«25 جۇلدىزدى كۇن»! الماتى وبلىسى تاۋەلسىزدىكتىڭ 25 جىلدىعىن وسىنداي ۇرانمەن قارسى الماق. ايماقتا مەرەيتويلىق داتانى كەڭ كولەمدە اتاپ ءوتۋدىڭ كەشەندى جوسپارى ازىرلەندى. مەرەكەنىڭ نەگىزگى باعدارلاماسىنا قوسىمشا ايتۋلى كۇنگە ايشىقتى رەڭك بەرەتىن 25 ءىرى شارا وبلىس تۇرعىندارىنا ەرەكشە سىي بولماق. «25 جۇلدىزدى كۇن» 21 قاراشادان باستالىپ، 15 جەلتوقسانعا دەيىن جالعاسادى، - دەپ حابارلايدى اباي-اقپارات.

وبلىستىق ىشكى ساياسات باسقارماسىنىڭ باسشىسى ر. الپىسباەۆتىڭ ايتۋىنشا، مەرەيتويلىق شارالار الەۋمەتتىك-ەكونوميكالىق دامۋدىڭ بارلىق سالالارىن  قامتيدى. اتاپ ايتقاندا، جۇلدىزدى كۇندەر اياسىندا زامانۋي كاسىپورىنداردىڭ اشىلۋى، جاڭا جۇمىس ورىندارىنىڭ قۇرىلۋى، ءتۇرلى قايىرىمدىلىق شارالارى، تۇرعىن ۇيلەردى جانە باسقا دا الەۋمەتتىك ماڭىزدى نىسانداردى پايدالانۋعا بەرۋ، سپورتتىق جارىستار، كىتاپتاردىڭ، دەرەكتى فيلمدەردىڭ تۇساۋكەسەرلەرى جانە باسقا دا شارالار بار.

 - «25 جۇلدىزدى كۇننىڭ» اسا ءىرى وقيعاسىنىڭ ءبىرى رەتىندە ءبىر كۇندە 25 بالاباقشانىڭ قاتار اشىلۋىن اتاپ وتۋگە بولادى. ولاردىڭ بارلىعى دا مەملەكەتتىك-جەكەمەنشىك سەرىكتەستىك نەگىزىندە سالىنعان.

تاعى ءبىر ماڭىزدى شارا وبلىستىڭ 25 ەلدى مەكەنىنە كوشپەلى «سكرينينگ» شىعىپ، مەديتسينالىق قىزمەت كورسەتەتىن بولادى.

وبلىستىڭ 75 ەلدى مەكەنىن قامتيتىن «جىبەك جولى» قايىرىمدىلىق شاراسى دا ەرەكشە بولماق. اكتسيا اسىندا ءسۇيىنباي اتىنداعى وبلىستىق فيلارمونيا مەن ب. ريموۆا اتىنداعى دراما تەاترىنىڭ، «تالدىقورعان اۋەندەرى» ءانسامبلىنىڭ ارتىستەرى گاسترولدىك ساپارعا شىعادى، - دەيدى ر.الپىسباەۆ.

مەرەيتوي قارساڭىندا جاڭا پاتەر كىلتتەرىن سالتاناتتى جاعدايدا تابىستاۋ شارالارى دا ۇيىمداستىرىلىپ، تالدىقورعان قالاسىندا 168 پاتەرلى جالدامالى ءۇي پايدالانۋعا بەرىلسە، تالعار قالاسىندا جاڭا 64 پاتەردىڭ يەسى قۋانىشقا كەنەلمەك.

«تالدىقورعان – باق قالا» اكتسياسىنىڭ جالعاسى رەتىندە وبلىس ورتالىعىندا 25 مىڭ ءتۇپ اعاش وتىرعىزىلادى. تالانتتى جاستار 25 كۇي ورىنداپ، ءبىر مەزەتتە 25 تاقتادا شاحمات وينالادى.

سونىمەن قاتار قاراساي، قاراتال، كەربۇلاق اۋداندارىندا 3 مەكتەپ اشىلسا، عارىشكەر ايدىن ايىمبەتوۆپەن جۇلدىزدى گيد وتكىزىلەدى. 

اباي-اقپارات