تۇركىستان قالاسىندا وڭتۇستىك قازاقستان وبلىسى، قازاقستان حالقى اسسامبلەياسى جانىنداعى قوعامدىق كەلىسىم كەڭەسىنىڭ كوشپەلى وتىرىسى ءوتتى. بۇل تۋرالى «اباي اقپارات» پورتالى وڭتۇستىك قازاقستان وبلىسى اكىمىنىڭ ءباسپاسوز قىزمەتىنە سىلتەمە جاساي وتىرىپ حابارلايدى.

قوجا احمەت ياساۋي كەسەنەسىنە زيارات ەتىپ، اتا-بابا رۋحىنا قۇران باعىشتاۋدان باستالعان باسقوسۋ ق.ا. ياساۋي اتىنداعى حقتۋ-دا جالعاسىن تاپتى. 

جيىندا بايانداما جاساعان كەڭەس توراعاسى ورىنباي راحمانبەرديەۆ قازاقستان حالقى اسسامبلەياسىنىڭ سەسسياسىندا مەملەكەت باسشىسى ن.ءا.نازارباەۆ رەسپۋبليكامىزدىڭ بارلىق وڭىرىندە قوعامدىق كەلىسىم كەڭەستەرىن قۇرۋ جونىندە تاپسىرما بەرگەندىگىن اتاپ ءوتتى. ەلباسى تاپسىرماسى اياسىندا وبلىسىمىزدىڭ بارلىق اۋدان، قالالارىندا 201 قوعامدىق كەلىسىم كەڭەستەرى قۇرىلىپ، ەلدەگى تاتۋلىق پەن تۇراقتىلىقتى ساقتاۋ، بيلىك پەن بۇقارا اراسىنداعى بايلانىستى نىعايتۋ باعىتىندا ناتيجەلى جۇمىس ىستەپ جاتقانىنا توقتالدى. 

كەلەلى باسقوسۋدا زيالى قاۋىم وكىلدەرى مەن اۋدان، قالا اكىمدەرىنىڭ ورىنباسارلارى ەلدىڭ بىرلىگىن بەكەمدەۋ باعىتىنداعى ويلارىن ورتاعا سالدى. 

جيىندا وبلىسىمىزدا جۇمىس ىستەپ جاتقان بارشا كەڭەستەردىڭ باسىن قوساتىن «كەلىسىم» قاۋىمداستىعىن قۇرۋ جونىندەگى وڭتۇستىك قازاقستان وبلىسى، قازاقستان حالقى اسسامبلەياسى توراعاسىنىڭ ورىنباسارى م. قالمۇراتوۆتىڭ ۇسىنىسىنا كوپشىلىك قولداۋ ءبىلدىردى.

اباي اقپارات