№2 اتىراۋ قالالىق سوتىندا ماكس بوقاەۆ پەن تالعات ايانوۆتىڭ ءىسى بويىنشا باستى سوت وتىرىسى جالعاسىپ جاتىر. بۇگىنگى وتىرىستا ساراپشىلاردان جاۋاپ الىندى.

بۇگىن الماتى قالاسى بويىنشا سوت ساراپتاماسى ينستيتۋتىنىڭ باس ساراپشىسى بيبىگۇل جۇماشەۆا كۋالىك ەتتى. ساراپشى م.بوقاەۆ پەن ت.ايانوۆ تاراتقان مالىمەتكە پسيحولوگيالىق-فيلولوگيالىق ساراپتاما جاساعان. جۇماشەۆا جاساعان ساراپتاما قورىتىندىسىنا سايكەس، زەرتتەلگەن ماتەريالدار مەن ماتىندەردىڭ تەرىس ىقپالى بار. بۇل مالىمەتتەردە اۆتورلار جەر ماسەلەسى بويىنشا حالىقتى اقپاراتتاندىرىپ قانا قويماي، ءوز پىكىرىن ءبىلدىرۋ ءۇشىن بەيبىت شەرۋگە قاتىسۋعا شاقىرعان. ءتۇرلى ۇراندار تاستاعان. اتالعان ماتەريالدار بيلىك، دالىرەك ايتساق ونىڭ جەر رەفورماسىنا قاتىستى جۇمىسىنا تەرىس، سىني كوزقاراس پەن قارىم-قاتىناستى قالىپتاستىرعان. ب.جۇماشەۆا وتىرىستا ساراپتاما قورىتىندىسىن راستاپ، ءوز جۇمىسىنا قاتىستى سۇراقتارعا جاۋاپ بەرىپ، مىسالداردى دا كەلتىردى.

قورعاۋشى تاراپ ادەتتەگىدەي ءبىر سۇراقتى مىڭ قۇبىلتىپ، بىرنەشە قايتارا قويۋمەن بولدى. سونداي-اق، ساراپتاماعا قاتىسى جوق ساۋالداردى قويۋدى جالعاستىردى. ولاردىڭ كەيبىر سۇراقتارىن سۋديا گ.داۋلەشوۆا قابىلداماي تاستاعاننان كەيىن، م.بوقاەۆتىڭ قورعاۋشىسى ج.بوقاەۆا «مەن ءتىپتى ءوزىمدى باسقالاردان كەم ساناي باستادىم» دەدى. ءوز كەزەگىندە پروكۋرورلار قورعاۋشى تاراپتان ناقتى، جۇيەلى سۇراق قويۋدى ءوتىندى.

ال سوتتالۋشى ماكس بوقاەۆ وتىرىس بارىسىندا تاعى دا سۋديانىڭ رۇقساتىنسىز ۇزىن-سونار پىكىرىن بىلدىرۋمەن بولدى. سۋديا گ.داۋلەشوۆا كەشەدەن بەرى سوتتالۋشىنى بىرنەشە رەت ەسكەرتكەنىن ايتىپ، سوت وتىرىسى ءتارتىبىن بۇزعانى ءۇشىن م.بوقاەۆتى سوت زالىنان شىعارۋ تۋرالى شەشىم قابىلدادى.

ەسكە سالا كەتسەك، 2016 جىلدىڭ ءساۋىر ايىندا ت.ايانوۆ پەن م.بوقاەۆ جەر زاڭناماسىنا قوعامنىڭ قىزىعۋشىلىعى ارتقان ءساتىن پايدالانىپ، «جەر ماسەلەسى» بويىنشا قارسىلىق اكتسيالارىن ۇيىمداستىرعان. سوتتالۋشىلار ايانوۆ پەن بوقاەۆ تۇرعىنداردى جەر تاقىرىبىنا ەلىكتىرىپ، حالىقتىڭ پاتريوتتىق سەزىمىن ءوز جەكە باسىنىڭ مۇددەسىنە پايدالانىپ، «Facebook» الەۋمەتتىك جەلىسىندەگى جەكە پاراقشالارىندا «ەل باسشىلىعى اۋىل شارۋاشىلىعى جەرلەرىن شەتەلدىك ازاماتتار مەن كومپانيالاردىڭ جەكەمەنشىگىنە اينالدىرۋدى جوسپارلاۋدا» دەگەن سيپاتتاعى جالعان اقپارات تاراتقان. سونداي-اق، م.بوقاەۆ پەن ت.ايانوۆ جەر ماسەلەسىنە قاتىستى ارنايى قۇرىلعان جەر كوميسسياسىنىڭ وتىرىسىنا قاتىسۋدان باس تارتىپ، جەر كودەكسىنە ەنگىزىلگەن تۇزەتۋلەردى الىپ تاستاۋعا قارسىلىق ءبىلدىرۋ ءۇشىن جۇرتتى 21 مامىردا قارسىلىق اكتسياسىنا شىعۋعا شاقىرعان. بوقاەۆ پەن ايانوۆقا قر قىلمىستىق كودەكسىنىڭ ءۇش بابى بويىنشا ايىپتار تاعىلۋدا.

اباي-اقپارات