جىل سايىن قاراشا ايىنىڭ ورتاسىندا جاڭا جىلعا دايىندىق باستالىپ كەتەدى. جىل سايىن تاۋەلسىزدىك مەرەكەسى سول جاڭا جىلدىڭ تاساسىندا قالىپ جاتادى. بۇل ۇلتتىق مەرەكەمىزگە - مازاق! بۇل مەملەكەت ءۇشىن كوپە-كورنەۋ - ۇيات! 

بيىل تاۋەلسىزدىك مەرەكەسىنىڭ 25 جىلدىعى تۇسىندا جەر-جەردە جاڭا جىلدىق ازىرلىكتەردى تاۋەلسىزدىك مەرەكەسىنەن ەرتە باستاۋعا تىيىم سالىنۋى كەرەك! قانداي دا ءبىر سىلتاۋمەن بولسا دا جاڭا جىلدىق بەزەندىرۋگە، شىرشا، "دەد موروزدارعا" جول بەرىلمەگەنى دۇرىس. كوبى بىلسە دە بىلمەگەنسىپ، ءوز بىلگەندەرىن ىستەپ جاتادى. سوندىقتان قۇلاق اسپاعان جەكە تۇلعالارعا 50 اەك، زاڭدى تۇلعالارعا 100 اەك ايىپ سالىنسىن! 

ءبىز ءۇشىن جاڭا جىل مەرەكەسىنەن گورى ۇلتتىق مەرەكەمىز - تاۋەلىزدىك كۇنى قىمبات! ەلباسىنىڭ استانادا شىرشا وتتارىن جاعۋى تاۋەلسىزدىك مەرەكەسىنەن كەيىن جۇزەگە اسىرىلۋى ورىندى بولادى. بۇل رەسمي بيلىكتىڭ ۇلتتىق قۇندىلىقتارعا كوزقاراسىن بىلدەرەتىن ءسات. 

ەگەر بيىل دا بۇرىنعى جىلدارداعىداي تاۋەلسىزدىك مەرەكەسى "نوۆىي گودتىڭ" تاساسىندا قالسا وندا ەڭ ۇلى ۇلتتىق قۇندىلىعىمىزدىڭ بيلىك ءۇشىن قۇنى كوك تيىنعا دا تۇرمايتىنىن بىلەتىن بولامىز.

بۇل قازاقستانداعى قازاق جۇرتشىلىعىنىڭ رەسمي حاتى.

مارات توقاشباەۆ

 Abai.kz