كۇننەن بەرگى باستى سەرىكتەسى. العاشقى جىلدارى ەو مەن قازاقستان اراسىنداعى ديالوگ ساۋدا، ينۆەستيتسيا سەكىلدى ماسەلەلەر توڭىرەگىندە وربىسە، 2002 جىلدان بەرى ەنەرگەتيكا، ترانسپورت، قۇقىقتىق قۇرىلىمدار، ورتاق ساياسي ديالوگتاردى قامتيتىن اۋقىمدى جوبالار ارقىلى ءورىس تابۋدا.

ەو مەن قازاقستان بايلانىسىنا نەگىز بولعان قۇجات – سەرىكتەستىك تۋرالى قۇجات (1995 جىلى قول قويىلىپ، 1999 جىلى كۇشىنە ەنگەن).

وڭىرلىك دەڭگەيدە قازاقستان ەو-نىڭ ورتالىق ازياداعى باستى سەرىكتەسىنە اينالدى.

ال 2012 جىلى ەو ەكى جاقتى قارىم-قاتىناستاردىڭ ناجيجەسىن جاريالادى.

قازاقستان مەن ەو اراسىنداعى ىنتىماقتاستىقتى نىعايتۋ جانە سەرىكتەستىكتىڭ تەرريتوريالىق كولەمىن كەڭەيتۋ تۋرالى كەلىسىمدەر 2011 جىلى 27 ماۋسىمدا بريۋسسەلدە تالقىلاندى. 8 راۋندتتىق تالقىنىڭ قورىتىندىسى بويىنشا ەكى جاق كەلىسىمگە كەلگەن.

نۇرزات توعجان

Abai.kz