ۋران وندىرۋمەن مول سالىق ءتۇسىرىپ كەلە جاتقان سوزاق اۋدانىندا الدىڭعى جىلدان باستاپ التىن وندىرىلسە، كەلەسى كەزەك كومىرگە دە جەتىپتى. مۇنان بولەك، اۋدان اكىمى وڭىردەگى بىرنەشە سۋ توعاندارىندا بالىق شارۋاشىلىعى قولعا الىنعالى جاتىر ەكەن. ەندى وسى ءىس العا باسىپ، سوزاق بالىعى شەتەل اسىپ جاتسا تاڭقالماڭىز. بۇل تۋرالى سوزاق اۋدانىنىڭ اكىمى ماقسات يساەۆ جۋرناليستەرمەن كەزدەسۋ بارىسىندا ايتتى.

اۋداننىڭ جالپى وڭىرلىك ءونىمى دە كوتەرىلىپ كەلەدى ەكەن. سالىستىرمالى تۇردە ايتايىق، 1991 جىلى وڭىرلىك ءونىم 1,5 ميلليارد تەڭگە بولسا، بۇگىندە 214 ميلليارد تەڭگەگە دەيىن ءوستى. مەملەكەتىمىزدىڭ باستى باعىتتارىنىڭ ءبىرى - ينۆەستيتسيا تارتۋ بولسا، سوزاق بۇل سالادا سوڭعى ورىنداردان كوش باسىنا دەيىن كوتەرىلدى. ماسەلەن، 1991 جىلى اۋداندا تارتىلعان ينۆەستيتسيا كولەمى 41 ميلليون تەڭگە بولسا، بيىلعى جىلى 23 ميلليارد 642 ميلليون تەڭگە بولدى. ال جەرگىلىكتى بيۋدجەت بيىل 8 ميلليارد 512,8 ميلليون تەڭگەنى قۇراماق. 1991 جىلى اۋدان قازىناسى 90 ميلليون تەڭگەدەن اسپاعان ەدى. ونەركاسىپ ونىمدەرىن ءوندىرۋ دە 25 جىل بويىنا ۇزدىكسىز وسە وتىرىپ، 1995 جىلعى 708,1 ميلليون تەڭگەدەن 200,4 ميلليارد تەڭگەگە جەتىپ، 283 ەسەگە ءوسىپتى. 

اۋداندا تۋريزم سالاسى دا ەرەكشە قولعا الىنۋدا. وڭىردە ماڭگىلىك مەكەن تاپقان اۋليە-امبيەلەر كوپ. ەلىمىز ەگەمەندىك العالى بەرى ىسقاق باب، بابا تۇكتى شاشتى ءازىز، قارابۋرا، اقبيكەش كەسەنەلەرى جاڭارتىلعان. مىسالى، مەملەكەت تاراپىنان ىسقاق باب كەسەنەسىنە 50 ميلليون تەڭگە ءبولىنىپ، تولىعىمەن رەكونسترۋكتسيا جاسالىپتى. سوزاققا كەلگەن تۋريستەر ءۇشىن تۇركىستانعا ءوتىپ كەتۋ دە ىڭعايلى. تاۋدى جارىپ وتەتىن ەكى اراداعى 115 شاقىرىمدىق توتە جول تولىعىمەن اسفالتتانعان.

Abai.kz