رەسمي ساپارمەن ساۋد ارابياسى كورولدىگىنە كەلگەن نۇرسۇلتان نازارباەۆ مەدينا قالاسىندا  پروۆينتسيا گۋبەرناتورى حانزادا فەيسال بەن سالمان ءال ساۋدپەن ەكىجاقتى كەزدەسۋ وتكىزدى، - دەپ حابارلادى پرەزيدەنتتىڭ ءباسپاسوز قىزمەتى.

بۇدان بولەك، مەملەكەت باسشىسى مەدينا قالاسىنداعى مۇحاممەد پايعامبار مەشىتىنە بارىپ، ناماز وقىدى، سونداي-اق ءماسدجيد ان-ءناباۋي مەشىتىنىڭ ساۋلەتىمەن جانە ينتەرەرىمەن تانىستى.

ودان كەيىن قازاقستان پرەزيدەنتى ساۋد ارابياسى كورولى سالمان بەن ابدەل ءال ساۋدپەن كەلىسسوزدەر ناتيجەسى بويىنشا بىرقاتار ەكىجاقتى قۇجاتتارعا قول قويۋ جوسپارلانىپ وتىرعان ەر رياد قالاسىنا كەلدى.

ساپار بارىسىندا ساۋد ارابياسى كورولدىگىنىڭ تاعى بىرقاتار رەسمي تۇلعالارىمەن جانە ىسكەر توپتارى وكىلدەرىمەن كەزدەسۋ وتكىزۋ قاراستىرىلعان.

ساۋد اراب كورلدىگىنە نازارباەۆ 1994 جىلى العاش ساپار شەككەن بولاتىن. سول كەزدە ۋاقىتشا جوندەۋدە تۇرعان پايعامبار مەشىتىنە باس سۇققان ول: "مەن جاراتقان يەمىزدەن قازاق حالقىنا قايىرىم مەن شاپاعات سۇرادىم" دەپ ەدى.

اbai.kz