باس ءمۇفتي ەرجان قاجى مالعاجىۇلى اعامىزدىڭ نازارىنا! 

وسى ەلدىڭ ازاماتى بولا تۇرا ورامال ماسەلەسىندە ۇندەمەي وتىرعانىمىز جاراماس. "ۇلتتىق كيىمدەردى قاساقانا جويۋعا، حالىق ساناسىنان وشىرۋگە باعىتتالعان ارنايى ۇدەرىستەردىڭ بولعانى قازىر جاسىرىن ەمەس. وسى سەبەپتەردەن دالانىڭ گۇلىندەي قۇلپىرعان ۇلتتىق كيىمدەرىمىز قولدانىستان قالا بەردى.

قازاق كيىمدەرىنىڭ كوپشىلىگى قاسيەتتى ءدىنىمىزدىڭ تالاپتارىنا ساي كەلەدى دەۋگە تولىق نەگىز بار. بۇگىندە قازاقتىڭ كوزقاراسى، دۇنيەتانىمى كوز الدىمىزدا وزگەرىپ بارادى. مىسالى، قازىر بوكسەسى مەن ومىراۋىن كورسەتىپ، قىسقا ەتەك-جەڭ كيىپ، اشىق-شاشىق جۇرگەندەرگە ءبىز رەنىش كوزىمەن قارامايتىن بولعانبىز. قوعامنىڭ ەتى وعان ابدەن ۇيرەنگەن. ءتىپتى بۇلاي كيىنۋدى مادەنيەتتىلىكتىڭ نىشانى سەكىلدى كورەتىن بولدىق. ال، كەرىسىنشە، ۇياتقا، ار-نامىسىنا، يمانىنا بەرىك بولىپ، ءوز دەنەسىن بوگدە ەركەكتەرگە كورسەتپەي، قىمتاپ كيىنگەن قىزدارعا ۇركە قارايتىن دارەجەگە جەتتىك. اقيقاتىنا كەلگەندە، ادام بالاسىنىڭ تابيعاتى، اسىرەسە، ايەل زاتىنىڭ جاراتىلىسى ءاۋ باستان ۇيات پەن ادەپكە قۇرىلعان. سوناۋ ادام اتامىز بەن حاۋا انامىزدىڭ داۋىرىندە دە دەنەنى جاۋىپ كيىنۋ ءداستۇرى بولعان. قاسيەتتى قۇران كارىمدە مۇنى دالەلدەيتىن انىق اياتتار بار...".

ءبىر كەزدەرى ءابدىساتتار قاجى دەربىسالى اقساقالىمىز وسىلاي دەگەن ەدى. ءيا، مەكتەپتەگى باليعاتقا تولماعان قىز بالالاردىڭ جايى تۇسىنىكتى. الايدا بۇل ماسەلە مۇنىمەن بىتپەيدى. سوندىقتان دا مەيلى ول مۇسىلمان بولسىن، حريستيان بولسىن، تاۋەلسىز ەلىمىزدىڭ ازاماتتارىنىڭ قۇقى تەڭ دارەجەدە ەسكەرىلۋى ءتيىس دەپ ويلايمىن. ءدال وسى ماسەلەدە اسىل دىنىمىزگە قاتىسى جوق وقيعالاردى پايدالانىپ، قولدان داۋ جاساپ وتىرعان توپتار بولۋى دا مۇمكىن. بىرىنشىدەن، ارانداپ قالمايىق. ەكىنشىدەن، مەكتەپتە ورامال تاعۋ زاڭعا قايشى بولسا، ول زاڭدى وزگەرتۋگە بولاتىنىن دا ۇمىتپالىق. سەبەبى ءبىز الدەبىر مەملەكەتتىڭ قولاستىنداعى بودان جۇرت ەمەسپىز. ءوز ەلىمىزدە، ءوزىمىزدىڭ اتا-بابالارىمىزدان قالعان جەردە ءومىر ءسۇرىپ جاتىرمىز. ء"الحامدۋليللا، التى ميلليون قازاقپىز!" دەگەن (احمەت بايتۇرسىن) تەكتى ۇلتتىڭ ۇرپاعىمىز! وسى جاعداي سەبەپتى قازاقستان مۇسىلماندارى باس ءمۇفتي ەرجان قاجى مالعاجىۇلىنان باتىل دا، دانا شەشىم كۇتەدى دەپ بىلەمىن. باس مۇفتيىمىزبەن بىرگەمىز، ايتقانىن ءار ۋاقىت قولدايمىز! سىزدەن سوڭعى جاڭالىقتار سەبەپتى ءوز پىكىرىڭىزدى ءبىلدىرۋىڭىزدى سۇرايمىز.

ازامات بيتان

Facebook-تەگى پاراقشاسىنان