اتىراۋ قالاسىندا ماكس بوقاەۆ پەن تالعات ايانوۆتىڭ ءىسى بويىنشا باستى سوت وتىرىسى ءالى جالعاسىپ جاتىر. قازىرگى ۋاقىتتا ىسكە قاتىسى بار كۋاگەرلەردەن جاۋاپ الىنىپ، وقيعانىڭ ءمان-جايى انىقتالۋ ۇستىندە.

بۇگىنگى وتىرىستا ميتينگكە قاتىسقان ت.ايانوۆتىڭ سىنىپتاسى جەڭىس نۇرپەيىسوۆ كۋالىك ەتتى. كۋاگەردىڭ ايتۋىنشا، وعان ايانوۆتان WhatsApp ارقىلى ميتينگ تۋرالى حابارلاما مەن بەينەروليك كەلگەن. دالىرەك ايتساق، ميتينگكە شاقىرعان ۇرانى بار 3 سۋرەت پەن 2 بەينەروليك تۇسكەن. حابارلامادا «اتىراۋلىقتار، ميتينگكە كەلىڭدەر. ۇكىمەت 1 شىلدەدەن باستاپ قىتايعا 1 ملن گەكتار اۋىل شارۋاشىلىعى جەرىن 25 جىلعا جالعا بەرمەكشى. بارلىعىمىز جينالىپ، بۇعان قارسى تۇرۋعا ۋاقىت كەلدى. ايتپەسە، كەش بولىپ كەتەدى، جەرىمىزدەن ايىرىلىپ، قۇلعا اينالامىز. ال وزدەرىڭە جانە بالالارىڭا قىتاي ءتىلىن وقۋعا تۋرا كەلەدى...» دەلىنگەن. حابارلاما سوڭىندا بۇل اقپاراتتى WhatsApp, Facebook, ۆك جەلىلەرىنە تاراتىڭىزدار دەپ ايتىلعان. سونداي-اق، ايانوۆ 21 مامىردا يساتاي-ماحامبەت الاڭىندا ميتينگ وتەدى دەگەن حابارلاما جىبەرگەن. 

سوت وتىرىسىندا تالعات ايانوۆ وسىنداي حابارلامالاردى جىبەرگەنىن مويىندادى. «مەن ادامداردى شاقىرماسام، ميتينگكە ەشكىم كەلمەۋشى ەدى. مەن ولاردى شاقىردىم، ونى مويىندايمىن»، - دەدى ايانوۆ. 

ال م.بوقاەۆپەن جانە ت.ايانوۆپەن الەۋمەتتىك جەلىدە دوس بولعان كۋاگەر تەمىرعالي جۇماشەۆ ميتينگكە قاتىسپاسا دا، سول تۋرالى اقپاراتپەن، بەينەروليكتەرمەن تانىسىپ، تاراتقانىن ايتتى. كۋاگەردىڭ مالىمەتىنشە، ول ۆيدەو ارقىلى بوقاەۆ پەن ايانوۆتىڭ ميتينگكە قاتىسقانىن جانە ءسوز سويلەگەنىن كورگەن. كۋاگەر، سونداي-اق، ءوزىنىڭ تۇراقتى تۇردە مەملەكەتتىك ساياساتقا قارسى مالىمەتتەرمەن، جەر ماسەلەسىنە قاتىستى ماتەريالدارمەن ءبولىسىپ وتىرعانىن جاسىرمادى.

ەسكە سالا كەتسەك، م.بوقاەۆ پەن ت.ايانوۆقا قر قىلمىستىق كودەكسىنىڭ ءۇش بابى بويىنشا ايىپتار تاعىلۋدا. اتاپ ايتساق، ولار: 174 باپتىڭ 2 تارماعى، ياعني، الەۋمەتتىك جانە ۇلتتىق الاۋىزدىق تۋعىزۋعا باعىتتالعان قاساقانا ءىس-ارەكەتتەر جاساۋ، ازاماتتاردىڭ ۇلتتىق نامىسى مەن قادىر قاسيەتىنە ءتىل تيگىزۋ; 274 باپتىڭ 4 تارماعى، ياعني، قوعامدىق ءتارتىپتى بۇزۋعا قاۋىپ توندىرەتىن كوپە-كورىنەۋ جالعان اقپارات تاراتۋ; 400 باپ، ياعني، زاڭسىز شەرۋلەردى ۇيىمداستىرۋ، وتكىزۋ جانە وعان قاتىسۋ.