بۇگىن وبلىس اكىمى جانسەيىت تۇيمەباەۆ وڭىردەگى بيزنەس وكىلدەرمەن كەزدەسۋ وتكىزدى. جيىنعا 160-تان استام شاعىن جانە ورتا بيزنەس وكىلدەرىمەن قاتار، ءىرى كاسىپكەرلەر دە قاتىستى. بەيرەسمي كەزدەسۋدىڭ باستى ماقساتى – ايماقتاعى كاسىپكەرلەرمەن جاقىن تانىسىپ، وسى سالادا قوردالانعان وزەكتى ماسەلەلەردى ورتاقتاسىپ شەشۋ بولىپ تابىلادى.

جيىندا وبلىس اكىمى ءوڭىردىڭ يندۋستريالدى-يننوۆاتسيالىق دامۋ جۇمىستارىندا ەلباسىنىڭ بەرگەن تاپسىرمالارىن تولىقتاي ورىنداپ، بۇل رەتتە، قاعازباستىلىقتىڭ ازايىپ، سىبايلاس جەمقورلىققا جول بەرمەۋ قاجەتتىگىن ايتتى. ايماق باسشىسىنىڭ كاسىپكەرلىكتى قولداۋعا ايرىقشا كوڭىل بولگەنى جينالعانداردى قۋانتىپ، وزدەرىن الاڭداتاتىن ماسەلەلەردى اكىمنىڭ تىكەلەي الدىندا باياندادى.

اتاپ ايتار بولساق، «ديويلگاز» كومپانياسىنىڭ جەتەكشىلىگى «تاسساي» يندۋستريالدى ايماعىنان بولىنگەن جەر تەلىمىنىڭ قۇجاتتارىن راسىمدەۋدەگى قاعازباستىلىق پەن ونى بەرۋدى كەشەۋىلدەتىپ جاتقانىن ايتتى. ءوز كەزەگىندە، وسى ماسەلە بويىنشا جاۋاپ بەرگەن وبلىس اكىمى تاياۋدا 14 قاۋلىعا قول قوياتىنىن، وندا اتالعان «ديويلگاز» كومپانياسىنىڭ دا بار ەكەنىن جەتكىزدى. مۇنان بولەك، اپتا سوڭىنا دەيىن جەر ۋچاسكەسىن بەرۋ بويىنشا قاۋلىنىڭ دايىن بولاتىنىن ايتتى. 

كەزدەسۋ بارىسىندا ايتىلعان جانە سول جەردە شەشىمىن تاپقان ماسەلەلەردىڭ ءبىرى «ماراي ە 7» جانە «كارلس كرونا» كاسىپورىندارىنىڭ ەلەكتر ەنەرگياسىمەن قامتىلماي وتىرعانى ەدى. ماسەلەگە قانىق بولعان جانسەيىت تۇيمەباەۆ 3 تاۋلىك ارالىعىندا اتالمىش كاسىپورىندارعا ەلەكتر قۋاتىن جەتكىزۋدى تاپسىردى.  

بۇدان وزگە، وتىرىستا ينجەنەرلىك كوممۋنيكاتسيالار ماسەلەلەرى مەن ءونىمدى وتكىزۋ، شەت ەلدەن كەلەتىن جۇمىسشىلارعا ۆيزا الۋ ماسەلەلەرى سىندى كاسىپكەرلىكتىڭ دامۋىنا كەدەرگى كەلتىرەتىن كوپتەگەن پروبلەمالار قوزعالدى.  

جيىن قورىتىندىسى بويىنشا، وبلىس اكىمى جۇيەلى تۇردە جۇمىس جاساۋدى جانە وبلىس اكىمىنىڭ جانىنان كاسىپكەرلەر كەڭەسىن قۇرۋدى تاپسىردى. سونداي-اق، ايىنا ءبىر رەت كاسىپكەرلىكتىڭ ءتۇرلى سالالارىنا بايلانىستى بيزنەسمەندەرمەن جيىن وتكىزۋدى ۇسىنىپ، مەملەكەت پەن كاسىپكەرلىك قۇرىلىمدارى كۇشتەرىن بىرىكتىرەتىن بولسا، كۇتكەن مەجەنى باعىندىرۋعا بولاتىنىن باسا ايتتى.

وتىرىس ناتيجەسىن بويىنشا جانسەيىت تۇيمەباەۆ بەلگىلەپ بەرگەن بىرقاتار تاپسىرمالار مىناداي: 

ءبىرىنشى. كاسىپكەرلەردىڭ كۇردەلى ماسەلەلەرىن جيناقتاپ، وبلىس اكىمىنىڭ جانىنان قۇرىلعان كاسىپكەرلەر كەڭەسىندە شەشىم شىعارۋ; 

ەكىنشى. وڭتۇستىك قازاقستان وبلىسىندا شىعارىلاتىن تاۋارلار مەن قىزمەت تۇرلەرىن دامىتۋ بويىنشا جۇمىس توبىن قۇرىپ، ونىمدەردى رەسپۋبليكالىق، حالىقارالىق كورمەلەر مەن فورۋمداردا جانە دە وزگە دە ءىس-شارالاردا كورسەتۋ; 

ءۇشىنشى. استانا مەن الماتى قالالارىندا ۇزدىكسىز جۇمىس ىستەيتىن ساۋدا-كورمە ورتالىعىن قۇرىپ، وندا وڭتۇستىك قازاقستان وبلىسىنىڭ ونىمدەرىن وتكىزىپ، ساۋدالاۋ;

ءتورتىنشى. مەملەكەتتىك ورگاندار جۇمىسىنىڭ اشىقتىعىن قامتاماسىز ەتۋ ماقساتىندا كاسىپكەرلەرگە قىزمەت كورسەتۋ ورتالىعىنىڭ جۇمىسىن ەلەكتروندى فورماتقا كوشىرىپ، قۇجات اينالىمىن وزگەرتۋ. وبلىس اكىمدىگى بارلىق رۇقسات ەتىلگەن قۇجاتتاردىڭ مەرزىمىن قاداعالاپ وتىرسا، مەرزىمىنەن كەشىككەن اۋدان اكىمدىكتەرى مەن قالا اكىمدىكتەرى نەمەسە مەملەكەتتىك ورگاندار جاۋاپكەرشىلىككە تارتىلاتىن بولادى;

بەسىنشى. سونداي-اق بيزنەستىڭ الەۋمەتتىك جاۋاپكەرشىلگىن دامىتىپ، الەۋمەتتىك-مادەني سالاعا قولداۋ كورسەتۋ;

التىنشى. مەملەكەتتىك قىزمەتشىلەردىڭ جاۋاپكەرشىلىگىنە ايرىقشا نازار اۋدارىلادى. تاپسىرمالار ورىندالماعان جاعدايدا ناقتى شارالار كورىلەتىن بولادى;

جەتىنشى. بىلىكتى كادرلاردى داياۋلاۋدىڭ ناتيجەلى جۇيەسىن قۇرۋ ءۇشىن جەرگىلىكتى جوو مەن كوللەدجدەردى تارتۋ كەرەك. سونىمەن بىرگە، ءدۋالدى وقىتۋ جۇيەسىن دامىتۋ ءۇشىن يندۋستريالدى ايماقتاردا كوللەدجدەر وكىلدىگىن قۇرۋ جايىن قاراستىرۋ تاپسىرىلدى. سونداي-اق، اكىم كاسىپورىنداردىڭ قاجەتتىلىگىنە بايلانىستى تىكەلەي گرانت ءبولىپ، وسى ماسەلەنى قايتا قاراۋدى جۇكتەدى;

 سەگىزىنشى.  كاسىپكەرلىك سالاسىندا العا قويىلعان ماقساتتاردى ورىنداۋ ءۇشىن ءوڭىردىڭ ستراتەگيالىق جوسپارىن ازىرلەۋ كەرەك; 

جينالىس بارىسىندا كوتەرىلگەن بارلىق ماسەلەلەر وبلىس اكىمىنىڭ ءجىتى باقىلاۋىنا الىندى.

Abai.kz