وڭتۇستىك قازاقستان وبلىسىنىڭ اكىمى جانسەيىت تۇيمەباەۆتىڭ توراعالىعىمەن شىمكەنت قالاسىنىڭ دامۋى بويىنشا ءماجىلىس ءوتتى.

كۇن تارتىبىندە قالانىڭ باس جوسپارىنىڭ ورىندالۋى، جول ينفراقۇرىلىمى مەن قالا اۋماعىنا اعاش وتىرعىزۋ سىندى ءۇش ماسەلە قارالدى.

جيىندى جۇرگىزگەن ايماق باسشىسى شىمكەنتتى ەلىمىزدىڭ ءۇشىنشى مەگاپوليسىنە اينالدىرۋ ءۇشىن ەلباسىنىڭ وسى جونىندەگى تاپسىرمالارىنىڭ جۇزەگە اسۋىنا بارىنشا جاۋاپكەرشىلىكپەن قاراپ، ونىڭ دامۋىنا بىرلەسە كۇش سالۋ قاجەتتىگىن ايتتى. بۇگىندە شاھارداعى قالا حالقىنىڭ سانى 904 مىڭعا جەتكەنىن ەسكەرگەن اكىم تىركەۋگە الىنباعان بىرقاتار ازاماتتاردىڭ بار ەكەنىن بولجاپ، كەلەر جىلى ستاتيستيكالىق مالىمەت بويىنشا قالا تۇرعىندارىنىڭ سانى 1 ميلليونعا جەتەدى دەپ جوسپارلانىپ جاتقانىن ايتتى.

ماجىلىستە شىمكەنت قالاسىنىڭ باس جوسپارىنىڭ ىسكە اسىرىلۋى مەن كۇن تارتىبىندەگى باسقا دا ماسەلەلەر جايىن بايانداعان قالا اكىمى عابيدوللا ءƏبدىراحىموۆ 2025 جىلعا قاراي  قالا حالقىنىڭ سانى 1 ملن. 200 مىڭعا جەتىپ، كوپقاباتتى تۇرعىن ۇيلەردىڭ قاتارى 52 پايىزعا ارتۋ كەرەكتىگىن ايتتى. بۇل مەگاپوليس ستاتۋسىنا ەنۋدىڭ بىردەن-ءبىر تالابى.

ايتا كەتەرلىگى، قازىرگى تاڭدا، قالا اۋماعى 80-نەن استام اۋىل تيپتەس ەلدى مەكەننەن تۇرادى. ونىڭ 70 پايىزدان استامى جەكە سەكتور بولىپ وتىر. بۇل، اۋەلى ول جەرلەرگە ينجەنەرلىك، كولىك جانە باسقا دا قىزمەت كورسەتۋ نىساندارىن سالۋدا بيۋدجەتتەن اۋقىمدى قارجىنى قاجەت ەتەدى. ەكىنشىدەن، جەرلەر ءتيىمسىز پايدالانىلعان. وسى ماسەلەلەردى شەشۋ ءۇشىن  قالانىڭ باس جوسپارى بەكىتىلىپ، جوسپارلى جۇمىستار جۇرگىزىلۋدە.           

سونىمەن قاتار،  جول ينفراقۇرلىمى وزەكتى ماسەلەلەردى وڭتايلى شەشۋ، قالا اۋماعىندا كوگالداندىرۋ جۇمىستارىن جۇيەلەۋ باستى نازاردا ەكەنىن اتاپ وتكەن قالا باسشىسى، بۇل باعىتتا قالانىڭ دامۋ تۇجىرىمداماسى جاسالىنىپ، كولىك ينفراقۇرىلىمى مەن قوعامدىق كولىك ماسەلەسى زەردەلەنگەنىن جەتكىزدى.

بۇل ماقساتتا «Green Bus» كومپانياسىمەن بىرلەسىپ، مۋنيتسيپالدى «شىمكەنت Bus» مەكەمەسى قۇرىلىپ، جىل سوڭىنا دەيىن 100 جاڭا اۆتوبۋس  الۋ جوسپارلانۋدا. سونىمەن قاتار، كولىك تىعىنى ءجيى ورىن الاتىن 5 جەردەن جولايرىقتار سالۋ جونىندە شەشىم قابىلداندى. قازىرگى تاڭدا، جوبالىق-سمەتالىق قۇجاتتارى ازىرلەنۋدە.

قالانىڭ كوگالداندىرۋ جۇمىستارىنا توقتالعان ع.ءƏبدىراحىموۆ وتكەن جىلى 100 مىڭ ءتۇپ اعاش وتىرعىزىلسا، بيىل 112 مىڭ ءتۇپ اعاش ەگۋ جوسپارلانعانىن جەتكىزدى. بيىلعى جىلدىڭ كوكتەمىندە ونىڭ 32 مىڭى وتىرعىزىلىپ، ال قاراشا-جەلتوقسان ايلارىندا 72 مىڭ ءتۇپ جاسىل جەلەك ەگىلمەك.

جوعارىدا اتالعان ماسەلەلەرگە قانىق بولعان ءوڭىر باسشىسى قالانى كوگالداندىرۋدى اۋەجايدان باستاۋ قاجەتتىگىنە توقتالىپ، شاھاردى جاسىل جەلەككە اينالدىرىپ، شىمقالا اتىنا لايىقتى ەتۋدى مىندەتتەدى. سونىمەن قاتار، شاھارعا وتىرعىزىلاتىن اعاشتار سانىنا ەمەس ساپاسىنا جانە سۇرىپىنا نازار اۋدارۋدى اتاپ ءوتتى.

جيىندى قورىتىندىلاعان ج.تۇيمەباەۆ 2012 جىلى بەكىتىلگەن العاشقى باس جوسپاردا تۇرعىن ءۇي قورىنىڭ 60 پايىزى كوپقاباتتى بولۋ كەرەك بولسا، بۇگىندە بۇل كورسەتكىش نەبارى 30 پايىزعا عانا جەتكەنىن سىنعا الدى. وسىنى ەسكەرگەن اكىم شىمكەنتتە باسپاناسىز جۇرگەن جاستارعا قول جەتىمدى بولۋ ماقساتىندا الەۋمەتتىك تۇرعىن ۇيلەردى كوپتەپ سالىپ، قالا شەتىندەگى جاسىل بەلدەۋدىڭ كولەمىن 3 مىڭ گا-عا دەيىن ۇلعايتۋ كەرەكتىگىن ايتتى.

وقو اكىمىنىڭ ءباسپاسوز قىزمەتى