كەشەلى بەرى جۇرت جاماقۇلوۆتىڭ جەپ قويعانىن ءسوز ەتىپ جاتقاندا، تاسادا قالعان تاعى ءبىر تاقىرىپ مىڭباەۆتىڭ مىڭعىرعان «زامى» بولدى.

«قازمۇنايگاز» كومپانياسىنىڭ باسشىسى ساۋات مىڭباەۆ 30-عا جۋىق ورىنباسار ۇستايتىنىن، «kaz.365info.kz» پورتالى جازادى.

كومپانيانىڭ باسقارۋشىلىق كورپۋسىندا 3 اتقارۋشى ۆيتسە-پرەزيدەنت، 11 اعا ۆيتسە-پرەزيدەنت، 8 قاتارداعى ۆيتسە-پرەزيدەنت جانە 6 باسقارۋشى ديرەكتور بار ەكەن.

مىڭباەۆتىڭ "مىڭ بايىنىڭ" اراسىندا ەلىمىزدىڭ ەكس-باس پروكۋرورى راشيد تۇسىپبەكوۆتىڭ ۇلى، كەزىندە ءبىلىم بەرۋ ۆيتسە-ءمينيسترى بولعان تاحير بالىقباەۆتىڭ بالاسى، ينۆەستيتسيالار جانە دامۋ جونىندەگى مينيستر جەڭىس قاسىمبەكتىڭ تۋعان ءىنىسى، «ميستەر پاتامۋشتا» اتانىپ كەتكەن سەرىك ابدەنوۆ بار ەكەن.

جالپى مىڭباەۆقا  قاتىستى مىڭ ءتۇرلى پىكىرلەر ايتىلادى. ساۋاتتىڭ ساۋاتى تۋرالى اناۋ-مىناۋ دەمەسەك تە، قازاقستاننىڭ بىرنەشە مينيسترلىگىنىڭ تىزگىنىن ۇستاعان مىڭباەۆتىڭ مۇناي-گاز سالاسىنا باسشىلىق جاساعانىنا دا 9 جىل تولىپتى.

كەزىندە پرەمەر-مينيستر قىزمەتىن اتقارعان جالعىز مۇنايشى  نۇرلان بالعىمباەۆ «قازمۇنايگاز» كومپانياسىنىڭ  وتە يكەمسىز جانە شىعىنعا مەيلىنشە باتقان ءتيىمسىز قۇرىلىم ەكەندىگىن ايتقان ەدى.

وسىدان بىرنەشە كۇن بۇرىن قر پرەزيدەنتى اكىمشىلىگىنىڭ جەتەكشىسى ادىلبەك جاقسىبەكوۆ قاپتاعان كوپ شەنەۋنىكتەردى جاپپاي قىسقارتۋ تۋرالى ۇسىنىس ايتقان بولاتىن.

ء«بىزدىڭ ەلدەگى نەگىزگى پروبلەمالاردىڭ ءبىرى – مەملەكەتتىك قىزمەتكەرلەردىڭ كوپتىگى. ءۇشىنشى توقساننىڭ قورىتىندىسى بويىنشا، قر قارجى مينيسترلىگىندە 970 ورىن، ۇلتتىق ەكونوميكا مينيسترلىگىندە 900 ورىن بار ەكەن. وڭىرلەر مەن ءىرىلى-ۇساقتى كومپانيالاردا دا ءدال وسى جاعداي قايتالانادى»، - دەگەن ءپا جەتەكشىسى كەرەكتى-كەرەكسىز شتاتتاردى قىسقارۋ كەرەكتىگىن ەسكەرتكەن-ءتىن.

سونىمەن، «قازمۇنايگاز» كومپانياسىنىڭ باسشىسى ساۋات مىڭباەۆ پەن ونىڭ وتىز ورىنباسارى نە ىستەپ، نە تىندىرىپ ءجۇر؟ ىلعي ىعاي مەن سىعايلاردان قۇرالعان باسشىلىق قۇرام مۇنايلى قازاقستاننىڭ قارقىنداپ دامۋىنا، حالىقتىڭ تۇرمىس-تىرشىلىگىنىڭ جاقسارۋىنا، الەمدىك نارىقتاعى قازاقستان مۇناي برەندىنىڭ قالىپتاسۋىنا نە ۇلەس قوستى؟

كونسالتينگتىك قىزمەتتەن كوز اشپاي كەلە جاتقان قازاقستاننىڭ مۇنايىن مىڭباەۆتار جامباستاپ جاتقاندا ەكونوميكادان نە وزگەرىس كۇتۋىمىز كەرەك؟ ورداسىنا وتىز ورىنباسار ۇستاعان مىڭباەۆتىڭ مۇنىسى نەسى؟

نۇرگەلدى ابدىعانيۇلى

Abai.kz