اقتوبەدە 5 ماۋسىمداعى لاڭكەستىك وقيعاعا قاتىستى 29 ادامنىڭ  سوت ءىسى باستالدى. 

الدىن الا تىڭداۋلار اقتوبە وبلىسىنىڭ مامانداندىرىلعان اۋدانارالىق قىلمىستىق سوتىندا ءوتتى. سوت الدىندا 29 ايىپتالۋشى وتىر. ونىڭ 9-ى بىرقاتار قىلمىستىق قۇقىق بۇزۋشىلىق  جاساعانى ءۇشىن، سونىڭ ىشىندە لاڭكەستىك ارەكەتكە قاتىسى بار بولعاندىقتان، 18-ءى جوسپارلانعان قىلمىستى حابارلاماعاندىعى، ال 2-ءى قىلمىستى جاسىرعاندىعى جونىندە ايىپتالىپ وتىر.

قىلمىستىق ءىس 201 تومنان تۇرادى. قىلمىستىق ءىس بويىنشا  215 ءتۇرلى ساراپتاۋ جانە 26 تەرگەۋ ءىسى جۇرگىزىلدى. وبلىستىق پروكۋراتۋرانىڭ كەلىسىمى بويىنشا، تەرگەۋ جانە سوت كەزىندە كۇدىكتىنى قاماۋدا ۇستاۋ كەزەڭىمەن ۇيلەستىرۋ  ءتورت ايعا ۇزارتىلدى. ال 7 قازاندا لاڭكەستىك فاكتىسى بويىنشا قىلمىستىق ءىس سوتقا جولداندى

27 ادۆوكات سوتتالۋشىلاردىڭ مۇددەسىن قورعايدى. سوتقا كۋاگەرلەر رەتىندە 48    تۇلعا، 88 ادام زارداپ شەكەندەر رەتىندە شاقىرىلادى.

ەستەرىڭىزگە سالا كەتەيىك، اقتوبەدە 5 ماۋسىمدا ءبىر توپ ادام ەكى قارۋ-جاراق دۇكەنىنە جانە اسكەري بولىمگە قارۋلى شابۋىل جاساعان بولاتىن. قالادا تەرروريزمگە قارسى وپەراتسيا رەجيمى جاريالاندى. لاڭكەستىك وقيعاسىنىڭ سالدارىنان سەگىز ادام، ونىڭ ىشىندە ءۇش اسكەري ادام قازا تاپتى.  جاراقاتتتانعان 23 ادام اۋرۋحاناعا جاتقىزىلدى.

Abai.kz