بۇل تۋرالى قوعام قايراتكەرى، ەكونوميكا عىلىمىنىڭ كانديداتى تالعات ءابدىجاپپاروۆ (سۋرەتتە) «Sarap Time» ساراپتاۋ ورتالىعىنىڭ «نۇرلى جەر» - مەملەكەتتىڭ جاڭا تۇرعىن ءۇي ساياساتى باعدارلاماسىن تالقىلاۋعا ارنالعان كەزەكتى وتىرىسىندا ايتتى.

- مەنىڭ ويىمشا قر ۇلتتىق ەكونوميكا مينيسترلىگىنىڭ وكىلدەرى  «نۇرلى جەر» باعدارلاماسىن دايىنداۋدى  جۇيەلى تۇردە قاراستىرۋى قاجەت. حالىققا قيىندىق تۋدىراتىن كۇردەلى تەتىكتەر ويلاپ تابۋدىڭ قاجەتى جوق.  ءاربىر جەكەلەگەن ايماقتا ماسەلەنىڭ ماڭىزدىلىعى مەن ەرەكشەلىگىن ءتۇسىنۋ ءۇشىن سىزدەرگە ساراپتامالىق قوعامداستىقتارمەن، ايماق تۇرعىندارىمەن تىعىز بايلانىس ورناتۋ كەرەك،- دەدى تالعات ءابدىجاپپاروۆ.

بۇدان بولەك، قوعام قايراتكەرى ءوزىنىڭ پىكىرىنشە   «ۇلگىلى تۇرعىن ءۇي ساياساتىن» جۇرگىزىپ وتىرعان قىزىلوردا وبلىسىن مىسالعا كەلتىردى.

- جاقسى مىسالدى الىستان ىزدەۋدىڭ قاجەتى جوق. بۇل ماسەلە قىزىلوردا وبلىسىندا كەشەندى تۇردە شەشىلۋدە. بيىل قىزىلوردادا 6600 ادام جەكە تۇرعىن ءۇي قۇرىلىسىن سالۋعا قاجەتتى   بارلىق كوممۋنيكاتسياسى  جۇرگىزىلگەن  10 سوتىقتان جەر تەلىمىن الدى. ەلىمىزدەگى بىردە-ءبىر ايماق وسىنداي ناتيجەلى جۇمىسىمەن ماقتانا المايدى. وسىلايشا جەر كەزەگىندە تۇرعان  50 مىڭعا جۋىق تۇرعىننىڭ ماسەلەسى ءبىر مەزگىلدە شەشىلدى. بولاشاقتا بۇل «بايتەرەك» شاعىن اۋدانى بولادى، - دەدى تالعات ءابدىجاپپاروۆ.

جەر تەلىمى بولىنگەن كەزدە ول جەردەگى ينفراقۇرىلىمدىق ماسەلەلەر دە بىردەن شەشىلۋ قاجەت، ويتكەنى وندا مەكتەپ، اۋرۋحانا، بالاباقشا سەكىلدى الەۋمەتتىك نىساندار بوي كوتەرەدى. مەنىڭ بىلۋىمشە، قىزىلوردا وبلىسىنىڭ اكىمدىگى بۇل اۋماقتىڭ ينفراقۇرىلىمىن دامىتۋ ء ۇشىن شامامەن 10 ميلليارد تەڭگەگە جۋىق قارجى بولگەن. نەگىزى وزگە ايماقتار مەن قالالارعا دا تۇرعىن ءۇي ماسەلەسىن شەشۋ ءۇشىن وسىنى ۇلگى ەتىپ الۋ كەرەك،- دەپ تالعات ءابدىجاپپاروۆ ءوز ويىن ورتاعا سالدى.

قوعام قايراتكەرىنىڭ سوزىنە قاراعاندا، جەر ماسەلەسىنەن كەيىن ەل تۇرعىندارى بيلىك تاراپىنان ءادىل شەشىم بولمايدى دەگەن پىكىردە قالىپ ءجۇر. ونىڭ ويىنشا بۇل ماسەلەگە بىرنەشە سەبەپ بار.

- بىرىنشىدەن، بۇل تەگىن جەر تەلىمىنە كەزەكتىڭ كوپتىگىمەن بايلانىستى. ەكىنشىدەن كوپتەگەن جەر اۋماقتارى كوممۋنيكاتسيامەن قامتاماسىز ەتىلمەگەن. بۇعان قوسا، اراداعى دەلدالدار، شەنەۋنىكتەر جەڭ ۇشىنان جالعاسقان جەمقورلىققا بوي الدىرىپ، ۇلكەن ماسەلەلەر تۋىنداپ جاتادى. بۇعان بارلىعىڭىز بىلەتىندەي، استانا قالاسى قوياندى اۋىلىنداعى وقيعانى مىسالعا كەلتىرۋگە بولادى. مۇنداي ماسەلەلەرگە بەيجاي قاراماي، مىندەتتى تۇردە ءمان بەرىپ قاراۋ كەرەك،- دەدى قوعام قايراتكەرى.

ەستەرىڭىزگە سالا كەتەيىك، «SarapTime» ساراپشىلار پىكىرسايىس كلۋبىنىڭ كەزەكتى وتىرىسى 27 قازاندا استانادا وتكەن ەدى. وتىرىسقا ۇلتتىق ەكونوميكا مينيسترلىگىنىڭ وكىلدەرى، پارلامەنت دەپۋتاتتارى، قازاقستان قۇرىلىسشىلار اسسوتسياتسياسى وكىلدەرى جانە بەلگىلى ساراپشىلار مەن ازاماتتىق بەلسەندىلەر قاتىستى.

abai.kz