اقتوبە وبلىسىنىڭ ىرعىز اۋدانىندا 15 جاستاعى وقۋشى ءمولدىر جۇباەۆا ءۇش جىلدىڭ ىشىندە تۇرىك ءتىلىن جەتىك مەڭگەرىپ العان. سونىڭ ارقاسىندا وقۋشى قىز حالىقارالىق بايقاۋدا اقىن قادىر مىرزاليەۆتىڭ شىعارماشىلىعى جايىندا عىلىمي جوبا قورعاپ، 150 مىڭ دوللار كولەمىندەگى مەملەكەتتىك وقۋ گرانتىن ۇتىپ الدى.

بۇل تۋرالى «دياپازون» حابارلادى.

ءمولدىر ءبىرىنشى سىنىپتان باستاپ ىرعىزداعى مەكتەپ-گيمنازياسىندا ءبىلىم الادى. بۇگىندە ول 11-سىنىپ وقۋشىسى. بۇل قىز جاستايىنان ءتۇرلى وليمپيادالارعا، قازاق ءتىلى مەن ادەبيەتى پانىنەن ءتۇرلى بايقاۋلارعا قاتىسقان. ءمولدىر شىعىس ادەبيەتىن ءسۇيىپ وقيدى. وسىدان ءۇش جىل بۇرىن ول عالامتور ارقىلى تۇرىك ءتىلىن مەڭگەرە باستادى. ءالىپبيىن، ودان كەيىن كۇندەلىكتى قولداناتىن ءسوز تىركەستەرىن جاتتاپ العان ول جۋىردا قادىر مىرزاليەۆتىڭ شىعارماشىلىعىنا ارنالعان جوبانى تۇرىك تىلىندە قورعاپ شىقتى. بوس ۋاقىتىندا ءمولدىر تۇرىك تەلەحيكايالارىن كورىپ، اۋدارۋمەن اينالىسقان. وقۋشى قىز بولاشاقتا قازاق جازۋشىلارىنىڭ كىتاپتارىن تۇرىك تىلىنە اۋدارۋدى ارماندايدى.

«عالامتوردان وزدىگىمنەن ءارتۇرلى بايقاۋلاردى قاراپ ءجۇردىم. ءبىر كۇنى جوبا تۋرالى بايقاۋدى كوزىم شالىپ قالدى. ول كەزدە مەن جەتىنشى سىنىپ وقۋشىسى ەدىم، بىرنەشە بايقاۋعا قاتىسىپ تا ۇلگەرگەنمىن. ۋاقىتىمنىڭ كوپ بولىگىن عالامتوردا وتكىزەتىنىم اتا-اناما ۇنامايتىن ەدى. بىراق ءدال وسى عالامتوردان مەن جۋىردا وتكەن حالىقارالىق بايقاۋ تۋرالى حاباردار بولدىم. بايقاۋعا الەمنىڭ 50 ەلىنەن كەلگەن وقۋشىلار قاتىستى. شىنىمدى ايتسام، باس جۇلدەنى جەڭىپ الامىن دەپ ويلامادىم، سەبەبى قارسىلاستارىم مىقتى بولدى، بىراق مەنىڭ قولىمنان كەلدى. جەڭىسكە جەتكەنىمدى حابارلاعان كەزدە مەن سەنگەن جوقپىن. ەندى ۇبت تاپسىرمايمىن»، – دەدى جەڭىمپاز.

ءمولدىردىڭ ايتۋىنشا، ونىڭ بۇل جەڭىسى سىنىپ جەتەكشىسىنە تايلاندقا، مەكتەپ ديرەكتورىنا دۋبايعا، ال ونىڭ وزىنە پاريجگە جولداما سىيلادى. ودان بولەك، ءمولدىر تۇركيانىڭ كەز كەلگەن وقۋ ورنىنا گرانتقا تۇسە الادى. بۇگىندە ونىڭ قولىندا 150 مىڭ دوللاردىڭ سەرتيفيكاتى بار. جۋرناليست ماماندىعىن تاڭداعان ءمولدىر بولاشاقتا ءوز تەلەارناسىن اشۋدى ارماندايدى.

مەكتەپ-گيمنازياسىنىڭ ديرەكتورىنىڭ ورىنباسارى سايرانكۇل ابدىكارىموۆا ءمولدىردىڭ كوپبالالى وتباسىنان شىققانىن ايتىپ بەردى. جۇباەۆتار وتباسى مولدىردەن بولەك ءتورت پەرزەنت تاربيەلەپ وتىر. ال قىزدىڭ اناسى مايداگۇل 25 جىلدان بەرى باستاۋىش مەكتەپتە مۇعالىم بولىپ قىزمەت اتقارۋدا. اكەسى كەنجەقارا جۇبايۇلى بولسا زەينەتكە شىققانعا دەيىن ىرعىزداعى ءبىلىم بولىمىندە قىزمەت اتقارعان.

Abai.kz