جاقىندا الەۋمەتتىك جەلىدە رەسەيدىڭ مەملەكەتتىك تۋىن قورلاپ، ونىمەن قوقىس تاسىعانداردى اشكەرەلەگەن بەينە جازبا پايدا بولدى. وقيعا رەسەيدىڭ ۆولگوگراد قالاسىندا بولعان.

الەۋمەتتىك جەلىدە قىزۋ تالقىلانعان بۇل بەينە جازباداعى كوممۋنالدىق قىزمەت كومپانياسىنىڭ جۇمىسكەرلەرىن قازىر پوليتسيا ىزدەستىرىپ جاتىر ەكەن. «سentralasian.org» اگەنتتىگىنىڭ حابارلاۋىنشا،  ۆولگوگراد تۇرعىندارى رف مەملەكەتتىك تۋىن قورلاعان اۋلا سىپىرۋشىلاردىڭ ۇستىنەن پوليتسياعا شاعىم تۇسىرگەن. شاعىمعا سايكەس قۇقىققورعاۋ ورگاندارى تەكسەرۋ جۇمىستارىن باستاپ كەتكەن.

«رەسەي تۋى مەن تاڭباسىن "مازاق ەتۋ" بابى بويىنشا قىلمىستىق ءىس قوزعاۋ ماسەلەسى شەشىلىپ جاتىر. اۋلا سىپىرۋشىلاردىڭ كىناسى دالەلدەنسە، ولار ءماجبۇرلى جۇمىسقا جەگىلۋى نەمەسە ءبىر جىلعا تۇرمەگە وتىرۋى مۇمكىن» دەپ جازادى اگەنتتىك.

بۇل ارادا...

سالىستىرىپ كورەيىكشى، ەستەرىڭىزدە بولسا، مەملەكەتتىك رامىزبەن قوقىس تاسىپ، كەيىن تۋ-تالاقايى شىققان تۋدى كۇرەسىنگە لاقتىرعاندار بىزدە دە بولعان ەدى. 2014 جىلى الماتىدا كولىگىنە تيەلگەن قوقىستىڭ بەتىن قازاقستاننىڭ مەملەكەتتىك تۋىمەن جاپقان ادام ۇستالعان بولاتىن. انىقتاي كەلگەندە قاراساي اۋدانىنىڭ تۇرعىنى بولىپ شىققان ا.ەسىمبەكوۆ اكىمشىلىك جازامەن قۇتىلعان ەدى.

2015 جىلى شىمكەنتتە كوممۋنالدىق كاسىپورىن جۇمىسشىلارى قوقىستى قازاقستاننىڭ تۋىنا سالىپ شىعاردى. تازالىق جۇمىستارىن كەزدەيسوق كورىپ قالعان كۋاگەرلەر بۇل جايتتى سۋرەتكە ءتۇسىرىپ العان. قر قك 372-بابى «مەملەكەتتىك رامىزدەردى قورلاۋ» بويىنشا جاۋاپقا تارتىلدى دا، ايىپپۇل تولەۋگە مىندەتتەلدى.

بايراققا قۇرمەتسىزدىكتىڭ شەگىن پاۆلودارلىق تۇرعىن كورسەتتى. 2014 جىلدىڭ 17 ءساۋىر كۇنى ەرتىس اۋىلىنىڭ تۇرعىنى 3 اقپاراتتىق باننەردى ءبۇلدىرىپ، سىرتقى باقىلاۋ كامەراسىن ۇرلاپ كەتكەن. سونىمەن قاتار تۋبەركۋلەزگە قارسى ديسپانسەر، ورتالىق اۋداندىق اۋرۋحانا، بالالار ونەر مەكتەبى مەن اۋداندىق قازىناشىلىق باسقارماسى عيماراتىنداعى مەملەكەتتىك تۋدى جۇلىپ العان.

ال بيىل اقتوبەدە 13 مەكەمەگە «مەملەكەتتىك رامىزدەردى قورلادى» دەگەن ايىپ تاعىلدى. اقتوبەدە جەكەمەنشىك كاسىپورىنداردى بىلاي قويعاندا، مەكتەپتەر مەن بالاباقشالاردا ىلىنگەن بايراقتار ءتيىستى تالاپقا ساي كەلمەيتىن بولىپ شىققان.

ءتۇيىن: وكىنىشتىسى، وسى ءجايتتاردىڭ سوڭى نەمەن اياقتالعانى بەلگىسىز. مەملەكەتتىك تۋعا قاتىستى كەلەڭسىز جايتتار سوڭعى كەزدەرى ءجيى قايتالاناتىن بولدى. مەيلى بىلتىر عانا كوك بايراقتى جەرگە سۇيرەتىپ، قوقىس تاسىعاندار زاڭ جۇزىندە جازاعا تارتىلعان ەدى. اكىمشىلىك عيماراتتاردىڭ توبەسىنە ىلىنگەن تۋدىڭ جىرىم-جىرىمى شىققانى تاعى بار. جىرتىق تۋدىڭ ەڭسەنى ەزىپ، كەلەشەككە كۇمانمەن قارايتىن ويلارعا جەتەلەيتىنى بەلگىلى. ال بولاشاعى جارقىن قازاقستاننىڭ كوك بايراعى تەك كوكتە جەلبىرەۋى ءتيىس-ءتىن!

بىلتىردان بەرى اكىمشىلىك جازاعا تارتىلىپ كەلگەن تۋدى قورلاۋشىلارعا ءالى دە بولسا ەس كىرمەگەن ەكەن. ونى جوعارىدا كەلتىرىلگەن دەرەكتەردەن انىق اڭعارۋعا بولادى. بالكىم، ءبىز دە رەسەي سەكىلدى قاتاڭ جازا قولدانىپ، مەملەكەتتىك رامىزدەردى قورلاعان ادامدى ءبىر جىلعا تەمىر تورعا توعىتۋىمىز قاجەت شىعار. 

ء سىز نە دەيسىز؟

نۇرزات توعجان

Abai.kz