ورداباسى اۋدانىندا «التىن كۇز» مەرەكەسى سالتاناتتى تۇردە اتالىپ ءوتتى. مەرەكەدە اۋىل شارۋاشىلىق ونىمدەرىنىڭ جارمەڭكەسى مەن  شارۋاشىلىق تەحنيكاسى جانە اسىل تۇقىمدى مال كورمەسىن ۇيىمداستىردى. شاراعا قاتىسقان اۋدان اكىمى ا.مامىتبەكوۆ بارشا اۋىل شارۋاشىلىق سالاسىنىڭ ماماندارىن مەرەكەمەن قۇتتىقتاپ، ءوز ەڭبەكتەرىمەن جوعارى كورسەتكىشتەرگە يە بولعان اۋدان ەڭبەككەرلەرىن ماراپاتتادى.

جەرى شۇرايلى، ازاماتتارى ەڭبەكسۇيگىش، ىنتىماعى مەن بىرلىگى جاراسقان ورداباسى ءوڭىرى تاۋەلسىزدىگىمىزدىڭ 25 جىلىندا تۇراقتى دامۋ جولىنا ءتۇسىپ، ەلىمىزدىڭ ىلگەرى باسۋىنا وزىندىك ۇلەسىن قوسىپ كەلەدى. 

1995 جىلى وڭتۇستىك قازاقستان وبلىسى بويىنشا بارلىق اۋىلشارۋاشىلىق قۇرىلىمىنىڭ سانى 8275-ءتى قۇراسا، ونىڭ 158-ءى ياعني 1,9 پايىزى عانا وسى اۋماقتان بولاتىن. 21 جىلدا بۇل كورسەتكىش وبلىستا 72 417-گە جەتسە، بۇگىندە ورداباسىلىقتاردىڭ ۇلەسى 5505-كە تۇراقتادى. 

بۇل جالپى وبلىستاعى اۋىلشارۋاشىلىق قۇرىلىمنىڭ 7,6 پايىزىن قۇرايدى. جالپى، ورداباسى اۋدانى بيىلعى جىلدى دا اۋىل شارۋاشىلىق ونىمدەرى بويىنشا جاقسى كورسەتكىشتەرمەن اياقتادى دەۋگە نەگىز بار.

اتاپ ايتساق: «سىباعا» باعدارلاماسىن جۇزەگە اسىرۋ بويىنشا وبلىس كورسەتكىشى 20 173 ءىرى قارا مالدى قۇراسا، ونىڭ 5,2 پايىزدىق ۇلەسى ورداباسىعا تيەسىلى، ال «التىن اسىق» باعدارلاماسىمەن 2903 ۋاق مال الىندى. بۇل وبلىستىق كورسەتكىشتىڭ 9,2 پايىزى. «قۇلان» باعدارلاماسىمەن الىنعان 741 اسىل تۇقىمدى جىلقىنىڭ وبلىستاعى ۇلەسى 16,5 پايىزدى قۇرادى.

سونداي-اق، وسى جىلى اۋىل شارۋاشىلىعى داقىلدارىنىڭ ەگىستىك القابى 357 گەكتارعا ارتىپ، 54 357 گەكتاردى قۇرادى. وتكەن جىلمەن سالىستىرعاندا ماقتانىڭ ەگىستىگى – 62 پايىزعا، بيدايدىڭ ەگىستىگى – 32 پايىزعا، كارتوپتىڭ – 3,7 پايىزعا ۇلعايدى. اۋداندا بيىل 30 259 توننا بيداي، 15 028 توننا ماقتا، 68 650 توننا كوكونىس، 43 500 توننا باقشا ونىمدەرى جينالدى.

اۋىلداردىڭ ەرەكشەلىگى ەسكەرىلىپ، ونىمدىلىكتى ارتتىرۋ بويىنشا اتقارىلعان جۇمىستىڭ ناتيجەسىندە 5 اۋىلشارۋاشىلىق وندىرىستىك كووپەراتيۆ قۇرىلدى. ەندىگى كەزەكتە، اۋىلدىق وكرۋگتەردە متس اشۋ  جوسپارلانۋدا. بيىل اۋداندا 500 گەكتار جاڭادان جەمىس باۋلارى ەگىلسە، ونىڭ ىشىندە، قارقىندى باۋ جوباسى 97 گەكتارعا ىسكە اسىرىلدى.  ال تورتكول، بوگەن، جەڭىس جانە قاراقۇم اۋىل وكرۋگتەرىندە ماقتا ەگىسىن 9000 گەكتارعا جەتكىزۋ جوسپارلانىپ وتىر. 

وسى ورايدا، سۋارمالى جەرلەردىڭ جاعدايىن جاقسارتۋ جانە جاڭادان سۋارمالى جەرلەردى اينالىمعا قوسۋ ءۇشىن تاعى 187 تىك درەناجدى ىسكە قوسۋعا جۇمىس جاسالماق. بيىل اۋدان بويىنشا جىلىجايلاردىڭ كولەمى 7,18 گەكتارعا ۇلعايعانى دا – ۇلكەن جەتىستىك.

اباي اقپارات