كەشە وبلىس اكىمى جانسەيىت تۇيمەباەۆ بىرقاتار سالا باسشىلارىمەن بىرلەسە شىمكەنتتەگى جىلۋ بەرۋ قازاندىقتارىن ارالاپ كورىپ، جۇمىس ىستەۋ جۇيەسىمەن تانىستى.

اتاپ ايتقاندا، ءوڭىر باسشىسى اكىمشىلىك ىسكەرلىك ورتالىعىندا ورنالاسقان قۋاتتىلىعى 160 گكال. بولاتىن قازاندىقتىڭ جۇمىسىمەن تانىستى. قازىرگى كەزدە، اتالعان جىلۋ بەرۋ ورتالىعى ارقىلى 24 كوپقاباتتى تۇرعىن ءۇي مەن  6 بيۋدجەتتىك مەكەمە وسى جىلدىڭ 17 قازانىنان باستاپ ورتالىقتاندىرىلعان جىلۋمەن قامتاماسىز ەتىلە باستادى.

وتكەن جىلى ىسكە قوسىلعان بۇل قازاندىقتىڭ بۇگىندە ءوز قۋاتتىلىعىمەن جۇمىس ىستەمەي وتىرعانىن العا تارتقان قالا اكىمدىگىنىڭ جەتەكشىلىگى وبلىس اكىمىنەن وسى ماڭداعى كوپقاباتتى ۇيلەرگە قوسىمشا جىلۋ قۇبىرلارىن تارتۋ ءۇشىن بيۋدجەتتەن قارجى قاراستىرۋدى سۇراپ، تاعى وسى ىسپەتتەس قازاندىق سالۋ قاجەتتىگى تۋرالى ۇسىنىسىن جەتكىزدى.

ءوز كەزەگىندە وبلىس اكىمى ج.تۇيمەباەۆ قالانىڭ جىلۋ بەرۋ جۇيەسىن ءتيىمدى ەتەتىن ارنايى سىزبا ازىرلەۋدى تاپسىرىپ، جاڭا قازاندىق سالۋ بويىنشا ۇسىنىستى كەلەر جىلدىڭ بيۋدجەتى ارقىلى شەشۋدى جۇكتەدى.

سونىمەن قاتار،  ايماق باسشىسى «نۇرلى جول» باعدارلاماسى اياسىندا قولعا الىنعان ۇزىندىعى 6,5 شاقىرىم بولاتىن ماگيسترالدى جىلۋ جۇيەسىن قايتا قۇرۋ جۇمىسىمەن تانىستى.  بۇگىندە 6 شاقىرىم جۇمىستارى بىتكەن قۇبىردىڭ قۇرىلىسىن پىسىقتاعان اكىم جۇمىستاردىڭ قازان ايىنىڭ 20-نا دەيىن اياقتالۋى كەرەكتىگىن مىندەتتەدى.

مۇنان سوڭ، وبلىس اكىمى باستاعان جۇمىسشى توپ  «3-ەنەرگوورتالىق» اق-دا بولىپ، ونداعى جۇمىس بارىسىمەن تانىستى. 1998 جىلدان باستاپ حالىققا قىزمەت ەتىپ كەلە جاتقان بۇل ورتالىق 2008 جىلدان باستاپ قالانىڭ وڭتۇستىك بولىگىن جىلۋمەن جانە جىلۋ سۋمەن قامتاماسىز ەتە باستاعان.

اتالعان «3-ەنەرگوورتالىق» سونداي-اق،  قالا تۇرعىندارىن ەلەكتر قۋاتىمەن قامتىپ وتىر. مۇندا جاز ايلارىندا 70-85 مۆت وندىرسە، قىس مەزگىلىندە 135-140 مۆت وندىرەدى. ءوڭىردىڭ ەلەكتر قۋاتىنا قاجەتتىلىگى جازدا 300-350 مۆت بولسا، قىستا 400-450 مۆت-ءتى قاجەت ەتەدى. ال قالعان قاجەتتى ەلەكتر قۋاتىنىڭ 60 پايىزىن سىرتتان كەلەتىنىن ەسكەرگەن ءوڭىر باسشىسى وبلىستا ەلەكتر ەنەرگياسىن وندىرەتىن جاڭا گاز تۋربيناسىن سالۋ بويىنشا ۇسىنىس ەنگىزۋدى تاپسىردى.

جىلۋ جۇيەسىنىڭ دايىندىق بارىسىن پىسىقتاعان وبلىس اكىمى ساپار بارىسىنىڭ قورىتىندىسى بويىنشا بىرقاتار سالا باسشىلارىنا ناقتى تاپسىرمالار بەرىپ، تۇرعىنداردىڭ قازاننىڭ سوڭىنا دەيىن جىلۋمەن قامتىلۋىن مىندەتتەدى.

وقو اكىمىنىڭ ءباسپاسوز قىزمەتى