وتكەن اپتادا ارمەنيا استاناسىندا وتكەن ۇجىمدىق قاۋىپسىزدىك شارتتى ۇيىمىنىڭ كەزەكتى جيىنىندا ۇزىن-ىرعاسى جيىرماعا جۋىق قۇجات قابىلدانعان. جابىق ەسىك جاعدايىندا وتكەن ەرەۆان سامميتىندە كوتەرىلگەن نەگىزگى ماسەلە – سيرياداعى سوعىس پەن قاراباح جانجالى بولدى.

«سالقىن ءتيىپ قالۋىنا» بايلانىستى قازاقستان پرەزيدەنتى نۇرسۇلتان نازارباەۆ ەرەۆانعا ۇكىمەت باسشىسى باقىتجان ءابدىرۇلىن جىبەرگەن بولاتىن.

جيىرما بەس جىلدىق تاريحى بار ۇيىمنىڭ جۇمىسىنان بەرەكە كەتە باستاعانىن بۇل جولى باسشىلاردىڭ وزدەرى اڭعارتقانداي بولدى.

سامميت وتەتىننەن ەكى-ءۇش كۇن بۇرىن عانا «سالقىن ءتيىپ قالۋىنا» بايلانىستى قازاقستان پرەزيدەنتى ەرەۆانعا بارماي قويعان بولاتىن. ارمەنيادا باس قوسقان بەس پرەزيدەنتتىڭ كەزدەسۋىنەن بىراۋىزدىلىق بايقالمادى.

ارمەنيالىق «Lragir» باسىلىمىنىڭ جازۋىنشا، اشۋعا مىنگەن بەلورۋسسيا باسشىسى ارىپتەستەرىنە ۇقشۇ جۇمىسىنىڭ ماردىمسىز ەكەنىن ايتقان. «ەرەۆانداعى ەڭ باستى ءسوزدى لۋكاشەنكو ايتتى» اتتى ماقالادا ارمەنيالىق جۋرناليست نايرا ايرۋميان  بەلورۋسسيا باسشىسى الەكساندر لۋكاشەنكونىڭ ەرەۆانداعى ۇقك سامميتىنە كوڭىلى تولماعاندىعىن جازادى. «ۇساق-تۇيەك ماسەلە ءۇشىن سونشا جەردەن شاقىرتتىڭدار، وسى جەردە ايتىلعان ماسەلەلەر پرەزيدەنتتەر تالقىلايتىن دەڭگەيدەگى پروبلەمالار ەمەس» دەپ كىجىنگەن لۋكاشەنكونىڭ ءتۇيىن ءسوزى وداقتاستاردىڭ كوڭىلىنە ءتيىپ كەتكەن سىڭايلى.

«ۇقشۇ-نى الەمنىڭ ەشبىر مەملەكەتى مويىندامايدى. ياعني، بىرلەسكەن وقۋ-جاتتىعۋلاردى،ت.ب. شارالاردى وتكىزىپ جۇرگەن اسكەري بلوك بار. بىراق ونى الەمدە ەشكىم بىلمەيدى، مويىندامايدى. ەگەر ءبىزدى بىرەۋلەر مويىنداسىن دەسەك، سوعان تۇرارلىق جۇمىس جاساۋىمىز كەرەك. ۇقشۇ قۇرىلعانىنا 25 جىل بولدى. وزگەرگەن تۇك جوق. جيىرما بەس جىلدا بۇۇ، ەو سەكىلدى ۇيىمدار ۇقشۇ قىزمەتىن مويىنداعان جوق. سيريا اۋماعىنا بىتىمگەرلىك ميسسياسىن ورىنداۋ ءۇشىن ءبىزدىڭ اسكەريلەرگە ماندات بەرگەن جوق»،-دەپدى بەلورۋسسيا باسشىسى.

ايتپاقشى، وسى جولعى جيىندا ارمەنيانىڭ كەڭەسكە توراعالىق مەرزىمى اياقتالىپ، تىزگىن كەزەگى بەلورۋسسيا پرەزيدەنتىنە بەرىلدى.

راسىندا، رف پرەزيدەنتىنىڭ پارمەنىمەن، ۇقك اسكەريلەرىن سيريا مەن قاراباح اۋماعىنا بىتىمگەرلىك ميسسياسىن ورىنداۋ ماقساتىندا ەنگىزۋ ءۇشىن بۇۇ ارنايى رۇقساتى كەرەك-ءتىن. الايدا ۇقك اسكەريلەرىنە مۇنداي ماندات بەرىلمەگەن.

نۇرزات توعجان

Abai.kz